တယိတ်ချံၚ်၊ မာတ် ၆။
ပ္ဍဲပွိုၚ်ဍုၚ်တယိတ်ချံၚ် ရးတၞၚ်သဳ ဟိုတ်နူဒပ် KTLA ကြတ်ဗတိုက်တုဲ ကောန်ပၞာန် KNU ၅ တၠ ဒးလဝ်ဝပ်ရောၚ် ဗော်သွးကောန်ဂကူ ကရေၚ် KNU ဗဟဵု ပတိတ်လဝ်လိက်လလောၚ်တြး ပ္ဍဲဂိတုမာတ် ၅ ဂှ်ရ။
ပ္ဍဲဂိတုမာတ် ၄ လောန်ကၠုၚ်ဏံ အကြာကွာန်တမဳပဝ်တဝ်ကဵု ကွာန်ပျာတာချံၚ် ပွိုၚ်ဍုၚ်တယိတ်ချံၚ်ဂှ် ဗိုလ်အေဝ်ခွဳ (ဝါ) ကဝ်လာဖိုဝ် သ္ကိုပ်သ္က ကောန်ဒပ် KTLA တံ ကြတ်ဗတိုက်လဝ် ကောန်ပၞာန် KNU တံဂှ်ရောၚ်။
ဟိုတ်နူဒးဒုၚ်ကြတ်ဗတိုက်တုဲ ကောန်ဒပ် ၅ တၠ နူတမ်ဒပ် (၁၂) ဒပ်ပၞာန်ဗၠးၜးကောန်ဂကူကရေၚ် (KNLA) သၟဝ်တဲ တပ်မဟာ (၄) KNU တံ ဒးအာဝပ်ဘဲဒဏ် မဒှ်ရ။
ကောန်ပၞာန် KNU တံ အဃောအာပလံၚ် လွဟ်မကမ် စၞစဇွောံမ ဇရေၚ်မုက်ပၞာန် ဗတိုက်မံၚ်ကဵုဒပ်ကဝ်မယှေန်ပၞာန်တံဂှ်တုဲ အခိၚ်ကလေၚ်စဴကၠုၚ်ဂှ် ဒးဒုၚ်ကြတ်ပန်လဝ်ရောၚ် ညးတာလျိုၚ် လလောၚ်ပရိုၚ် ခရိုၚ်ဗိက်-ထဝါဲ မဟာဒပ် (၄) KNU ဟီုကဵု ဌာန်ပရိုၚ်သြၚ်လောန်တိုၚ်မ် ရ။
ပွမ KTLA ကၠောန်လဝ်ဏအ်ဂှ် ဒှ်အရာမဖန်ဗဒှ် အကြာကောန်ဂကူ ကရေၚ်ကဵုကရေၚ် ညံၚ်ဂွံဒှ်ပန်ညးသ္ကံရောၚ် သ္ဂးရ။
ဒပ်ပၞာန်ကဝ်တူလေဝ် KTLA ဂှ် ဒုသ္ကိုပ်ပၞာန် သဝ်နေဝ်တာမျ သ္ကိုပ်ပၞာန် KNDO (တြေံ) သၟဝ်တဲ KNU ဒက်ပ္တန်လဝ် ပ္ဍဲဂိတုဂျူလာၚ် ၁၆ သၞာံ ၂၀၂၂ တေံရ။
ဒပ်ပၞာန်ကဝ်တူလေဝ် KTLA ဝွံ လတူကောန်ဒပ် KNLA တမ်ဒပ် (၁၂) သၟဝ်တဲ တပ်မဟာ (၄) KNU တံဂှ် ကြတ်ပန်မံၚ် ဂၠိုၚ်ကဵုအလန် မဒှ်ရ။
ပရိုၚ် – သြၚ်လောန်တိုၚ်မ်
Photo – KNU