မတ်မလီု၊ မာတ် ၆။
ကဝ်မယှေန်ပၞာန်သီအဝဵု ကဵုလဝ်အခေါၚ်သက်သာဗၠးဒုဟ်ဒဏ်ဂှ် ကောန်ထံၚ်ပရေၚ်ဍုၚ်ကွာန် ၄၄၀၀ ပြၚ်ဟေၚ် ကလေၚ် ဗၠးတိတ်လဝ်ဏီရောၚ် ဇာဖိုၚ်ကောန်ထံၚ် ပရေၚ်ဍုၚ်ကွာန် အလုံဍုၚ်ဗၟာ PPNM လလောၚ်တြးလဝ်ရ။
ပ္ဍဲဂိတုမာတ် ၄ အခိၚ်ဗ္တံ ၈ နာဍဳဂှ် အတိုၚ် PPNM ဂၠိုက်ဂၠာဲသ္ပဒတန် ဂွံလဝ်မ္ဂး နကဵုအခေါၚ်သက်သာဗၠးဒုဟ်ဒဏ် ကဝ်မယှေန်ပၞာန် နူထံၚ် ၃၉ မ အလုံမွဲဍုၚ်ဂှ် ကောန်ထံၚ်ပရေၚ်ဍုၚ်ကွာန် ၄၄၀၃ တၠဟေၚ် ကလေၚ်ဗၠးတိတ်လဝ်ဏီရောၚ်။
သွက်ကောန်ထံၚ်ပရေၚ်ဍုၚ်ကွာန် ၇၃၃၇ တၠ ဒးဒုၚ်မံၚ်ဒုဟ်ဒဏ် နကဵုဥပဒေ ဗတိုက်သရိုဟ် ပရေၚ်ပကီုပရာတ် ၝောံပိုဒ် ၅၀(ည)၊ ၅၂(က)တံဂှ် နကဵုကဝ်မယှေန်ပၞာန် ကဵုလဝ်အခေါၚ်သက်သာ ဗၠးဒုဟ်ဒဏ် ပ္ဍဲကဵုတ္ၚဲသၟာဗ္ၚ ဂိတုမာတ် ၂ မဒှ်ရ။
တုဲပၠန် အမှုမၞုံပ္ဍဲရုၚ်သၞောဝ်ဓဝ် ၉၅၃၂ အမှု အဃောစဳရေၚ်မံၚ် ဆက်စပ်ကဵု မၞိဟ် ၁၂၄၈၇ တၠတံ ဒးဒုၚ်စောဲလဝ်အမှု နကဵုဥပဒေ ဗတိုက်သရိုဟ်ပရေၚ်ပကီုပရာတ် ၝောံပိုဒ် ၅၀(ည)၊ ၅၂(က) တံ ဂှ်လေဝ် ကၟာတ်ထောံအမှုတုဲ ဗလးကဵုလဝ်ရောၚ် ကဵုသမ္တီလလောၚ်တြးလဝ်ရ။
ဆဂး ကောန်ထံၚ်ပရေၚ်ဍုၚ်ကွာန်လ္ၚဵု မပါလုပ်မံၚ် ပ္ဍဲစရၚ် အခေါၚ်သက်သာ ဗၠးဒုဟ်ဒဏ်တံဂှ် ၜိုန်ရ ယၟုပါမံၚ်ကီုလေဝ် ဟိုတ်နူအကာဲအရာ သွက်ဂွံကလေၚ်စဴသ္ၚိဌာန်မာန်ဂှ် ဂၠံၚ်ကၟာတ်မံၚ် ဏီတုဲ ဒးဇီုကပိုက်မံၚ်ကဵု တၚ်ခက်ခုဲနာနာသာ်ရောၚ် PPNM ကဵုသမ္တီ လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – Dawei Watch