မတ်မလီု၊ မာတ် ၁၇
ပ္ဍဲတွဵုရးမန် ပွိုၚ်ဍုၚ်လ္ၚဵုဝွံ စနူမာတ် ၁၆ တုဲ ဂကောံပံၚ်ကောံ ကဝ်မယှေန်ပၞာန်ဌာနစုၚ်တံ စစၟဳစၟတ်အာ ကွဳစက်မဂၞန်စောံမတံယျဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကဝ်မယှေန်ပၞာန်ဝွံ သွက်ဂွံသုၚ်စောဲကၠေၚ်စက်အောန်န်ကေုာံ ကၠေၚ်စက် ညံၚ်ဂွံရုံဂပ်ရန်လဝ်တုဲ ပ္ဍဲတ္ၚဲမဂၞန်စောံတှ်ေ ကွဳစက်မဂၞန် အက္ခရ်စောံ၊ ပ္ဍဲတ္ၚဲမဂၞန်မတှ်ေ ကွဳစက်မဂၞန်အက္ခရ် မတံဟေၚ် ညံၚ်ဂွံဒဳစကာအာ ကွဳစက်ဂှ် ကဵုလဝ်စၞောန်ပ္ညုၚ်ရောၚ်။
သၞောတ်ဒဳကွဳစက်မဂၞန်စောံမဏအ်ဂှ် နူကဝ်မယှေန်ပၞာန် ပ္ဍဲအကြာ ဂိတုမာတ် ၇ ကဵု ၁၃ ဂှ် စၟတ်သမ္တီကဵုလဝ် အခိၚ်ကာလကဵုပညာတုဲ စနူမာတ် ၁၄ ဂှ် စရပ်စပ်ကေတ်အာအရေဝ်ရောၚ် လလောၚ်တြးလဝ်ရ။
ဂကောံပံၚ်ကောံဌာနစုၚ် ကဝ်မယှေန်ပၞာန်တံဝွံ ပါဲနူ စၟဳစၟတ်ကွဳစက် မဂၞန်စောံမတုဲ ထ္ၜးဟိုတ်ကဵုစောံမတံတုဲ ယာန်ကွဳစက် ပရေၚ်တၞဟ်ဟ်တံဂှ်လေဝ် စၟဳစၟတ်မံၚ်ကီုရောၚ် ညးဒေသ တွဵုရးမန်မွဲတၠ ဟီုရ။
“အဃောကၠောန်မံၚ် ပရေၚ်စၟဳစၟတ်ရ။ ညးတံဟီုမံၚ် One Stop Service ကီုရ။ ဟီုကၠးကၠးမ္ဂး လၟုဟ် ဟီုမံၚ်စောံမကီုလေဝ် စၟဳစၟတ်မံၚ်စောံမမွဲဓဝ် ဟွံသေၚ်ပုဟ်။ ပရေၚ်တၞဟ်တံလေဝ် စၟဳစၟတ်မံၚ်ကီုဏောၚ်။ ဍေံမိက်ဂွံသၟာန်မ္ဂး ကော်တုဲ သၟာန်လာၚ်သေန်ဒဳကွဳ၊ ဝှဳတက်ကီု နှဴကဵုအရာတၞဟ်တံတုဲ စၟဳစၟတ်မံၚ်ရလေဝ်။ ယဝ်ယောၚ်ယာအာမွဲမွဲမ္ဂး ကေတ်အရေဝ်ရ။ ညးတံဂၠာဲစမံၚ်သြန်ဏောၚ်” သာ်ဝွံ သ္ဂးရ။
တုဲပၠန် ဂကောံဌာနစုၚ်ပံၚ်ကောံ ကဝ်မယှေန်ပၞာန်တံဝွံ ထ္ၜးဟိုတ်ကဵုသၞောတ်ကွဳစက်စောံမတုဲ ဗက်စၟဳစၟတ်မံၚ် သီုကဵုလာၚ်သေန်ဒဳကွဳ၊ လာၚ်သေန်ကွဳစက် စနူတင်နင်ဆေၚ်စပ်ကဵုကွဳစက်တံဂှ် အာတ်မံၚ်သြန်ဂှ်ရ ညးဒေသတံဂှ်တှ်ေ တင်နၚ်ဍိုက်ပေၚ်မှ ဒးအာကၠုၚ်ထေက်ရောၚ် ညးဆက်ဟီုရ။
ဟိုတ်နူကဝ်မယှေန်ပၞာန် စၟဳစၟတ်မံၚ်စောံမဗီုဏအ်တုဲ ညးဒေသတံ သွက်ဂွံအာကမၠောန် စဴနူကမၠောန်၊ ပလံၚ်ကပေါတ်ကဵု စနူပရေၚ်အာကၠုၚ် ကရပ်တေံ ကရပ်ဏံဂှ်လေဝ် ဒးဆဵုဂဗမံၚ် ပရေၚ်ဝါတ်ဂါတ် မဒှ်ရ။
အတိုၚ်ကဝ်မယှေန်ပၞာန် လလောၚ်တြးလဝ်မ္ဂး သွက်ဂွံစၟဳစၟတ်ပရေၚ်ကွဳစက်စောံမဂှ် နူကဵုဌာနပရေၚ်အုပ်ဓုပ် (ထွေအုပ်) သၟဝ်တဲ ကဝ်မယှေန်ပၞာန်က္ဍိုပ်သ္ကိုပ်တုဲ ဒက်ပ္တန်လဝ်ဂကောံ One Stop Service ဂှ် ရပ်စပ်အာရောၚ် ဂွံတီကေတ်ရ။
တုဲပၠန် ယဝ်ဟွံဒဂေတ်ဗက် မၚ်မွဲအာသၞောတ်စောံမ ဖံက်ပကဝ်ကၠောန်လဝ်မ္ဂး နကဵုသၞောဝ်ရာဇာသာဒ်ဇၞော် ၝောံပိုဒ် ၁၈၈ ဂှ် ရပ်စပ်ကေတ်အရေဝ်တုဲ ဒုဟ်ဒဏ် ဒးဒုၚ်ထံၚ်မွဲဂိတု၊ ဒဏ်သြန်ၜါဠက် ကေုာံ သီုၜါသာ် ဒးဒုၚ်အာဒုဟ်ရောၚ် သ္ဂးလဝ်ရောၚ်။
ပ္ဍဲတွဵုရးမန်ဂှ် ဟိုတ်နူခုတ်စၟတ်လဝ် သၞောတ်ကွဳစက်စောံမတုဲ ပရေၚ်ကွဳစက်အာကၠုၚ် ယအ်စှ်ေအာကီုလေဝ် သွက်ဂွံဂွံကၠေၚ်စက်ဂှ် ဒးၜေတ်ရေၚ်အခိၚ်လအ်လတုဲ ဒးရာန်ကေတ်မံၚ် နကဵုအပိုၚ်အခြာရ။
ပရိုၚ် -သြၚ်လောန်တိုၚ်မ်
Photo – MOI