နေပျဳဒဝ်၊ မာတ် ၁၇
ကဝ်မယှေန်ပၞာန် စၞးဒပ်ပၞာန်သီလဝ်အဝဵု ကေုာံ ဂကောံ CRPH ကမ္မတဳသ္ပစၞးစၠတ်ဓဝ်ကၟိန်ဍုၚ် ဒက်ပ္တန်လဝ် နကဵုသွဟ်ရုဲမာဲ ၂၀၂၀ တံဂှ် ပ္ဍဲမာတ် ၁၆ မွဲတ္ၚဲဓဝ်ဂှ် ပၠံၚ်ကော်ကၠောန်ဗဒှ်မံၚ် ကောံဓရီုစၠတ်ဓဝ်အိုတ်ရ။
ကဝ်မယှေန်ပၞာန် နကဵုအမာတ်ဇၞးလဝ်မာဲတံ အခိၚ်ကၠောန်မံၚ် ကောံဓရီုစၠတ်ဓဝ်ညးဍုၚ်ကွာန် အလန်တတိယကီု လပါ် CRPH လေဝ် ကော်ကောံဓရီုစၠတ်ဓဝ်ကၟိန်ဍုၚ် အလန်နဝမ နူကဵုအန်လာၚ် (Online) ကီုရ။
ဟိုတ်နူအယုက်တာလျိုၚ် CRPH ကမ္မတဳသ္ပစၞးစၠတ်ဓဝ်ကၟိန်ဍုၚ် ဒက်ပ္တန်လဝ်နကဵုသွဟ်ရုဲမာဲ ၂၀၂၀ ပေၚ်အာ ၅ သၞာံတုဲ ပရေၚ်ကော်ကောံဓရီုစၠတ်ဓဝ်ဗီုဏအ်ဂှ် လုပ်မံၚ်သၞောဝ်ဟာ သွက်ဂွံဒးသၟာန်ပုစ္ဆာ ဒှ်မံၚ်ရ။
အဝဵုညးဍုၚ်ကွာန် မအပ်ပြာပ်လဝ်တံဂှ် သွက်ဂွံထပ်သ္ပအာဒတန် မဒှ်တုဲ ဒှ်အရာသွက်ဂွံမၚ်မွဲစဵုဒၞာအာ ဒဳမဝ်ကရေသဳရောၚ် ဥက္ကဋ္ဌ CRPH ဥူအံၚ်ကျဳညောအ် ဟီုလဝ် ပ္ဍဲကဵုကောံဓရီု စၠတ်ဓဝ်ကၟိန်ဍုၚ် ဂှ်ရ။
တုဲပၠန် ဆက်ကေမ်ဇျှာပ်ရပ်လဝ် အဝဵုညးဍုၚ်ကွာန် မအပ်ပြာပ်လဝ် ကေုာံ ပရေၚ်စၟတ်သမ္တီလုပ်သၞောဝ် နူဂကောံဂၠးကဝ်တံဂှ်တုဲ သွက်ဂွံစိုပ်အာ တၚ်ရန်တၟံတံမာန်ဂှ် နကဵုကဏ္ဍစၠတ်ဓဝ် ဆက်တုဲ ဂစာန်အာရောၚ် သ္ဂးလဝ်ရ။
လပါ်ကဝ်မယှေန်ပၞာန် အခိၚ်ဂစာန်မံၚ် သွက်ဂွံဂွံပရေၚ်သ္ပစၟတ်သမ္တီ ဂၠးကဝ် နကဵုစၠတ်ဓဝ်အလီတံဂှ် ဒးကလေၚ်ပ္လန်အာရောၚ် သမ္မတယာယဳ အလဵုအသဳညဳသၟဟ်ဂကူ NUG ဒူဝါလယှဳလ ဟီုလဝ်ရ ။
သွက်ဂွံထမံက်ပတိတ်အာ စၠတ်ဓဝ်ကိတ်ညဳကဵုကာလပၠန်ဂတးဂှ် နွံပၟိက်မံၚ်တုဲ စွံသတိကဵုအကာဲအရာ အခိၚ်အခါတံတုဲ သွက်ဂွံကၠောန်အာ စၠတ်ဓဝ်နတဲစှ်ေစှ်ေမာန်ဂှ် ဗ္တိုက်ဖ္အောဝ်လဝ်ကီုရ။
သွက်ဂွံထမံက်အာရုပ်ရဴ ဗီုပြၚ်ကံၚ်သဳပၠတရဴဖိတ်ဒရေဝ် ဒဳမဝ်ကရေသဳမာန်ဂှ် ဖျေံလဝ်တမ် ကဵုလဝ်အခိၚ် ပံၚ်တောဲအာကဵု ဂကောံရပ်လွဟ်ကောန်ဍုၚ်အရၚ်တံဗွဲမဂၠိုၚ်တုဲ ဂိုတ်ဂစာန်မံၚ်ရောၚ် သမ္မတယာယဳ ကဵုဏာသမ္တီရ။
ပ္ဍဲကဵုဖေဖော်ဝါရဳလောန်ကၠုၚ်ဏံဂှ် နူ NUG သဳကၠဳလဝ် သွက်ဂွံထမံက်အာဗီုပြၚ် ပရေၚ်ပံၚ်ကောံပၠတရဴ ဂကောံရပ်လွဟ်ကောန်ဍုၚ်အရၚ်တံတုဲ စပ်ကဵုကိစ္စပရေၚ်ပၞာန်၊ ပရေၚ်ဍုၚ်ကွာန်တံဂှ်လေဝ် သဳကၠဳလဝ်ကဵု ဒပ်ပံၚ်ကောံမဟာမိတ်တမ်က္ညၚ် SRA တံရောၚ် လလောၚ်တြးလဝ်ပရိုၚ်ရ။
အခိၚ်လၟုဟ်မ္ဂး အကြာဇကုကဵုဇကု သွက်ဂွံပံၚ်တောဲရေၚ်တၠုၚ်အာ နကဵုပရေၚ်ဓဝ်ကၠိုဟ်ခၠၚ်နွံနွံဂှ် ဒှ်အခိၚ်ကိစ္စဇၞော်အိုတ်စိုပ်ကၠုၚ်မံၚ်တုဲ အတိုၚ်ကဝ်မယှေန်ပၞာန်ကၠောန်ကၠုၚ်မံၚ် ကိက်ညဳကဵုအခိၚ်ဂှ် သွက်ဂွံ ပလီုပလာ်ပါ်ဒကးပြးအာ ပရေၚ်ပံၚ်ကောံမာန်တုဲ ဒးမၚ်မွဲစွံအာသတိဇၞော်ဇၞော်ရောၚ် သ္ကိုပ်ဝန်ဇၞော် NUG မာန်ဝေန်ခိုၚ်တာန် ဟီုရ။
ယန္တရာသွက်ဂွံပၠတရဴ အလုံပၠန်ဂတးမွဲစောံမာန်ဂှ် မံက်ဂတဝ်ကၠုၚ်ပြဟ်ဟ်မှ ပ္ဍဲကဵုမုက်ဂၠးကဝ် သီုကဵုကုလသမဂ္ဂတံမ္ဂး သ္ပစၞးနကဵု ပရေၚ်ပံၚ်ကောံခိုၚ်ၚ်မာန်ရောၚ် ပတှ်ေကေတ်ရ သာ်ဝွံ အမာတ်ကလုတ် ဥူကျဝ်မိုဝ်ထောန် ညးစၞးတာလျိုၚ်လၟိုန် ကုလသမဂ္ဂ ကဵုလဝ်ကသပ်ရ။
မွဲလပါ်ပၠန်မ္ဂး ဂကောံဇြဟတ်ပၠန်ဂတးကေုာံ ဂကောံဂၠးကဝ်တံညာတ်လဝ် ပရေၚ်ပေါဲရုဲမာဲအလီ ဒပ်ပၞာန်ကၠောန်လဝ်ဂှ် ကြဴနူသီအဝဵု ၅ သၞာံတုဲ ကလေၚ်ပံက်ကၠုၚ်ပါ်တြၚ်စၠတ်ဓဝ် ကၟာတ်လဝ်တံဂှ်ယျ။
ဟိုတ်နူပၞာန်သီအဝဵုတုဲ သဇိုၚ်သၞောဝ်ဥပဒေ ၂၀၀၈ ဂှ် ဒှ်မံၚ်ဆၜိုတ် တၞးလိက်စိုက်က်မွဲရဏောၚ် အကြာဂကောံဇြဟတ်ပၠန်ဂတးတံ ဟီုမံၚ်ကီုလေဝ် နကဵုသၞောဝ်ဂှ်ဟေၚ် ကဝ်မယှေန်ပၞာန်ဂစာန်မံၚ် သွက်ဂွံထမံက်အယောၚ်အလာ တၠုၚ်လအာပရေၚ်ဍုၚ်ကွာန် တၟိရောၚ်။ နူကဵုကောံဓရီုစၠတ်ဓဝ်ညးဍုၚ်ကွာန် အလန်တတိယ ကၠောန်ဗဒှ်လဝ် ပ္ဍဲဂိတုမာတ် ၁၆ ဂှ် ညးစၞး နူဗော်ပျဳခိုၚ်ဖျိုဝ် ဓယံက်ဒပ်ပၞာန် ၃ တၠ ဒးဒုၚ်ရုဲစှ်လဝ် နဒဒှ် သဘာပတိစၠတ်ဓဝ်၊ ဥက္ကဋ္ဌ ကေုာံ ဒုတိယဥက္ကဋ္ဌ တံရ။
ပြိုၚ်ပကာန် ဂွံမာဲထံက်ဂလာန်ဂၠိုၚ်အိုတ်တုဲ နဒဒှ် သဘာပတိစၠတ်ဓဝ် ညးဍုၚ်ကွာန် ဒံက်တာနန္ဒကျဝ်စွာ ဒးဒုၚ်ရုဲစှ်လဝ်ကီုလေဝ် ဥက္ကဋ္ဌစၠတ်ဓဝ် ဥူခေန်ယဳ ကေုာံ ဒုတိယဥက္ကဋ္ဌ ဥူမိုၚ်မိုၚ်အုၚ် တံဂှ်တှ်ေ ညးပြိုၚ်ပကာန်ဟၟဲ ဇၞးကေတ်လဝ်အိုတ်ရ။ ဥူခေန်ယဳဝွံ ဂွံအခေါၚ်ဇၞူကမၠောန် နူဒပ်ပၞာန် နကဵုတာလျိုၚ် ဒုသ္ကိုပ်ပၞာန်တုဲ ပ္ဍဲလက်ထက်တၠအဝဵုတြေံ ဥူတာန်ယှိုဲဂှ် ကေတ်လဝ်တာလျိုၚ် ဂဥုပ်ဗၠာဲသၟိၚ်ကီု ပ္ဍဲလက်ထက်အလဵုအသဳ ဥူတိၚ်သိၚ်ဂှ်လေဝ် ကေတ်လဝ်တာလျိုၚ် ဝန်ဇၞော်ပရေၚ်ထိၚ်ကြာပ်ကောပ်ကာဲ လုပ်ဍုၚ်(လဝက) ရ။
သၞာံ ၂၀၂၁ ပၞာန်သီအဝဵုတုဲဂှ် နကဵုဝန်ဇၞော်ပရေၚ်ထိၚ်ကြာပ်ကောပ်ကာဲလုပ်ဍုၚ်(လဝက) ကဝ်မယှေန်ပၞာန်ဂှ် သ္ကိုပ်ပၞာန်ဇၞော် ကလေၚ်ခါန်ကၞက်လဝ်တာလျိုၚ်ရ၊ သၞာံ ၂၀၂၂ ဂိတုအဝ်ဂတ်ဂှ်တှ်ေ ကဵုဒေါအ်ဇူလဝ်နူတာလျိုၚ်တုဲ ပ္ဍဲအံက်တဝ်ပါ ပ္ဍဲအရာပရေၚ်ပြံၚ်လှာဲတာလျိုၚ် က္ဍိုပ်သ္ကိုပ်ဗော်ပျဳခိုၚ်ဖျိုဝ်ဏံဂှ် ဥူခေန်ယဳ ဒှ်ကၠုၚ်ဥက္ကဋ္ဌဗော်ရ။
ပရေၚ်ပြံၚ်လှာဲတာလျိုၚ် အဆံၚ်က္ဍိုပ်သ္ကိုပ်ဗော်ပျဳခိုၚ်ဖျိုဝ်တံဂှ်တှ်ေ သွက်ဂွံထမံက်အာရုပ်ရဴ သွပ်လ္ပအ်သမ္မတ ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ်ရောၚ် သာ်ဝွံ ညးလ္ၚတ်ပရေၚ်ဍုၚ်ကွာန်တံ သ္ၚဳဂၠိပ်လဝ်နူအခိၚ်တေံရ။
နကဵုက္ဍိုပ်သ္ကိုပ်ပၞာန် ကေတ်ကၠုၚ်လဝ်တာလျိုၚ် ဂဥုပ်ဒပ်ပၞာန် ၁၅ သၞာံ ကၠောန်လဝ်ပေါဲကလေၚ်သ္ၚဳဂၠိပ်ဂှ်မ္ဂး ဒှ်အယောၚ်အလာ သွက်ဂွံဒေါအ်ဇူ နုက်တိတ်နူတာလျိုၚ်တုဲ သွက်ဂွံဆက်ထိၚ်အာအဝဵုဂှ် အကာဲအရာသွက်ဂွံဒှ်သမ္မတ ဂၠိုၚ်မံၚ်ရောၚ် သာ်ဝွံ ဟီုဂးမံၚ်အိုတ်ရ။
ပရိုၚ် – သြၚ်လောန်တိုၚ်မ်
Photo – Social Media