သဓီု၊ မာတ် ၂၀
ပ္ဍဲတွဵုရးမန် ပွိုၚ်ဍုၚ်သဓီုဂှ် ဂကောံဌာနပံၚ်ကောံကဝ်မယှေန်ပၞာန်တံ ရပ်ပဝ်တာသၟတ်ဗၠာဲဒေသတံတုဲ ပရေၚ်ဘပဠ ပယျာတ်ဓရတ်အာတ်မံၚ်သြန်တံ ဆက်တုဲကၠောန်မံၚ်ရောၚ် ညးလ္တူဍုၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ရပ်မံၚ်သၟတ်ဗၠာဲတံဟၟဲကဵုသၞောဝ်တုဲ ညးအာတ်ဓရတ်မံၚ်သြန်ဂှ်တှ်ေ ကောန်ဂကောံပရေၚ်အုပ်ဓုပ်ပွိုၚ်ဍုၚ်သဓီု သ္ကိုပ်ဗိုလ် သာန်ဝေန်အံၚ်၊ ဂဥုပ်ဒပ်ဗၠာဲသၟိၚ်ခရိုၚ်သဓီု ဒုသ္ကိုပ်ဗၠာဲသၟိၚ်ဇၞော် မျေအ်နိုင်၊ သ္ကိုပ်ပရေၚ် အုပ်ဓုပ်ပွိုၚ်ဍုၚ်ကဵု သကိုပ်ဒပ်မၚ်ကွာန် ဖိုဝ်ထူတံ က္ဍိုက်ပ်ကၠောန်မံၚ်ရောၚ် သ္ဂးရ။
အတိုၚ်ညးမံၚ်လတူဍုၚ်တံဟီုမ္ဂး ဂိတုဏအ် ပ္ဍဲပွိုၚ်ဍုၚ်သဓီု သၟတ်ဗၠာဲ ဟွံအောန်နူ ၃၀ တၠ ဒးဒုၚ်ရပ်ပဝ်တာတုဲ အပ္ဍဲဏံ သီုကောန်သ္ၚိကၟိန် သၞာဲဒါဌာနနာနာတံ ပါလုပ်မံၚ်ရောၚ် ဂွံတီရ။
အပ္ဍဲပရေၚ်ကဝ်မယှေန်ပၞာန် ရပ်ပဝ်တာအာတ်ဓရတ်မံၚ်သြန်ဏံဂှ် သီုကဵုကောန်ဇာတ် သ္ၚိကၟိန်သၞာဲဒါတံလေဝ် ပါလုပ်အာဂှ်ရ ရဲအပ္ဍဲဌာနတံ ပရေၚ်ဟွံပေၚ်စိုတ် မၞုံမံၚ်ရောၚ် ဂးရ။
ကောန်ဂကောံပရေၚ်အုပ်ဓုပ် ပွိုၚ်ဍုၚ်သဓီုတံ ၜိုန်ရ ရပ်ညးဍုၚ်ကွာန်တံတုဲ ဓရတ်အာတ်မံၚ်သြန်ကီုလေဝ် ပရေၚ်ဒးဒုၚ်ကေတ်အရေဝ် ဟၟဲဂှ်ရ ပဵုတုဲဂံၚ်ကၠုၚ်မံၚ်၊ သီုကဵုညးဆေၚ်စပ်ဌာနတံလေဝ် ဟွံသှ်ေ ဒးဒုၚ်အာတ်ရပ်ဓရတ်မံၚ်သြန်အိုတ် သ္ဂးရ။
ပ္ဍဲကဵုညးဒးဒုၚ်ရပ်ပဝ်တာတံဂှ် မွဲတၠမ္ဂး သြန် ၁၀၀ ကိုတ်ဒကေဝ်ပြၚ် အာတ်မံၚ်တုဲ သၟတ်ဗၠာဲကဵုသြန်ဟွံမာန်တံဂှ်တှ်ေ စုတ်ဏာဒၞာဲပကောံကောန်ပၞာန် သွက်ဂွံယိုက်ဝန်ပၞာန်တံရောၚ်။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် ပကောံလဝ်မ္ဂး ပ္ဍဲတွဵုရးမန် ကဝ်မယှေန်ပၞာန်ပံက်ကၠုၚ်မံၚ် တန်ဗတောန်ယိုက်ဝန်ပၞာန် နူလၟေၚ် ၁ စိုပ်လၟေၚ် ၂၂ ဂှ် သၟတ်ဗၠာဲလုပ်အဝေါၚ်ယိုက်ဝန်ပၞာန် ဟွံအောန်နူ ၄၅၀၀ တၠ ဒးဒုၚ်စုတ်ပကောံဏာလဝ် နဒဒှ်ကောန်ပၞာန်တံရ။
ပရိုၚ် – သြၚ်လောန်တိုၚ်မ်
Photo – CJ