ဍာ်ဗု၊ မာတ် ၂၂
ပ္ဍဲရးတနၚ်သဳ ပွိုၚ်ဍုၚ်ဍာ်ဗု ကွာန်ဍာ်တူဂှ် ပ္ဍဲမာတ် ၂၀ ဏအ် ဟိုတ်နူဒးဘဲလွဟ်ဇၞော်တုဲ အပါကဵုကောန်သၟတ်ဗြဴ ၂ တၠ ချိုတ်အာလဝ်နွံ နူကဵု ဌာနပရေၚ်ဆက်ဆောံကဵုလလောၚ်ပရိုၚ် KNU ခရိုၚ်ဗိက်-ထဝါဲ ပ္တိတ်လဝ်လိက်လလောၚ်တြးရ။
ပ္ဍဲကဵုမာတ် ၂၀ အခိၚ်တ္ၚဲစေၚ် ၂ နာရဳဂှ် နူကဵုကရောၚ်ပၞာန်ပံၚ်ကောံကဝ်မယှေန်ပၞာန် ဖျေံစွံလဝ်ဒပ် ပ္ဍဲကွာန်ဍာ်တူတြေံဂှ် ပန်ပ္တိတ်လွဟ်ဇၞော် လပါ်ကွာန် ၁၀ မပြၚ်နွံရောၚ် ဂးလဝ်ရ။
ပေါဲဗတိုက် ကတဵုဒှ်လဝ်ဟၟဲကီုလေဝ် နူကရောၚ်ပၞာန်တံ ပန်ခြော်မံၚ်လွဟ်ဇၞော်ကြာန်န်တုဲ ဒတုံစှ်ေဒးဗဒါဲသ္ၚိ ညးဍုၚ်ကွာန်တံတုဲ အပါကဵုကောန်ဗြဴၜါတၠ ဒးချိုတ်အာလဝ် သာ်ဝွံ ညးတာလျိုၚ်လလောၚ်ပရိုၚ် KNU ခရိုၚ်ဗိက်-ထဝါဲ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဟိုတ်နူဒးအာဘဲလွဟ်ဇၞော်တုဲ အပါအယုက် ၄၀ သၞာံပြၚ် ကေုာံကောန်ဗြဴ အယုက် ၁၄ သၞာံတံ ချိုတ်အာတုဲ ကောန်တြုံမွဲဂှ်တှ်ေ ဒးလဝ်ဝပ်နွံမံၚ် သ္ဂးရ။
လွဟ်ဇၞော်ကရောၚ်ပၞာန် ကဝ်မယှေန်ပၞာန်တံပန်လဝ်တံဂှ် ဒတုံစှ်ေလဝ်အကြာဗွိုၚ်ပွဳပွူကွာန်သၟးတုဲ ပေါဲဗတိုက်ဟွံဒှ်တုဲ ညးကွာန်တံထောံဌာန်ဒၞာဲဝါဲတုဲ ဂြိပ်ပါဲအာလဝ် ဟၟဲဏီရောၚ် ဂွံတီကေတ်ရ။
ပ္ဍဲကရပ်ကွာန်ဍာ်တူ၊ ကြုၚ်ဗရာၚ်၊ သာယာမန် တံဂှ် ဒပ်ပံၚ်ကောံဒပ်ပၞာန်ဗၠးၜးကောန်ဂကူကရေၚ် KNLA တံ ချဳဒရာၚ်မံၚ်ပရေၚ်ပၞာန် နွံတုဲ ကရောၚ်ပၞာန်ကဝ်မယှေန်ပၞာန်တံ ဒၟာနူလုပ်ကၠုၚ်မံၚ်ကွာန် မွဲဏှမွဲဏှတုဲ ပေါဲဗတိုက်ကတဵုဒှ်မံၚ်လေဝ် နွံကီုရ။
ပ္ဍဲဖေဖော်ဝါရဳ ၁၉ လောန်ကၠုၚ်ဏအ်လေဝ် ပ္ဍဲကွာန်ဍာ်တူ ပွိုၚ်ဍုၚ်ဍာ်ဗုဏံဂှ် ကောန်ကွာန်ဒှ်မံၚ်ယဲစိုတ်မွဲတၠ ဇီုဒးမုက်ကဵု ကရောၚ်ပၞာန် ကဝ်မယှေန်ပၞာန်တုဲ ဒးဒုၚ်ပန်ဂစိုတ်လဝ်ရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
Photo – Social Media