တယိတ်ချံၚ်၊ မာတ် ၂၂
ပ္ဍဲရးတနၚ်သဳ ပွိုၚ်ဍုၚ်တယိတ်ချံၚ် ကရပ်ကွာန်သၞေဟ်ဟနိဂှ် ပေါဲဗတိုက်ၜါလပါ်ကတဵုဒှ်မံၚ် ဗွဲမသကာတ်မြဟ်တုဲ လပါ်ကဝ်မယှေန်ပၞာန် နူဗလးကျာ ဆက်တုဲပန်ရီုမံၚ်ကဵုရောၚ် နူဂကောံဇြဟတ်ပၠန်ဂတးတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စပ္တံနူဂိတုမာတ် ၁၇ လောန်ကၠုၚ်ဏအ်တုဲ ကောန်ဒပ်ကဝ်မယှေန်ပၞာန် ကလေၚ်ဆုတ်တိတ်ကၠုၚ် နူဗ္ဒိုပ်ဝင်ဝကီု ကရောၚ်ပၞာန် ရီုဗၚ်ကၠုၚ်ဒုၚ်တံဂှ်ကီု ဂကောံဇြဟတ်ပၠန်ဂတးတံ ကၟာတ်ဆိုအ်လဝ်တုဲဗတိုက်မံၚ်ရ။
ဟိုတ်နူပရေၚ်ပေါဲဗတိုက်ဏံဂှ် အကြာၜါလပါ် ပေါဲဗတိုက်ဆက်ကတဵုဒှ်အာမံၚ် ဇၟာပ်ပ်တ္ၚဲတုဲ ပ္ဍဲမာတ် ၂၀ ဂှ် လပါ်ကဝ်မယှေန်ပၞာန်တံ နူဗလးကျာကၠုၚ်ကြဳဖျေံလဝ်ဗုမ် ၁၀၀ မပြၚ်နွံရောၚ် သ္ဂးရ။
ပ္ဍဲအရာကဝ်မယှေန်ပၞာန် ကြဳဗုမ်နူဗလးကျာဂှ် အကာဲအရာချိုတ်ဒးဝပ်ၜါလပါ် ချိုတ်တ်ပၠိုတ်တ်ဟွံတီဏီကီုလေဝ် ခြာဟွံလံ သွက်ဂွံလလောၚ်တြးကဵုပရိုၚ်နွံရောၚ် ဂးရ။
ဒပ်ကဝ်မယှေန်ပၞာန်တံ ဒဵုကဵုအခိၚ်လၟုဟ် ဆက်ဒးဒုၚ်ကၟာတ်ဆိုအ်လဝ် ပ္ဍဲကွာန်သၞေဟ်ဟနိဏီတုဲ ပရေၚ်ချိုတ်၊ဒးဝပ် ဂၠိုၚ်မံၚ်ရောၚ် ညးတာလျိုၚ်ဂကောံဇြဟတ်ပၠန်ဂတးဒေသတံ ဟီုရ။
ပ္ဍဲကဵုမာတ် ၁၁ လောန်ကၠုၚ်ဏအ်ဂှ် ဗ္ဒိုပ်ပၞာန်ဝင်ဝ ကၠုၚ်ဖျေံလဝ်ဒပ် ၃၀ သၞာံပြၚ် ပ္ဍဲကွာန်မေန်ဒါတ် ပွိုၚ်ဍုၚ်တယိတ်ချံၚ်ဂှ် ဂကောံဒပ်ပံၚ်ကောံမဟာမိတ်ပၠန်ဂတးတံ ဗတိုက်သီဂွံလဝ်သီုအလုံဖအိုတ်ရောၚ်။
ပ္ဍဲပေါဲဗတိုက် သီဗ္ဒိုပ်ဝင်ဝ ဒးကေတ်လဝ်အခိၚ် ကြပ်စိုပ်ပွိုၚ်မွဲဂိတုဏံ လပါ်ကဝ်မယှေန်ပၞာန်ဂှ် ဗိုလ်ဇၞော်ပန်တၠကီု သီုဖအိုတ်ကောန်ဒပ် ၅၀ တၠပြၚ် ချိုတ်အာလဝ်နွံရဂှ် ဗော်သွးကောန်ဂကူ ကရေၚ် KNU ပ္တိတ်လဝ်လိက်လလောၚ်တြးရ။
ပရိုၚ် – သြၚ်လောန်တိုၚ်မ်
Photo – PDF