ၜၚ်ကံက်၊ အေဗရာ ၄
သွက်ပတိတ်ပရဲ သွံကဵုကၠေၚ်င္ၚုဟ်ဂၠိုၚ်လောန်ကာဲအာတုဲ သ္ကိုပ်ဝန်ဇၞော်သေံ အနုတေန် တင်လဝ်ဒုဟ် လ္တူသၟာဗၞိက်ညးသွံရာန်ကၠေၚ်တံတုဲ အရာကၠေၚ်ဍေၚ်ပိုတ်အိုတ်အာဒှ်မံၚ်ဏံဂှ် ဟိုတ်နူရဲရာန်ပကောံလဝ်တံကဵု ရဲပလံၚ်ပ္တိတ်မံၚ်ဍုၚ်သအာၚ် နကဵုနဲကဲဖျာဒမၠုတံရောၚ် ပ္ဍဲဂိတုအေဗရာ ၃ ဂှ် တင်ဒုဟ်ဟီုစောဲစပ်လဝ်ရ။
ပွမရာန်ပကောံလဝ်ကၠေၚ်ဍေၚ်တံ၊ ပရေၚ်သွံစကၠေၚ်ဒမၠုပၞုက် သွက်ဍုၚ်ဇိုၚ်ဝုတ်ဒိုဟ်တံဂှ် ညးတာလျိုၚ်တံ စၟဳစၟတ်ဆဵုညာတ်လဝ်နွံမံၚ် သ္ကိုပ်ဝန်ဇၞော် အနုတေန် သ္ဂးရ။
ဟိုတ်နူပြသၞာဂှ်တုဲ င္ၚုဟ်ကၠေၚ်ဍေၚ်တံ ဆက်သၠုၚ်တိုန်ကၠုၚ်မံၚ်ဂှ် နူကဵုအလဵုအသဳ ဒးအိုတ်လဝ်သြန်ၜါတ် ၅၀ ဗဳလဳယာန် (ဒဝ်လာအမေရိကာန် ၁ ဒသမ ၄ ဗဳလဳယာန်) နွံမံၚ် သ္ကိုပ်ဝန်ဇၞော်သေံ ဟီုကၠုၚ်ရ။
ပ္ဍဲအကြာပြသၞာကၠေၚ်ဍေၚ်ဂၠးကဝ်ဂှ် ပရေၚ်သွံရာန်ဖျာဒမၠုပၞုက် ကေုာံ အရာမရာန်ပကောံလဝ်တံဂှ် ဒှ်ဟိုတ်ပရူပရာစတမ် အရာကၠေၚ်ဍေၚ်ဂွံအိုတ်ပိုတ်အာ အလုံမွဲဍုၚ်ရောၚ် သ္ဂးလဝ်ကီုရ။
နူကဵုအဆံၚ်ဇၞော်ဇၞော် စဵုကဵုအဆံၚ်လဒေါဝ်တံ အရာရဲပတိတ်ပရဲ သွက်ဂွံသွံင္ၚုဟ်ဟလိုန်ပတိုန်တံ ရာန်ပကောံလဝ်ကၠေၚ်ဍေၚ်တံဂှ် သီုကဵုဂၠံၚ်တိုက် သီုကဵုဂၠံၚ်ဍာ် ဂွံဆဵုမံၚ်ရောၚ် ညးတေံဟီုရ။
ကၠေၚ်ဍေၚ်ဒးစိုပ်ကၠုၚ်နူဂၠံၚ်ဍာ်တံဂှ်လေဝ် ပ္ဍဲအခိၚ်မစၟတ်လဝ်ဂှ် ဟွံစိုပ်ကၠုၚ်တုဲ ရဲသွံကၠေၚ်တံ ပတိုန်မံၚ်င္ၚုဟ်တုဲ သွံမံၚ်အိုတ်ရောၚ် အနုတေန် ဟီုရ။
ပ္ဍဲအရာပလံၚ်ဗစိုပ်မံၚ် ပ္ဍဲကဵုဂၠံၚ်ၜဳလ္ပာ်သၠုၚ်ကျာဍုၚ်သေံဂှ် ကၠေၚ်ဍေၚ် ၅၇ ပြကောဋိကိုတ်လေတ်ပြၚ် ကၠေံအာတုဲ၊ ပရူပရာဏံဂှ် နကဵုဌာနစၟဳစၟတ်တၟေၚ် စွံအဓိကကၠာတုဲ စၟဳစၟတ်မံၚ်ရောၚ် သ္ကိုပ်ဝန်ဇၞော် ဟီုရ။
ပ္ဍဲအခိၚ်ပေါဲပၞာန်ဒေသလဒေါဝ်ဗၟံက် သ္ကာတ်ထတ်ကၠုၚ်မံၚ်ဂှ် ပ္ဍဲဍုၚ်သေံ င္ၚုဟ်ကၠေၚ်ဍေၚ်တံ သၠုၚ်တိုန်မံၚ် စိုပ်အာအဆံၚ်သၞောတ်ဗ္ၜတ် ဒးသ္ပလဝ်စၟတ်သမ္တီရ။
Ref:AFP