ဟာဗာနာ၊ အေဗရာ ၅
ပ္ဍဲကဵုအခိၚ်ဒးဂဗဆဵုမံၚ်ကဵု ဇြဟတ်ဟရိုဟ်အမေရိကာန် ဆက်က်ဂှ် အလဵုအသဳကျူပါ ကဵုအခေါၚ်ဗၠးဒုဟ်ဒဏ် ကောန်ထံၚ် ၂၀၁၀ တၠ မဒှ်ရ။
နူကဵုထံၚ်လာလဳမာ လ္ပာ်ဗၟံက်ဍုၚ်ဟာဗာနာဂှ် ကောန်ထံၚ် ၂၀ ပြၚ် ဗၠးတိတ်ကၠုၚ်တုဲ ညးကၠုၚ်မၚ်မံၚ် မွဲအခိၚ်ဂယး ကလောမသကောဒေံတံဂှ် ဆက်ဂလာန်မိန်ဗန်တက်မံၚ်ကျာအိုတ်ရ။
အပ္ဍဲညးမဗၠးတိတ်ကၠုၚ်တံဂှ် ကောန်ဍုၚ်သအာၚ်တံ၊ သၟတ်တံ၊ ညးဗြဴတံ ကေုာံ ညးအာယုက် ၆၀ ပြၚ်တံ ပါလုပ်မံၚ်ရောၚ် ပ္ဍဲလိက်လလောၚ်တြး ရုၚ်ကလုတ်အမေရိကာန် နွံဍုၚ်ကျူပါ ဂိတုအေဗရာ ၂ ဂှ် ဗၟံက်ထ္ၜးလဝ်ရ။
ကြဴနူကလေၚ်စိုပ် သ္ၚိဗတာင်ဗုတုဲ သွက်ဂွံပြံၚ်သၠာဲထောံ က္ဍိုပ်သ္ကိုပ်ကောန်မျူနေတ်ကျူပါဂှ် သမ္မတအမေရိကာန် ဒဝ်နယ်ထရ နွံမံၚ်ပၟိက်ဆန္ဒရောၚ် ဗၟံက်ထ္ၜးလဝ်ရ။
ဟိုတ်နူကၟာတ်ဆိုအ်လဝ် ပရေၚ်ပလံၚ်ကၠေၚ်ဍေၚ် ကုဍုၚ်ကျူပါတုဲ ပြသၞာကၠေၚ်ဍေၚ်ပိုတ်အာလဝ် ဗွဲမသ္ကာတ်မြဟ် ကေုာံ ပရေၚ်ဓါတ်ပၟတ်လလဳပိုတ်အာ အလုံမွဲဍုၚ်တံ ကတဵုဒှ်မံၚ်ရ။
ပ္ဍဲသတ္တဟတုဲကၠုၚ်တေံ ၜၚ်ဖ္ဍိုက်ကၠေၚ်ရတ်ယှာမွဲမ ဖ္ဍိုက်နၚ်ကၠေၚ်ဍေၚ်အရိုၚ် ၇၃၀၀၀၀ စေဝ်ဗေၚ်တုဲ ကြဴနူဂိတုဂျာန်နဝါရဳတေံဂှ် စိုပ်ကၠုၚ်သၞေဟ်ကျူပါ နဒဒှ်အလန်ကၠာအိုတ်ရ။
နကဵုရတ်ယှာဂှ်တှ်ေ သ္ပဟိုတ်ကဵုပရေၚ်ဓရ်ဗ္စာရဏာမၞိဟ်တုဲ ပလံၚ်ကဵုကၠေၚ်ဍေၚ် ကုကျူပါရောၚ် ဟီုလဝ်တုဲ နကဵုထရ ဂှ်လေဝ် ပြသၞာဟၟဲပုဟ် သ္ဂးလဝ်ရ။
ပ္ဍဲကျူပါဂှ် ကောန်ထံၚ်ပရေၚ်ဍုၚ်ကွာန် လၟိဟ်ကဵုကၠံပြၚ် ဒးဒုၚ်ရပ်ထိၚ်လဝ်ရောၚ် ဂကောံအခေါၚ်အရာမၞိဟ်တံ ဟီုရ။
ညးပါ်ပါဲလ္တူအလဵုအသဳတံဂှ် ဒးဒုၚ်ပလီုပထုဲစောဗကစသၟးဟွံက သီုကဵုဒးဒုၚ်ရပ်ချုက် နကဵုတင်စောဲစပ်ဒုဟ် အမှုရာဇဝတ်တံရ။
စပ်ကဵုအကာဲအရာ ပရေၚ်ထတ်ယုက် ကောန်ထံၚ်တံ၊ အရာမံၚ်စံၚ်မၞုံကဵုဒဂေတ်ပဋိပတ်ခိုဟ်ပ္ဍဲထံၚ် ကေုာံ အကာဲအရာယိုက်ဂၠေၚ်လဝ်ဒုဟ်ဒဏ်ဗွဲမဂၠိုၚ်တုဲတုဲတံဂှ် သ္ပသ္ဇိုၚ်တုဲ ကဵုလဝ်အခေါၚ်ဗၠးဒုဟ်ဒဏ်ရောၚ် ရုၚ်ကလုတ်ကျူပါ ဟီုရ။
ပ္ဍဲအခိၚ်ကာလပေါဲပရေၚ်ဘာသာ ကြပ်ကၠုၚ်ဂှ် ကဵုအခေါၚ်ဗၠးဒုဟ်ဒဏ် လ္တူကောန်ထံၚ်တံနွံမံၚ်တုဲ ပ္ဍဲကျူပါဂှ် ယဝ်ရကြပ်ကဵုတ္ၚဲဗီုဏံမ္ဂး ကဵုအခေါၚ်ဗၠးဒုဟ်ဒဏ် ကုကောန်ထံၚ်တံလေပ်မံၚ်ရ။
ကြဴနူ အမေရိကာန် လုပ်ရပ်ဏာ သမ္မတဗေန်နဳဇဲလာ မာဒူရို တုဲ အရာမအာတ်မိက် သွက်ဂွံကဵုအခေါၚ်ဗၠးဒုဟ်ဒဏ် ညးဒးဒုၚ်ဖျေံထံၚ်ပရေၚ်ဍုၚ်ကွာန်တံဂှ်တုဲ ပ္ဍဲဗေန်နဳဇဲလာလေဝ် ညးဒးဒုၚ်ဖျေံထံၚ်ဗွဲမဂၠိုၚ် ဗၠးတိတ်ကၠုၚ်နွံရ။
နူကဵုဗေန်နဳဇဲလာဂှ် ထံက်ပၚ်ကဵုမံၚ်ကၠေၚ်စက် ကုကျူပါတုဲ ကြဴနူဂှ် ဟိုတ်နူပရေၚ်ကၟာတ်ဆိုအ်အမေရိကာန်တုဲ ပ္ဍဲကျူပါ ကၠေၚ်ဍေၚ်ပိုတ်အာအိုတ်ရ။
ဟိုတ်နူပေါဲပၞာန်အဳရာန်တုဲ ပြသၞာကၠေၚ်ဍေၚ်ကျူပါ ဟုတ်စှ်ေအာဇၞော်ကဵုဇြဟတ်ဂှ် ရတ်ယှာပလံၚ်ကဵုကၠေၚ်ဍေၚ် သွက်ဍုၚ်ကျူးဘားဂှ် အမေရိကာန် ကဵုလဝ်အခေါၚ်ရောၚ်။
Ref:BBC