နေပျဳဒဝ်၊ အေဗရာ ၁၈
အပ္ဍဲအခိၚ်အတးသင်္ကြာန် ကၠောံသၞာံဍုၚ်ဗၟာဏံဂှ် ကဵုလဝ်အခေါၚ်ဗၠးဒုဟ်ဒဏ် ကုသမ္မတဍုၚ် ဥူဝေန်မျေတ်တုဲ က္ဍိုပ်သ္ကိုပ်မှာဇန်ညးဍုၚ်ကွာန် ဒဝ်အံၚ်သာန်သုကျဳဂှ်တှ်ေ ယှအ်ဖျေံကဵုဒဏ်ထံၚ်ညိညဓဝ်တုဲ သွက်ဂွံစွံ အရာထိၚ်ချုက်အပ္ဍဲသ္ၚိရောၚ် ပရိုၚ်မံက်တိတ်ကၠုၚ်မံၚ်ရ။
အတိုၚ်အမိၚ်လလောၚ်တြး နူရုၚ်သမ္မတ ဥူမေန်အံၚ်လှိုၚ် က္ဍိုပ်သ္ကိုပ်ပၞာန်သီအဝဵု မပြံၚ်လဝ် ဗီုပြၚ်ညးဍုၚ်ကွာန်ဂှ်မ္ဂး ဥူဝေန်မျေတ် ဒးဒုၚ်မံၚ်ဒုဟ်ဒဏ်ထံၚ် အပ္ဍဲကဵုတံၚ်ဥူဂှ် ယှအ်ဖျေံကဵုလဝ်တုဲ ကဵုဏာအခေါၚ်ဗၠးဒုဟ်ဒဏ်ရ။
သမ္မတ ဥူဝေန်မျေတ် တန်ဒှ်လဝ်ပ္ဍဲလက်ထက်အလဵုအသဳဗော် NLD ဂှ် အခိၚ်ပၞာန်သီအဝဵုတေံဒးဒုၚ်ရပ်ထိၚ် စောဲစပ်လဝ်အမှု နကဵုၝောံပိုဒ် အဂတိနာနာ၊ ၝောံပိုဒ်ရာဇသာတ်ဇၞော် ၁၃၀ (က) တံတုဲ ဖျေံလဝ်ဒဏ်ထံၚ် ၉ သၞာံ ကဵု ၆ ဂိတု မဒှ်ရ။
စပ်ကဵုပရိုၚ် က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳဂှ် သွက်ဂွံပြံၚ်စွံထိၚ်ချုက်အပ္ဍဲသ္ၚိဂှ် ကေၚ်ကာဗဟဵုဗော် NLD လ္ၚဵုတံ အာမံၚ်နေပျဳဒဝ်တေံဖိုဟ်ရောၚ်ဂှ် မဳဒဳယာပရိုၚ်တံဗၟံက်ထ္ၜးလဝ်ရ။
မွဲလ္ပာ်ပၠန်ဂှ်တှ်ေ ပ္ဍဲအလဵုအသဳညဳသၟဟ်ကောန်ဂကူ NUG ဂှ်မ္ဂး ဥူဝေန်မျေတ်ဂှ် အတိုၚ်အဆံၚ်တာလျိုၚ်တြေံ လက်ထက်အလဵုအသဳ NLD တေံ စွံလဝ်ပ္ဍဲဒၞာဲသမ္မတတုဲ ဒဝ်အံၚ်သာန်သုကျဳ ဂှ်လေဝ် ဗၟံက်ထ္ၜးလဝ် နဒဒှ် ညးကဵုကသပ်ဍုၚ်ရ။
လ္တူအကာဲအရာတံဏံဝွံ တၠုၚ်လအာ ပရေၚ်ဍုၚ်ကွာန်ဍုၚ်ဗၟာ နူကဵုပရေၚ်သီအဝဵု စဵုကဵုဒှ်ကၠုၚ် ပၠန်ဂတးရပ်လွဟ်ဏံဂှ်တှ်ေ ပရေၚ်ပြံၚ်သၠာဲဗီုလဵု ဆက်ကတဵုဒှ်အာမာန်ရောဂှ် ညးဂမၠိုၚ်စိုတ်လုပ်စမံၚ် အိုတ်ရောၚ်။
လ္ပာ်ဗော်ဂှ်တှ်ေ အခိၚ်သောၚ်ကလးပြသၞာပရေၚ်ဍုၚ်ဗၟာ မံက်တိုန်ကၠုၚ် ဟိုတ်နူပရေၚ်ပၞာန်သီအဝဵုဏံဂှ် ယဝ်ရ ဟွံဆဵုဂဗသဳကၠဳ ပ္ညဳပ္ညပ်အာကဵု ဥက္ကဌဗော် NLD က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳမ္ဂး ဂၠံၚ်တရဴပြေပြံၚ်ဟွံမာန်ပုဟ်ဂှ် ကဵုလဝ်သမ္တီနွံရ။
ဆေၚ်စပ်ကဵုက္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳဂှ်တှ်ေ စဵုကဵု အခိၚ်သဝ်တ္ၚဲ ဂိတုအေဗရာ ၁၇ ဂှ် အမိၚ်မွဲမွဲ နူရုၚ်သမ္မတ အလဵုအသဳ ဒပ်ပၞာန်သီအဝဵု ပတိတ်ကၠုၚ်ဂှ် မုလေဝ်ဟွံဂွံဆဵုညာတ်ဏီပုဟ်။
သ္ပဗ္တမ်နူကဵု ပရေၚ်သီအဝဵု ဥူမေန်အံၚ်လှိုၚ် ဒှ်ကၠုၚ်သမ္မတတုဲ ပ္ဍဲအခိၚ်ကၠောံသၞာံတၟိဏံ ကဵုလဝ်အခေါၚ်ဗၠးဒုဟ်ဒဏ် ကုကောန်ထံၚ် ၄၃၀၀ ပြၚ်ရောၚ်ဂှ် ပ္ဍဲမဳဒဳယာတြးဝါဒအလဵုအသဳတံ လလောၚ်တြး လဝ် ပ္ဍဲဂိတုအေဗရာ ၁၇ ရ။
အတိုၚ်လိက်လလောၚ်တြးမ္ဂး တ္ၚဲစၟတ်သမ္တီ အတးကၠောံသၞာံတၟိ တ္ၚဲမွဲမံက်ဂှ် ကဵုဏာလဝ်အခေါၚ်ဗၠးဒုဟ်ဒဏ် ကောန်ထံၚ်တြုံဗြဴ ၄၃၃၅ တၠ နူကဵုဗ္ဒိုပ်ထံၚ် နာနာတံရ။
အပ္ဍဲအရာဏံ ယဝ်ရ ထပ်ကၠောန်ဒုဟ်ဗၠေတ်မွဲဝါပၠန်မ္ဂး ဒုဟ်ဒဏ်ဂှ်သၟး ဟွံက ဒုဟ်ဒဏ်မသှ်ေကၠုၚ်မံၚ်လၟုဟ် တံဂှ်လေဝ် ဒးဆက်ဒုၚ်အာ ပၠန်ရောၚ် ဖျေံလဝ်တၚ်စေဝ်ပၞောန်ဗီုဏံတုဲ ယှအ်ဖျေံကဵုလဝ် ဒုဟ်ဒဏ်တံဏံ မဒှ်ရ။
ၜိုန်ရကဵုအခေါၚ်ဗၠးဒုဟ်ဒဏ်ကီုလေဝ် နူကဵုဗွိုၚ်ဂၠးကဝ်တံ ထံက်ဂလာန်ကဵု အလဵုအသဳပၞာန်ဂှ် ဒှ်မာန်ဟွံသေၚ်ပုဟ် နူဂကောံရီုဗၚ်ကောန်ထံၚ်ပရေၚ်ဍုၚ်ကွာန် AAPP ဥူအံၚ်မျဵုကျဝ် ဟီုကဵု ဌာန်ပရိုၚ်သြၚ်လောန်တိုင်မ်ရ။
“ကဵုအခေါၚ်ဗၠးဒုဟ်ဒဏ်ဗီုဏံတုဲ နူကဵုဂကောံဂၠးကဝ်တံ ထံက်ဂလာန်ကဵုဇြဟတ် ကုဂကောံပၞာန်ပကီုပရာတ်တံ ဒှ်မာန်ဟွံသေၚ်ပုဟ်။ သွက်ဍုၚ်ပိုဲ ယဝ်ရနွံပၟိက် ကလိဂွံပရေၚ်ၜိုဟ်လလမ်မဍာံစၟတ်၊ ပရေၚ်ညဳသၟဟ်ကောန်ဂကူ မဍာံစၟတ်၊ အရာဒက်ပ္တန်ကၟိန်ဍုၚ်ပံၚ်ကောံဖိတ်ဒရေဝ်မဍာံစၟတ်တှ်ေ သီုကဵုဒဝ်အံၚ်သာန်သုကျဳ နကဵုအရာဟၟဲကဵု တၚ်စၟတ်အပိုၚ်အခြာ ဒးဗၠးကဵုဒုဟ်ဒဏ် ကုကောန်ထံၚ်ပရေၚ်ဍုၚ်ကွာန်တံသီုဖအိုတ်ရောၚ်။ ညးမဆေၚ်စပ်တံ သီုဖအိုတ်ပါလုပ်တုဲ ဒးကၠောန်အာ ပရေၚ်ဆဵုဂဗသဳကၠဳရောၚ်။ တုဲတှ်ေ ပ္ဍဲကာလသီအဝဵုဂှ် ဒုဟ်ရာဇဝတ်ပၞာန် ဂကောံပၞာန်ပကီုပရာတ်တံကၠောန်ဗဒှ်လဝ် ဒုဟ်ရာဇဝတ်လ္တူဂကူမၞိဟ်တံဂှ်လေဝ် ဒးကဵုအာဒုဟ်ဒဏ် ရပ်စပ်အာ ဗွဲမထေက်ကြိုက်ရောၚ်” သာ်ဝွံ သ္ဂးရ။
အပ္ဍဲကဵုလိက်အမိၚ် ကဵုလဝ်အခေါၚ်ဗၠးဒုဟ်ဒဏ်ဂှ်တှ်ေ စပ်ကဵုဒုဟ်ကၠောန်လဝ် ကၠာဟွံစိုပ် ဂိတုအေဗရာ ၁၇ တုဲ ဖျေံလဝ်ဒုဟ်ဒဏ်တုဲမ္ဂး အပ္ဍဲကဵုဒးဒုၚ်ဒုဟ်ဒဏ်တံ စနူကဵုအမိၚ်ဂစိုတ်ဂှ် ပြံၚ်သၠာဲအာ နဒဒှ်ဒဏ်ထံၚ် မွဲအာယုက်တံ ပါလုပ်ကီုရ။
တုဲပၠန် နူကဵုဒုၚ်မံၚ် ဒဏ်ထံၚ်မွဲအာယုက်ကေုာံ ဒဏ်ထံၚ်ဟၟဲကဵုအပိုၚ်အခြာသၞာံတံဂှ် ယှအ်ဖျေံကဵု ဒဏ်ထံၚ် ၄၀ သၞာံတုဲ၊ ညးဒးထံၚ် ၄၀ သၞာံ လပါ်လ္တူတံဂှ်တှ်ေ ကဵုပြံၚ်အာဒဏ်ထံၚ် ၄၀ သၞာံ မဒှ်ရ။
သွက်ကောန်ထံၚ်ဒးဒဏ် ၄၀ သၞာံ ကေုာံ သၟဝ်တံဂှ်တှ်ေ နူကဵုဒုဟ်ဒဏ်မသှ်ေမံၚ်တံဂှ် ယှအ်ဖျေံကဵု တြဴဂအုံ မွဲဂအုံရောၚ် ပတိတ်လဝ်အမိၚ်လဝ်နွံတုဲ၊ သွက်ဒဝ်အံၚ်သာန်သုကျဳ သှ်ေမံၚ် ဒဏ်ထံၚ် ၂၇ သၞာံဂှ်လေဝ် ဆေၚ်စပ်ပါလုပ်မံၚ် အဝေါၚ်ဏံကီုရောၚ် ကၠိုဟ်လဝ်အိုတ်ရ။
အတိုၚ်စရၚ် နူကဵုဇာဖိုၚ် ကောန်ထံၚ်ပရေၚ်ဍုၚ်ကွာန် အလုံဍုၚ်ဗၟာ (PPNM) သ္ပလဝ်ဒတန်မ္ဂး ကောန်ထံၚ်ပရေၚ်ဍုၚ်ကွာန် ဗၠးတိတ်ကၠုၚ် နကဵုအခေါၚ်ဗၠးဒုဟ်ဒဏ် နွံမံၚ် ၁၆၅ တၠတုဲ သှ်ေမံၚ်တံဂှ်လေဝ် စၟဳစၟတ်မံၚ် တၚ်နၚ်ဖိုဟ်ရောၚ် သ္ဂးရ။
ကြဴနူပေါဲဒုၚ်ဂတိယဵုသစ္စာ သမ္မတ ဥူမေန်အံၚ်လှိုၚ် အပ္ဍဲဂိတုအေဗရာ ၁၀ တေံတုဲ၊ ဂလာန်ညးကိုပ်ကၠာအိုတ်မ္ဂး သွက်အခေါၚ်ဗၠးဒုဟ်ဒဏ် ထေက်ကြိုက်တံဂှ် ချပ်ဗ္စာကဵုအာရောၚ် ဟီုလဝ်တုဲ ကဵုကၠုၚ်အခေါၚ် ဗၠးဒုဟ်ဒဏ်ဗီုဏံ မဒှ်ရ။
နူကဵုပွဳဗွိုၚ်ဂၠးကဝ် ကေုာံ ဍုၚ်အာသဳယာန်တံ ညံၚ်ဂွံသ္ပကၠုၚ် စၟတ်သမ္တီကု လ္တူဂကောံအလဵုအသဳဗၟာ က္ဍိုပ်သ္ကိုပ်ပၞာန်သီအဝဵု ညးမဒှ်ကၠုၚ် သမ္မတ ဥူမေန်အံၚ်လှိုၚ် ပၠတရဴဂှ်တုဲ ဂစာန်ကၠောန်ထ္ၜးထမံက်မံၚ် ရုပ်ရဴတံရောၚ် ညးလ္ၚတ်တံ ပါ်ပါဲထံက်ထ္ၜးလဝ်အိုတ်ရ။
ပရိုၚ် – သြၚ်လောန်တိုင်မ်
Photo – Social Media