ဂျေရုသလေန်၊ အေဗရာ ၁၈
ပရေၚ်တုပ်စိုပ်ဒေါအ်ပန်ပှော် ပွိုၚ် ၁၀ တ္ၚဲ အကြာအေဿရေ ကေုာံ လက်ဗနန်တံဂှ် ပ္ဍဲဍုၚ်ဗေရောတ် ညးဍုၚ်ကွာန်တံ ဖံက်ခတိုဟ်လဝ်ပၟတ်ပကဴသြဴတံတုဲ ဒုၚ်တၠုၚ်လဝ်ရ။
အပ္ဍဲအကြာပေါဲပၞာန် ပွိုၚ်တြဴသတ္တဟဂှ် ပ္ဍဲလက်ဗနန် မၞိဟ် ၂၀၀၀ ပြၚ် ချိုတ်အာတုဲ ညးဍုၚ်ကွာန် မသုန်ဂအုံ မွဲဂအုံ ဒးဂြိပ်ပါဲလဝ် ဘဲပၞာန်ရ။
လပါ်အေဿရေ ညးဍုၚ်ကွာန် ၂ တၠ ကေုာံ ကောန်ပၞာန် ၁၃ တၠ ချိုတ်လဝ်ရောၚ် ဒပ်ပၞာန်အေဿရေ ဟီုလဝ်ရ။
က္ၜၚ်ဂစာန်လုပ် ဟွံသေၚ်မ္ဂး တိတ်နူပ္ၚံက်ၜဳတံဂှ် နကဵုဒပ်ဍာ်အမေရိကာန် ဟွံကဵုအာကၟာတ်ဆိုအ်လဝ်ရောၚ် ထရ ဗၟံက်ထ္ၜးဟီုလဝ် ပ္ဍဲဇာဖိုၚ်မှာဇန်ရ။
က္ၜၚ်ဆေၚ်စပ်ကဵုသွာၚ်ပၞာန် ကၠုၚ်စိုပ်ကြပ်ကဵုဂၠံၚ်က္ၜၚ်တံဂှ် သွက်ဂွံဗတိုက်အာ ဗွဲမသ္ကာတ်မြဟ်ရောၚ် အဳရာန် ဟီုရ။
ပရေၚ်ဘပဠ ဗီုလဵုနွံနွံ နကဵုတဳဟဳရာန် ဖျေံလွဟ်ဂှ်တှ်ေ ဆလံမှ ဒှ်မာန်ဟွံသေၚ်ပုဟ် ဥက္ကဌစၠတ်ထဝ်အဳရာန် ဟီုလဝ်ရ။
လပါ်အဳရာန် သွက်ဂွံကလေၚ်စိုပ်ကၠုၚ် ဝိုၚ်ပ္ညဳပ္ညပ်ဒှ်ဒှ် ဟွံကလေၚ်စိုပ်ကၠုၚ်ဒှ်ဒှ် နကဵုညးတေံ စွံလဝ်အာရီုဟွံသေၚ်ပုဟ် ထရ ဟီုလဝ်ရ။
အပ္ဍဲအရာပ္ညဳပ္ညပ်လဝ် ပ္ဍဲဍုၚ်အေဿလာမ်မာဗာတ် ဟွံဂွံအံၚ်ဇၞးဂှ် ဟိုတ်နူအဳရာန် ဟွံထောံကၠေံ တၚ်ရန်တၟအ်နျူကလဳယျာညးတံရောၚ် ထရ ဟီုလဝ်ရ။
သီုကဵုဍုၚ်ၜါလ္ပာ်တံ ကြပ်ဂွံအာ တၚ်တုပ်စိုပ်ကီုလေဝ် တၚ်ရန်တၟအ်အမေရိကာန် ပြံၚ်သၠာဲအာနွံ ဒးဂဗဆဵုလဝ်ရောၚ် အဳရာန် ကလေၚ်ဟီုပလန်လဝ်ရ။
အဳရာန် ဆက်တုဲ နွံပၟိက်မံၚ် လွဟ်နျူကလဳယျာဖိုဟ်တုဲ ပ္ဍဲအရာသဳကၠဳလဝ် ပါကေဿတာန်ဂှ် ဗၟံက်ထ္ၜးလဝ် တၚ်ရန်တၟအ်ဂှ်ရောၚ် ထရ ဟီုရ။
နကဵုအဳရာန် အခေါၚ်ပိုၚ်ပြဳလွဟ်နျူကလဳယျာ ဟၟဲတုဲ ယူရေနဳယာန် မတောမ်သ္အးလဝ်တံဂှ် သီကေတ်အာရောၚ် ထရ ဟီုဂးလဝ် ဗွဲမပိုတ်သ္ကုတ်ရ။
သွက်ဂွံထပ်ဗတိုက်အဳရာန်ဂှ် ထရ ချပ်မံၚ်ရောၚ်ဂှ် နိဿဲကဵုညးတာလျိုၚ်အမေရိကာန် ဟွံမိက်ဒုၚ်ယၟုတံတုဲ ဌာန်ပရိုၚ် Wall Street Journal ဗၟံက်ထ္ၜးချူလဝ်ရ။
စပ်ကဵုပရိုၚ်ဏံတုဲ အခိၚ်သၟာန်လဝ်ဂှ်မ္ဂး နကဵုနဲကဲနာနာ ချပ်လဝ်နွံရောၚ် သ္ၚိဗတာင်ဗု ကလေၚ်သောၚ်ကလးကဵုလဝ်ရ။
ပရေၚ်အမေရိကာန် ကၟာတ်ဆိုအ်က္ၜၚ် မတတ်ကၠောံအာပ္ၚံက်ၜဳဟဝ်မုဇ်တံဂှ် သွက်ဂွံကဵုဇြဟတ်ဟရိုဟ် ကုဍုၚ်တၞဟ်တံ ညံၚ်ဂွံရပ်စပ်ကဵုအာဒုဟ်ဒဏ် လ္တူအဳရာန်ရောၚ် ဒှ်ကၠုၚ်မာန် မဒှ်ရ။
ကၠေၚ်ဍေၚ် ကေုာံ သၟုဟ်ဓါတ်သဘာဝဂၠးကဝ် တတ်အာမံၚ် မသုန်ဂအုံ မွဲဂအုံဂှ် ယဝ်ရကၟာတ်ဆိုအ်လဝ် ဂၠံၚ်ဍာ်ဂှ်လံအာမ္ဂး င္ၚုဟ်ကၠေၚ်ဍေၚ်ဂၠးကဝ် သၠုၚ်တိုန်ဗွဲမလောန်တုဲ ပရေၚ်ပိုန်ဒြပ်ဂၠးကဝ် ယုတ်စှ်ေအာမာန်ရောၚ် တၠပညာတံ ကဵုလဝ်သတိနွံရ။
Ref:BBC