မတ်မလီု၊ မေ ၆
အပ္ဍဲတွဵုရးမန် သ္ကိုပ်ပရေၚ်အုပ်ဓုပ်အရာပ်/ကွာန် ခါန်ကၞက်လဝ် ကြဴနူဒပ်ပၞာန်သီအဝဵုတံဂှ် သွက်ဂွံကလေၚ်ရုဲစှ်အာနွံမံၚ်ရောၚ် ညးမကြပ်ကဵုရဲပွဳဗွိုၚ်ပရေၚ်အုပ်ဓုပ်တံ ဟီုကဵု ဌာန်ပရိုၚ်သြၚ်လောန်တိုၚ်မ် ရ။
အပ္ဍဲဂိတုမေဏံ သွက်ဂွံရုဲစှ်အာ သ္ကိုပ်ပရေၚ်အုပ်ဓုပ်အရာပ်/ကွာန်တံ ညံၚ်သ္ဂောံတုဲဒှ်တုဲ ပ္ဍဲတ္ၚဲအကြာတံဏံမ္ဂး သွက်ဂွံရုဲစှ်ပ္တန်အာ ဂကောံကောပ်ကာဲ ပရေၚ်အုပ်ဓုပ်တံ နွံမံၚ်ရောၚ်။
အလဵုအသဳပၞာန် ပြံၚ်လဝ်ဗီုပြၚ်ညးဍုၚ်ကွာန်တံဂှ် အတိုၚ်လၟေၚ် ပရေၚ်ဥပဒေအုပ်ဓုပ် အရာပ်ကွာန်မ္ဂး သ္ကိုပ်ပရေၚ်အုပ်ဓုပ် အရာပ်ကွာန်မဆေၚ်စပ်တံဂှ် သွက်ဂွံကလေၚ်ရုဲစှ်အာ မဒှ်ရ။
အပ္ဍဲကဵုဒေသ သွက်ဂွံဒှ်သ္ကိုပ်ပရေၚ်အုပ်ဓုပ်အရာပ်ကေုာံ ပ္ဍဲကွာန်လ္ၚဵုတံဂှ် ဒးအာဇရေၚ် ညးတာလျိုၚ်ရုၚ်ပရေၚ်အုပ်ဓုပ် ပွိုၚ်ဍုၚ်၊ ခရိုၚ် ကေုာံ တွဵုရးတံဂှ်ကီု သီုကဵုဒးအာဇရေၚ် ညးတာလျိုၚ် ဗော်ပျဳခိုင်ဖျိုဝ်တံတုဲ ဗက်ထပက်လာပ်ဗဇဴ ကဵုလဝ်သြန်ကိုတ် ဗွဲမဂၠိုၚ်နွံမံၚ်ရောၚ်ဂှ် ဂွံတီကေတ် နူညးမကြပ်ကဵု ရဲပွဳဗွိုၚ်ပရေၚ်အုပ်ဓုပ်တံရ။
ညးဗက်ထပက်မံၚ်လာပ်ဗဇဴ သွက်ဂွံဒှ် သ္ကိုပ်ပရေၚ်အုပ်ဓုပ် အရာပ်ကွာန် ဗွဲမဂၠိုၚ်တံဂှ် ဟိုတ်နူမိက်ဂွံဂွံ အခေါင်အရာကမၠောန်ကီု ညးလ္ၚဵုတံဂှ်တှ်ေ တေၚ်စ စရၚ်ကၟုဲလေဝ် ဒှ်မံၚ်ကမၠောန်ဂွံသြန်တုဲ ညံၚ်ဂွံဒှ် သ္ကိုပ်ပရေၚ်အုပ်ဓုပ်ဂှ် ဗက်မံၚ်ကဵုသြန်ရောၚ် သ္ဂးရ။
အတိုၚ်ဥပဒေပရေၚ်အုပ်ဓုပ်အရာပ်၊ ဂကောံကွာန် ကလေၚ်ပဠေဝ်ပဠေတ်လဝ် ပ္ဍဲသၞာံ ၂၀၁၆ တေံမ္ဂး အာယုက်တာလျိုၚ် သ္ကိုပ်ပရေၚ်အုပ်ဓုပ် အရာပ်ကွာန်ဂှ် ဒှ်အတိုၚ်အာယုက်တာလျိုၚ် သမ္မတကၟိန်ဍုၚ် ရောၚ် ခၞံဗ္ဒျ်လဝ်ရ။
သ္ကိုပ်ပရေၚ်အုပ်ဓုပ်အရာပ်/ကွာန်တံဝွံ အပ္ဍဲကာလ အာယုက်တာလျိုၚ် သမ္မတတၟိဂှ် စဵုကဵုစိုပ်အခိၚ်ရုဲစှ် ကဵုတာလျိုၚ် သ္ကိုပ်ပရေၚ်အုပ်ဓုပ် အရာပ်/ ဂကောံကွာန်တၟိတုဲဒှ်တေံ ဒးယိုက်ဂၠေၚ်အာတာလျိုၚ်တုဲ ကမၠောန်တာလျိုၚ်တံဂှ်လေဝ် ဒးသၠောဲပြံၚ်ပအပ်ကဵု သၞောတ်စှ်ေစှ်ေရောၚ်ဂှ် ပ္ဍဲဥပဒေဗၟံက်ထ္ၜးလဝ်ရ။
အပ္ဍဲတွဵုရးမန် ကြဴနူဒပ်ပၞာန်သီအဝဵုတုဲ သ္ကိုပ်ပရေၚ်အုပ်ဓုပ် အရာပ်/ကွာန်တံဗွဲမဂၠိုၚ် နုက်တိတ်အာဂှ်ကီု၊ သ္ကိုပ်ပရေၚ်အုပ်ဓုပ် ဟွံဒုၚ်တဲပရေၚ်သီအဝဵုတံလေဝ် ဒးဒုၚ်ရပ်ဖျေံထံၚ်တုဲ ပရေၚ်ရုဲစှ်ခါန်ကၞက် သ္ကိုပ်ပရေၚ်အုပ်ဓုပ် အရာပ်/ကွာန်တံဂှ် နူကဵုဒပ်ပၞာန် ခါန်ကၞက်စုတ်လဝ် ရဲကြပ်ကဵုဒပ်ပၞာန်တံသၟးရ။
အပ္ဍဲကဵုတွဵုရးမန် ပွိုၚ်ဍုၚ်နွံမံၚ် ၁၀ ပွိုၚ်ဍုၚ်ဂှ်တှ်ေ ဂကောံကွာန် အရာပ် ၄၆၈ ဂကောံနွံတုဲ ဒက်ပ္တန်လဝ် နကဵုကွာန် ၁၁၄၇ ကွာန် မဒှ်ရ။
ပရိုၚ် – သြၚ်လောန်တိုၚ်မ်
Photo – CJ