မတ်မလီု၊ မေ ၆။
အဝဵုညးဍုၚ်ကွာန်တံဂှ် သွက်ဂွံပအပ်ကဵု ဇရေၚ်တဲညးဍုၚ်ကွာန်ဍာံဍာံ မွဲကရောံကု ဂကောံဒပ်မဟာမိတ် ကောန်ဍုၚ်အရၚ်ကောဒေံတံဂှ် ကောံကလောအ်ညဳသာ ဆက်ဇက်တိုန်အာ ဇရေၚ်ပေါဲအံၚ်ဇၞးတေံညိ သ္ကိုပ်ဝန်ဇၞော် NUG မာန်ဝေန်ခေင်တာန် ဖ္တိုက်ဖ္အောဝ်လဝ်ရ။
အပ္ဍဲကဵုစိုပ်အခိၚ် ပေၚ် (၅) သၞာံ အရာဒက်ပ္တန်လဝ် ဒပ်ပၞာန်စဵုဒၞာ ညးဍုၚ်ကွာန် (PDF) ပ္ဍဲဂိတုမေ ၅ ဂှ် သ္ကိုပ်ဝန်ဇၞော် အလဵုအသဳ ညဳသၟဟ်ဂကူ (NUG) ဟီုလဝ်ဂလာန် နူကဵုအာန်လာၚ် (Online) ဂှ်ရ။
အပ္ဍဲလုကဴပွိုၚ်ကာလ (၅) သၞာံဂှ် ကေတ်ထောံ ခန်လ္ၚတ်ကဵု ပရေၚ်ဆဵုဂဗတံတုဲ နကဵုနဲကဲဗျူဟာခိုဟ်ဟ် ကေုာံ ပရေၚ်ဂစာန်လွဳတံဂှ် သွက်ဂွံဆက်အာဂတတေံ ဆက်လုပ်ပေါဲဗတိုက် မွဲကရောံကဵု ဂကောံဒပ်မဟာမိတ် ကောန်ဍုၚ်အရၚ်တံညိဂှ် ဖ္တိုက်ဖ္အောဝ်လဝ်ရ။
ပ္ဍဲအခိၚ်လၟုဟ်မ္ဂး နူကဵု NUG ကေုာံ ကမ္မတဳသ္ပစၞးစၠတ်ထဝ်ကၟိန်ဍုၚ် (CRPH)၊ ဗော်မဟာမိတ်ကောန်ဍုၚ်အရၚ် မပ္တံကဵု KIO, KNU, KNPP ကေုာံ CNF တံ မပါလုပ်ဒၟံၚ် ကံၚ်သဳပၠတရဴ ဖိတ်ဒရေဝ် ဒဳမဝ်ကရေဇြဳ ကၟိန်ဍုၚ်ပံၚ်ကောံ ဂွံမံက်ဂတဝ်တိုန် (SCEF) ဂှ် ဒက်ပ္တန်လဝ် တုဲဒှ်အာ မဒှ်ရ။
SCEF မ္ဂး နကဵုမူဝါဒ ကေုာံ ဗျူဟာမွဲဓဝ်ဟေၚ် စကာသုၚ်စောဲမံၚ်တုဲ ပ္ဍဲအရာကဏ္ဍပၞာန်၊ ပရေၚ်ဍုၚ်ကွာန်ကေုာံ ပရေၚ်အုပ်ဓုပ်တံဂှ် သွက်ဂွံပံၚ်တောဲထမံက်ရုပ်ရဴအာ ဟလေၚ်ညဳညဳမာန် ပ္ဍဲဂိတုမာတ် ၃၀ တုဲကၠုၚ်ဏံဂှ် လလောၚ်တြးလဝ်ရ။
စပ်ကဵုပရေၚ်ပၞာန်လၟုဟ်တုဲ ပ္ဍဲအခိၚ် ဒးဒုၚ်တဝ်စၞေဟ်မံၚ်ကဵု ဇြဟတ်ဒပ်ပၞာန်ဂၠိုၚ်ၚ်တံမ္ဂး ညးဍုၚ်ကွာန်တံ ညံၚ်ဟွံဂွံ ဒှ်ပရေၚ်ဆောံလေၚ်ယုတ်ဒေက်အာ ပ္ဍဲဒေသလဝေၚ်ပၞာန်လ္ၚဵုတံဂှ် နကဵုအကာဲအရာ ပၞာန်ဒုၚ်ဟေၚ် ဒုၚ်တဝ်စၞေဟ်လဝ်ဂှ်ကီု၊ ဗွဲယာယဳ ဆုတ်တိတ်ထောံလဝ်ကီု နွံမံၚ်ရောၚ် သ္ကိုပ်ဝန်ဇၞော် ဟီုလဝ်ရ။
အရာဏံဂှ် ဟိုတ်နူဖေက်သၞဟွံသေၚ် ဒှ်တၚ်သ္ဂုတ်သွာတ် ဒပ်ပၞာန်စဵုဒၞာညးဍုၚ်ကွာန် မပတဝ်ရံၚ်အာမုက်ညးဍုၚ်ကွာန်တံတုဲ မွဲလပါ်ပၠန် သွက်ပေါဲဗတိုက်ဗျူဟာ ဆက်အာဂတတံမ္ဂး ဒှ်ပရေၚ် ပကောံဇြဟတ်တုဲ နကဵုစိုတ်ဓါတ် ညံၚ်ဟွံဂွံဍိုန်လျစှ်ေအာဂှ် ကဵုလဝ်သတိရောၚ်။
မွဲလပါ်ပၠန် အလဵုအသဳပၞာန်သီအဝဵုဂှ် သွက်ပရေၚ်ၜိုဟ်လလံ ကော်ဘိက်လဝ် ပရေၚ်ဆဵုဂဗသဳကၠဳကု ဂကောံရပ်လွဟ်ကောန်ဍုၚ်အရၚ်တံတုဲ သွက် PDF တံဂှ်တှ်ေ ညံၚ်ဂွံဖျေံလွဟ်ဟေၚ် မဒှ်ရ။
လ္တူပရေၚ်ဏံ ဂကောံဒပ်ပၠန်ဂတးရပ်လွဟ်တံ ဟိုတ်နူဂလာန်ပတေဟ်ဟၟဲတုဲ တးပါဲထောံလဝ်တုဲ ဒပ်ပၞာန်ဗမာတံဆက်တုဲ သၠုၚ်ပတိုန်မံၚ် ပရေၚ်ကြဳဗုမ်ကဵုၜၚ်ကျာကဵု ပရေၚ်ထပက်ကရောၚ်ပၞာန် လပါ်ဗလးတိတံ ဇၞော်ကဵုဇြဟတ်ရောၚ်။
ပ္ဍဲအကာဲအရာဏံ ဂကောံမဟာမိတ်ကောန်ဍုၚ်အရၚ်ကဵု ဒပ်ပၠန်ဂတးတံ ဗီုပြၚ်လဵု သွက်ဂွံပလေဝ်ပလေတ် ပကောံအာ ဇြဟတ်ကီု ဗီုပြၚ်လဵု ဂွံထမံက်အာရုပ်ရဴ ပေါဲဗတိုက်တံဂှ် ကိစ္စဇၞော်တိုန်ကၠုၚ်ယျရောၚ် ဗိုလ်ဇၞော် CDM ဇြေန်ယဝ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဂကောံမဟာမိတ်ကောန်ဍုၚ်အရၚ်တံဂှ် ဗီုပြၚ်လဵု ပၠန်ဂတးအာရော။ လၟုဟ် ဒေါအ်ထောံမွဲအခန်တုဲ ကလေၚ်ပကောံဇြဟတ် ပလေဝ်ပလေတ်စတုဲမှ အကာဲအရာသွက်ဂွံပဠေဝ်ပဠေတ်ဂှ် ဗက်အာဟာ၊ ဟွံသေၚ်တှ်ေ ကောန်ဍုၚ်အရၚ်တံ ခေတ္တယာယဳ ဒေါအ်အာပန်ပှ်ောတုဲ ဒပ်ပၠန်ဂတးတံ ပကောံအာဇြဟတ်ဟာ၊ ပလေဝ်ပလေတ်အာဟာ၊ ဗတောန်အာကွတ်ဟာ။ အကာဲအရာဏံ ပိုဲဒးရံၚ်အာရ။ ဟိုတ်ဂှ်ရ မွဲဒမြိပ်ဓဝ် ဆက်တုဲ ဟွံဇူဟွံဒေါအ် ဗတိုက်အာဟာ၊ ဇူတုဲမှ မွဲအလန် ကလေၚ်ဗတိုက်အာပၠန်ဟာ၊ လၟုဟ် ကဏ္ဍဏံ ကိစ္စဇၞော်တိုန်ကၠုၚ်ယျ။ အကာဲအရာဏံဂှ် ပိုဲဒးရံၚ်အာရအဴ” သာ်ဝွံ ဟီုလဝ်ရ။
အပ္ဍဲကဵုဂိတုအေဗရာ ၃၀ လောန်ကၠုၚ်ဏံ ဒၞာဲဒေသ ဒပ် PDF ကဵု ဒပ်မဟာမိတ်တံထိၚ်ဒဝ်လဝ် လုကဴပွိုၚ်မွဲသၞာံ ဍုၚ်အေန်ဒဝ် နွံမံၚ်လပါ်လတူရးဒေသ သကိုၚ်ဂှ် ဒပ်ပၞာန်ဗမာ ကလေၚ်လုပ် ထိၚ်ချုက်အာမာန်တုဲ ဒပ်ပၠန်ဂတးတံ ဒးကလေၚ်ဆုတ်တိတ် အာလဝ်ရ။
အတိုၚ်တၚ်နၚ်နူ BNI – Myanmar Peace Monitor မ္ဂး နူကဵုဍုၚ်အပံၚ်ဖအိုတ် ၁၀၄ ဍုၚ် ဒပ်ဇြဟတ်ပၠန်ဂတးတံ သီထိၚ်ချုက်လဝ်တံဂှ်တှ်ေ ဒပ်ပၞာန်ဗမာ ကလေၚ်ထိၚ်ချုက် ဂွံအာလဝ် နွံ (၁၆) ဍုၚ်ရောၚ်။
တင်ကော်ဆောပရေၚ်ဍုၚ်ကွာန် ဒးဆဵုဂဗဒၟံၚ်လၟုဟ် ဂၠိုၚ်ကဵုတၚ် နွံမံၚ်ဂှ်ကီု၊ လပါ်ပၞာန်လေဝ် ပရေၚ်ဒးဆောံလေၚ်လ္ၚဵုလ္ၚဵုတံ နွံမံၚ် ကီုလေဝ် နူကဵုတိုၚ်ပ္ကဴရန်တၟအ် ညံၚ်ဟွံယောင်ယာအာဂှ် သမ္မတယာယီ ဒူဝါလယှဳလ ဖ္တိုက်ဖ္အောဝ်လဝ်ရ။
သွက်ညးဍုၚ်ကွာန်တံ ဂွံတီကေတ် တင်ကော်ဆောပရေၚ်ဍုၚ်ကွာန် NUG မုက်ဒပ်ပၠန်ဂတးတမ်က္ညၚ် ဒးဆဵုဂဗဒၟံၚ်တံဂှ် နူကဵု ဌာန်ပရိုၚ်သြၚ်လောန်တိုၚ်မ် ဆက်စၠောံသၟာန်လဝ် ညးအခေါင်ဟီုဂးနွံ ရုၚ်သ္ကိုပ်ဝန်ဇၞော် ဥူနေဖုၚ်လာတ် ကီုလေဝ် ဟွံကလေၚ်ဟီုနၚ် မွဲသာ်ပုဟ်။
အလဵုအသဳ NUG နကဵုဗီုပြၚ် အလဵုအသဳညးဍုၚ်ကွာန်ဂှ် ကရောံဒပ်ပၞာန်စဵုဒၞာညးဍုၚ်ကွာန်တံ သွက်ဂွံဗတိုက်ပလီုထောံ သၞောတ်တၠအဝဵုပၞာန် ညံၚ်ရိုဟ်ကၞက်ဂွံပိုတ်အာဂှ် ဆက်တုဲလုပ်အာပေါဲဗတိုက် ပိုတ်တ်သ္ကုတ်တ်ရောၚ် သမ္မတယာယီ ကဵုလဝ်ကတိ ဟီုလဝ်ရောၚ်။
အပ္ဍဲကဵု ဒပ်ပၞာန်စဵုဒၞာညးဍုၚ်ကွာန် (PDF) ဂှ် ဌာန်ရးပၞာန် (၁၀) ဒၞာဲ၊ ၝောံဒပ် (၁) ၊ တမ်ဒပ်အပံၚ်ဖအိုတ် ၃၆၀ ဒပ်တံဂှ် နူကဵု ပရေၚ်ကော်ကာဲထိၚ်ဒဝ်မွဲဒၞာဲဟေၚ် ကၠောန်သ္ပလဝ်မာန်ယျရောၚ် ဌာနဝန်ဇၞော်စဵုဒၞာ NUG ကဵုလဝ်သမ္တီလလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – NUG