ၜဳကလေၚ်၊ မေ ၁၃။
အပ္ဍဲကဵုတွဵုရးမန် ပွိုၚ်ဍုၚ်ၜဳကလေၚ် ဗဒါဲကွာန်လေဝ်ကေ လတူဂၠံၚ်ကျာ်ဍောတ်ဂှ် ကရောၚ်ပၞာန်ဗမာပန်လဝ်တုဲ ရဲဂြိပ်ပါဲဘဲပၞာန် မိကဵုကောန်ဝုတ်ညးတံ ၜါတၠ ချိုတ်အာဂှ် ဂွံတီနူညးဒေသတံ ကေုာံ ခရိုၚ်သဓီု KNU ရ။
ပ္ဍဲဂိတုမေ ၉ ၜိုတ်အခိၚ်တ္ၚဲစေၚ် ၂ နာရီဂှ် ကရောၚ်ပၞာန်ဗမာတံ ဗဒေါအ်လဝ်ကွဳစက်မွဲမ ဖ္ဍိုက်နၚ်ရဲဂြိပ်ပါဲဘဲပၞာန် ၇ တၠတုဲ ပန်လဝ်ကဵု သေနာတ် မဒှ်ရ။
ဟိုတ်နူကရောၚ်ပၞာန်ဗမာ ပန်လဝ်တုဲ မၞိဟ်ပါကၠုၚ်လတူကွဳစက် နဝ်ဖဝ်အေဝ် အာယုက် ၄၆ သၞာံကဵု ကောန်ဝုတ်ညး နဝ်ပါန်အိဖျူ အာယုက် ၁၃ သၞာံတံ ချိုတ်အာလဝ် အပ္ဍဲဒၞာဲဂှ်ရ။
တုဲပၠန် နဝ်ယှာန်မလေဝ် အာယုက် ၁၅ သၞာံ ကေုာံ သဝ်မိုၚ်ခေဝ် အာယုက် ၄၉ သၞာံတံ ဒးအာဝပ်မကမ်တုဲ အတိုၚ်ဒးဝပ်လဝ်ဂှ် သဝ်မိုၚ်ခေဝ် ဂြိပ်ပါဲဗၠးတိတ်အာရ။
ကြဴနူပန်လဝ်ဏံတုဲ ကရောၚ်ပၞာန်ဗမာတံ ရပ်ဏာညးဒဳကွဳစက် သဝ်ဇေယျာ သီုရဲဂြိပ်ပါဲဘဲပၞာန် သဝ်မိုၚ်သာန်၊ သဝ်ဖါပွုဲ၊ သဝ်ဝေန်ဇဝ်ထိုက် သီု ၄ တၠတံရ။
ပ္ဍဲဂိတုမေ ၁၀ ဂှ် နူကရောၚ်ပၞာန်ဏံ ကလေၚ်ဗလးကဵု သဝ်ဇေယျာ ကေုာံ သဝ်ဖာပွုဲတံ ၜါတၠကီုလေဝ် ညးၜါတၠ သှ်ေဒၟံၚ်တံဂှ် ဆက်တုဲရပ်ချုက်လဝ်ဖိုဟ်ရောၚ် ညးအုပ်ကာခရိုၚ်သဓီု KNU ပဒိုသဝ်ဧနိုင် ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ဗမာ ဆက်ရပ်ချုက်လဝ် ရဲဂြိပ်ပါဲဘဲပၞာန်ၜါတၠဂှ် ချဳဓရာၚ်မံၚ် ပ္ဍဲအကြာဗွိုၚ်ကွာန်လေဝ်ကေရောၚ် သ္ဂးရ။
ကရောၚ်ပၞာန်ပန်လဝ် ရဲဂြိပ်ပါဲဘဲပၞာန်တံဏံဂှ် နူဘာတန်ဗတောန်ကွတ်ပၞာန် လၟိဟ် ၉ ဖျေံသ္ဇိုၚ်ပွိုၚ်ဍုၚ်သဓီု ဒှ်ကရောၚ်ပၞာန် ကၠုၚ်ဗိုၚ်ကဵုအရီုဗၚ် ညံၚ်ဗ္ဒိုပ်ဝေင်တာပါန် ပ္ဍဲၜဳကလေၚ် ဟွံဂွံကျအာရောၚ် ဂွံတီကေတ် နူကဵုဂကောံဇြဟတ်ပၠန်ဂတးတံရ။
ပရိုၚ် – သြၚ်လောန်တိုၚ်မ်
Photo – Social Media