သဓီု၊ မေ ၁၃။
ၜိုန်ရ ပၟတ်ဓါတ်ပိုတ်မံၚ် အခိၚ်လအ်လကီုလေဝ် အပ္ဍဲတွဵုရးမန် ညံၚ်ဂွံဂွံဓါတ်ပၟတ် ပဵုဂၠိုၚ်တိုန်ကၠုၚ်ဂှ် ဂစာန်မံၚ်ရောၚ် ဝန်ဇၞော်ဓါတ်လလဳ၊ ဇြဟတ်ဓါတ်၊ ကွတ်စက်ကေုာံ ပရေၚ်ပလံၚ်ဗ္စိုပ်အာကၠုၚ် တွဵုရးမန် ဥူဇေယျာဥူ ဟီုရ။
အပ္ဍဲဂိတုမေ ၁၀ လောန်ကၠုၚ်ဏံ အခိၚ်ညးအာစၟဳစၟတ်လဝ် ရုၚ်စက်ကဵုဓါတ်ပၟတ်သဓီု သုၚ်စောဲသၟုဟ်ဓါတ်သဘာဝ မနွံ ပ္ဍဲကွာန်ပ္ကဴဒကှ် ပွိုၚ်ဍုၚ်သဓီုဂှ် ဝန်ဇၞော်ပၟတ်ဓါတ်လလဳ တွဵုရးမန် အလဵုအသဳပၞာန်ခါန်ကၞက် ဟီုလဝ် မဒှ်ရ။
သွက်ဂွံဂွံဇြဟတ်ပၟတ်ဓါတ်လလဳ ပဵုဂၠိုၚ်တိုန်ဂှ် ပဠေဝ်ပဠေတ်မံၚ် စက်ကဵုဓါတ်ပၟတ်သဓီု သၟုဟ်ဓါတ်သဘာဝဏံတုဲ ယဝ်ရ စက်ရုၚ်ကလေၚ်ဂေတ်မ္ဂး သွက်ညးဍုၚ်ကွာန်တံ ဂွံသုၚ်စောဲ ပၟတ်ဓါတ်လလဳဂှ် အခိၚ်ဂၠိုၚ်တိုန်ရောၚ် သ္ဂးရ။
ဟိုတ်ဂှ်ရ ကမၠောန်ပဠေဝ်ပဠေတ်ဇၞော်ကဵုဇြဟတ် ကၠောန်ဒၟံၚ် ပ္ဍဲရုၚ်စက် ကဵုဓါတ်ပၟတ်သၟုဟ်ဓါတ်သဘာဝ သဓီုလၟုဟ်ဏံ သွက်ဂွံတုဲဒှ်အာ ဗွဲမပြဟ်မာန်ဂှ် ညံၚ်ဂွံဗိုၚ်ရီုဗၚ် ပံၚ်တောဲကဵုညိကီု ဝန်ဇၞော်ပၟတ်ဓါတ်လလဳတွဵုရး ဖတိုက်ဖ္အောဝ်လဝ်ရ။
ဝန်ဇၞော်ဟီုမံၚ် ဂစာန်ကၠောန်မံၚ် သွက်ဂွံဂွံဇြဟတ်ပၟတ်ဓါတ်လလဳ ပဵုဂၠိုၚ်တိုန်ဂှ် ဒှ်အရေဝ်လ္တူကျာ ဆၜိုတ်ဂွံထ္ၜးစ အယောၚ်အလာ ညိညတုဲ နတဲပကတိမ္ဂး အခိၚ်ပၟတ်ပိုတ်အာဂှ် ယုတ်ဒေက်ပဵုဂၠိုၚ်အာမံၚ် နူကဵုအခိၚ်ကၠာတေံဏီရောၚ် ညးဒေသမန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ယဝ်ရဒးဟီုကၠးကၠးတှ်ေ ဟီုမံၚ်သွက်ညးဍုၚ်ကွာန်တုဲ ကၠောန်ထ္ၜးမံၚ်ဆၜိုတ်အယောၚ်အလာရ။ ကိစ္စပၟတ်ဓါတ်လလဳ ပၟတ်ဟွံကၠုၚ်တံဂှ် သွက်ဂွံသောၚ်ကလး ညးတံကၠောန်တှ်ေ ကၠောန်မံၚ်ရ။ ဆဂး ထ္ၜးစမံၚ် အယောၚ်အလာသၟးရ။ တက်ဗီုရုပ်တုဲတှ်ေ ကလေၚ်စဴအာ။ ကြဴနူညးတံကၠုၚ်တုဲမှ ပၟတ်ဂှ် ပဵုပရေအ်အာ။ ပၟတ်ဂှ် လၟုဟ်ပ္ဍဲကဵုတိုၚ်ပၟတ်လေဝ် ဟွံကၠုၚ်ရ” သာ်ဝွံ သ္ဂးရ။
တုဲပၠန် အခိၚ်ကဵုပၟတ်ဓါတ်ကၠာတေံဂှ် နကဵုစရင်အၚ် ဖျေံထ္ၜးကဵုမံၚ်ညးဍုၚ်ကွာန်ကီုလေဝ် ပ္ဍဲလက်ထက် ခေတ်အလဵုအသဳပၞာန်ဏံဂှ်တှ်ေ ဟွံထ္ၜးကဵုဂှ်တုဲ အခိၚ်မိက်ဂွံကဵုဂှ် ကဵုမံၚ်ပၟတ်ဂှ်ရ ကၠောန်ကမၠောန်မ္ဂးလေဝ် ဒးဆဵုဂဗမံၚ်ကဵု အခက်အခုဲတံနွံမံၚ် ညးဆက်ဟီုရ။
ရုၚ်စက်ကဵုဓါတ်ပၟတ် သၟုဟ်ဓါတ်သဘာဝသဓီု နွံဇြဟတ် ၁၁၈ ဒသမ ၉ မဂ္ဂါဝပ် ဂွံကလေၚ်ဂေတ်အာမာန်ဂှ် နူကဵုကာမ္မဏဳ Yangon Industrial Solutions Co.,Ltd ကေတ်တာလျိုၚ်တုဲ ပဠေဝ်ပဠေတ်မံၚ် မဒှ်ရ။
အပ္ဍဲတွဵုရး သွက်ဂွံဂွံဇြဟတ်ပၟတ် ဓါတ်လလဳဂၠိုၚ်တိုန်ဂှ် ပ္ဍဲခေတ်အလဵုအသဳ NLD တေံ နကဵုသြန်ဗာန်ဂၠးကဝ် ဂၠေံကေတ်သြန် ဒဝ်လာအမေရိကာန် ၁၄၀ ပြကောတိကိုတ်တုဲ သိုၚ်ခၞံလဝ် ရုၚ်စက်ဏံရောၚ်။
ရုင်စက်သဘာဝသၟုဟ်ဓါတ်သဓီုဂှ် နူကဵု China Energy Engineering Corporation အံင်လဝ်တေန်ဒါ သိုၚ်ခၞံလဝ်တုဲ ပ္ဍဲသၞာံ ၂၀၁၉ ဂိတုအေဗရာဂှ် စပံက်လဝ်ရုင်စက်ဂှ်ရောၚ်။
ဇြဟတ်ဓါတ်ပၟတ်လလဳ တိတ်ကၠုၚ်နူရုၚ်စက်ဂှ်တှ်ေ ချိက်စၠောံလဝ်ကဵု လိုၚ်ဓါတ်ပၟတ် ၂၃၀ KV သေတ်တိုၚ်-သဓီု၊ လိုၚ်ဓါတ်ပၟတ် ၂၃၀ KV သဓီု-မတ်မလီုတံတုဲ ပလံၚ်ဗစိုပ်ပၠုပ်ကဵုမံၚ် အပ္ဍဲသၞောတ် ဇြဟတ်ဓါတ်လလဳကၟိန်ဍုၚ် မဒှ်ရ။
ပရိုၚ် – သြၚ်လောန်တိုၚ်မ်
Photo – MOI/CJ