နယူယံက်၊ မေ ၂၃
အမေရိကာန်စဳဇန်လဝ် သွက်ဂွံသွံကဵုလွဟ် ထါဲဝါန် နွံမံၚ်ၚုဟ်မး ၁၄ ဗဳလဳယာန်ဒဝ်လာဂှ် လၟုဟ်ဏံ “ဒေါအ်လဝ်” ဗွဲယာယဳရောၚ် ညးအုပ်ကာယာယဳဒပ်ဍာ်အမေရိကာန် ဟန်ကံၚ် ဟီုလဴလဝ် အပ္ဍဲပေါဲသဳကၠဳကန်ဂရက်ရ။
စပ်ကဵုအဳရာန် သွက်ဂွံလဝေၚ်အာပၞာန် “Operation Epic Fury” ဂှ် ကပေါတ်လွဟ်ပၞာန်တံ ညံၚ်သ္ဂောံရုံဂပ် အပ္ဍဲကဵုဒပ်အမေရိကာန်တံ ကဵုဖျုန်တုဲ ဒးစၟဳစၟတ်မံၚ်ကိုပ်ကၠာဂှ်ရ ပရေၚ်ဒးသွံလွဟ်ကုထိုၚ်ဝမ်ဂှ် ဒေါအ်လဝ်မွဲခဏရောၚ် ညးအုပ်ကာယာယဳဒပ်ဍာ် ဟီုရ။
အခိၚ်ဒးရးဂပ်ဂဝ်ရောၚ် ယဝ်ရအလဵုအသဳအမေရိကာန် စၟတ်သမ္တီကဵုမှ ပရေၚ်သွံလွဟ်ပၞာန်ဍုၚ်သအာၚ်တံဂှ် ဒးဆက်ကၠောန်အာပၠန်ရောၚ် ဟန်ကံၚ် ဟီုရ။
ကြဴနူပရိုၚ်ဏံတိတ်ကၠုၚ်တုဲ လပါ်ထာဲဝါန် ဒှ်အာပရေၚ်စံၚ်တူ သၠုၚ်တိုန်မံၚ်ရ။ ဗွဲတၟေၚ် သမ္မတ ဒဝ်နယ်ထရ ဆက်ထံက်ပၚ်အာ ထိုၚ်ဝမ်ဟာ ဟွံထံက်ပၚ်ဟာ ဟီုဂှ် ဟွံချိုတ်ပၠိုတ်ဏီတုဲ ဒှ်မံၚ်ဂဝိၚ်ကီုရ။
အပ္ဍဲတရဴအာလဝ်ဍုၚ်ကြုက် တုဲကၠုၚ်ဏံဂှ် သမ္မတ ထရသဳကၠဳလဝ်ကဵုသမ္မတ ယှဳကျေအ်ဖျေန် ပရူကိစ္စပရေၚ်သွံလွဟ် ဟီုလဝ်ဂှ်လေဝ် ဒှ်အရာမၞိဟ်တံစိုတ်အာရီုလုပ်စဂၠိုၚ်ရ။ အခိၚ်ကၠာတေံမ္ဂး လပါ်အမေရိကာန် “ကေၚ်ကာပရေၚ်ထာဲဝါန်ဂှ် ဟွံသဳကၠဳကဵုဗေကျေန်ပုဟ်” ဟီုကၠုၚ်လၟိုန်ကီုလေဝ် လၟုဟ်မ္ဂး ညာတ်ကေတ်ဒဒှ်ရ မူဝါဒပြံၚ်သၠာဲအာ ဂွံဆဵုရ။
ပရူပရေၚ်သွံလွဟ်ဏံဂှ် သမ္မတကြုက် ယှဳ လေဝ် ဟီုလဝ်ကဵုသမ္မတထရ တိုက်ရိုက်ရောၚ် ဂွံတီကေတ်ရ။ ဆဂး “လပါ်လဵုမွဲလေဝ် ဟွံကဵုဒုၚ်လဝ်ဝန်ပုဟ်” ထရ ဟီုတုဲ ယဝ်ရကြုက်ဗတိုက်ထာဲဝါန်မ္ဂး နူအမေရိကာန် စဵုဒၞာကဵုဟာ ဟီုဂှ် ဟွံကလေၚ်ကဵုလဝ်သွဟ်တုဲ ဝေၚ်ပါဲလဝ်သွဟ်ဏံရောၚ်။
ဟိုတ်နူအကာဲအရာပရေၚ်ဏံတုဲ အပ္ဍဲစၠတ်ထဝ်ကန်ဂရက်အမေရိကာန် အမတ်စၠတ်ထဝ်သီုၜါဗော် နူရဳပါတ်ဗလေကန် ကေုာံ ဒဳမဝ်ကရက် တံ သွက်ဂွံဆက်သွံကဵုလွဟ် ကုထိုၚ်ဝမ်ထေက်ရောၚ် ကဵုမံၚ်ဇြဟတ်ဟရိုဟ်အိုတ်ရ။
ပ္ဍဲကၞောတ်သၞာံ ၂၀၂၅ တေံ အမေရိကာန် သ္ပလဝ်ဒတန် ပရေၚ်သွံလွဟ် ၚုဟ်မး ၁၁ ဗဳလဳယာန်ဒဝ်လာ သွက်ထာဲဝါန်ကီုလေဝ်၊ အစီအဇန်ဂွံထပ်သွံလွဟ် သွက်ၚုဟ်မး ၁၄ ဗဳလဳယာန်ဒဝ်လာပၠန်ဂှ် ဇူဒေါအ်မံၚ်လ္တူခုၚ်သမ္မတထရဂှ် ဂိတုဗွဲမဂၠိုၚ်လံကၠုၚ်မံၚ် မဒှ်ရ။
မွဲလပါ်ပၠန်လေဝ် ထာဲဝါန်ဂှ် ဒှ်ဒေသသ္ကုတ်အပိုၚ်အခြာ ဗွိုၚ်ဍုၚ်ကြုက်ပိုင်ပြဳလဝ်ရောၚ် ဟီုမံၚ်လၟိုန်တုဲ၊ ယဝ်ရနွံကၠုၚ်ပၟိက်မ္ဂး သုၚ်စောဲဇြဟတ်တုဲ သွက်သ္ဂောံကလေၚ်သီကေတ်ရောၚ် ကဵုလဝ်သတိဆက်က်ရ။
ပရိုၚ် – သြင်လောန်တိုၚ်မ် (နိဿဲ – cbsnews)