လန်ဒါန်၊ မေ ၂၆
ပ္ဍဲအကြာသတ္တဟဏံ ဝန်ဇၞော်ပရေၚ်စဵုဒၞာဗြိတိၚ် အဟိန်ဍိုက်ကၠုၚ်ၜင်ကျာဒပ်ပၞာန်ကျာ ပဝ်အာလဝ် ဗ္ဒာဲပယျဵုရတ်ယှာဂှ် ပရေၚ်ဆက်စၠောံၜင်ကျာတံ ဒးဒုၚ်ကၟာတ်ဒၞာတာ နကဵုဂျမ်မာရ။
ဂျောန်ဟာလေ အာဆဵုဂဗကဵုကောန်ပၞာန်ဗြိတိၚ် ပ္ဍဲအက်စတိုဝ်နဳယာတုဲ ပ္ဍဲဂိတုမေ ၂၁ အဟိန်ကလေၚ်စဴဗြိတိၚ်ဂှ် ပရူပရာဏံဒှ်ကၠုၚ်လဝ်ရောၚ် ဌာန်ပရိုၚ် Times ချူထမံက်လဝ် ပထမကၠာအိုတ်ရ။
အပ္ဍဲလက်ကရဴပရေၚ်ဗတိုက်လဝ်ဏံမ္ဂး ရတ်ယှာပါလုပ်မံၚ်ရောၚ် ပတေဟ်ကေတ်လဝ်တုဲ ညးဒဳၜင်ကျာတံ ဒးသုၚ်စောဲကၠုၚ် သၞောတ်ပဝ်ယာံတၞဟ်ခြာမွဲရ။
အပ္ဍဲတရဴပွိုၚ် ၃ နာဍဳဂှ် သၞောတ်ထ္ၜးဒၞာဲဂၠံၚ် GPS ၜင်ကျာ ကမၠောန်ကၠောန်ဟွံဂွံ ဒှ်အာလဝ်ရ။
ဂိတုတုဲကၠုၚ်တေံ ၜင်ကျာထံၚ်ပရိုၚ် RAF ၁ မ ပဝ်အာမံၚ် လ္တူၜဳလစံက်ဂှ် ၜင်ကျာပၞာန်ရတ်ယှာ ၂ မ ကြတ်ဒၞာတာဗွဲမအန္တရာယ်နွံနွံ အလန်ကဵုအလန်တုဲ ကြဴနူပွိုၚ်မွဲတ္ၚဲတုဲ ပရူပရာဏံဒှ်ကၠုၚ် မဒှ်ရ။
ရန်တၟံလဝ် သွက်ဂွံစွံလဝ်ပွန်ကဵု ဝန်ဇၞော်ဟာလေဟာ ဟီုဂှ် ဟွံတီမာန်ကီုလေဝ်၊ လၟေၚ်ဂၠံၚ်ၜင်ကျာအာလဝ်ဂှ် ပ္ဍဲဒၞာဲဝက်ဘ်သိုက် ဍံၚ်ဗက်ဂၠံၚ်ဒၞာဲဇိုၚ်ၜင်ကျာတံ ဆဵုကေတ်ကၠးကၠးမးမးမာန် ဂွံတီရ။
သွက်ဂွံကဵုတင်စၟတ်သမ္တီဂှ် ဆက်စၠောံလဝ်ကဵု ဌာနဝန်ဇၞော်ပရေၚ်စဵုဒၞာရောၚ် ဗဳဗဳသဳ ချူလဝ်ရ။
အပ္ဍဲလၟေၚ်တရဴ အက်စတိုဝ်နဳယာဏံ ဝန်ဇၞော်ဟာလေ ဟီုလဝ်ဂလာန် ကုကောန်ပၞာန်ဗြိတိၚ် ပါလုပ်မံၚ် ဂကောံပၞာန်နေတိုဝ် ဗ္ဒာဲပယျဵုရတ်ယှာ လ္ၚတ်မံၚ်ပရေၚ်ပၞာန်ရ။
ဂိတုတုဲကၠုၚ်တေံလေဝ် ၜင်ကျာဗတိုက်ရတ်ယှာ Su-35 ၁ မ ဂှ် ဍံၚ်လုပ်ညောန်ကြပ်ကဵုၜင်ကျာထံၚ်ပရိုၚ် Rivet Joint တုဲ စဵုကဵုသၞောတ်ကာမံက်တိုန်ၜင်ကျာပံက်အာလဝ်ဂှ် ကြပ်ညောန်ကၠုၚ်လဝ်နွံရ။
ၜၚ်ကျာဏံ သၞောတ်ဒဳအာၜင်ကျာအလဵုလဵုဂှ် ကၠောန်ကမၠောန်ဟွံဂွံ ဒှ်အာရ။
ၜင်ကျာ Su-27 ဂှ် ပဝ်ယာံအာ ဗဒါဲဂတၜင်ကျာဗြိတိၚ် ၆ ဝါပြၚ်တုဲ သၟူၜၚ်ကျာကြပ်ညောန်အာစဵုကဵု ၆ မဳတာ မဒှ်ရ။
ပရူညးဒဳၜင်ကျာတံ မနွံကဵုကွတ်ပညာဂှ် ဝန်ဇၞော်ဟာလေ ပတိုန်ဂုဏ်စရာဲတုဲ ပရေၚ်ၜၚ်ကျာရတ်ယှာ ပဝ်ယာံကြပ်ညောန်လောန်အာဂှ် ဒုၚ်တဲဟွံမာန်ရောၚ် ဟီုလဝ်ရ။
(နိဿဲ – BBC)