သိုဝ်၊ ဂိတုမေ ၂၇
နူကဵုဍုၚ်ကိုဝ်ရဳယျာသၠုၚ်ကျာ ၜၚ်ဗၠိုတ်ဍာ်သုၚ်စောဲဓါတ်နျူကလဳယျာညးတံ ပထမကၠာအိုတ်ဂှ် ပ္ဍဲလဒေါဝ်သၞာံ ၂၀၃၀ ဂှ် သွက်ဂွံဆက်မိတ် ဂစာန်အာရောၚ် ညးတာလျိုၚ်တံ ဟီုလဝ် ပ္ဍဲဂိတုမေ ၂၆ ရ။
သွက်ဂွံတာဒၞာအာ အန္တရာယ်နျူကလဳယျာ ကေုာံ ကမ်သၠောဝ် နူၜၚ်ဗၠိုတ်ဍာ်ကိုဝ်ရဳယျာသၟဝ်ကျာ ရန်တၟံတုဲ နကဵုကိုန်အစဳဇန်တၟိမွဲဂှ် ဖန်ဇန်ကၠောန်အာရောၚ် ညးတာလျိုၚ်ကိုဝ်ရဳယျာသၠုၚ်ကျာတံ ဟီုရ။
နူကဵုသိုဝ် ညံၚ်သ္ဂောံပါလုပ်အာ အပ္ဍဲဂကောံပိုၚ်ပြဳလဝ် ၜၚ်ဗၠိုတ်ဍာ် သုၚ်စောဲဓါတ်နျူကလဳယျာ ဍုၚ်အဆံၚ်သၠုၚ် တံဂှ် ဂစာန်ကၠုၚ် မံၚ်လံလ မဒှ်ရ။
ဟိုတ်နူအရာဏံတုဲ ပရေၚ်ဂီုကၠီုအာယှဂှ် ကလေၚ်ပြံၚ်သၠာဲ အာမာန်တုဲ ပရေၚ်ပြိုၚ်ပ္ကာန်လွဟ်သၟဝ်ဍာ်တံလေဝ် အသိၚ်ဇြဟတ် သၠုၚ်တိုန်မာန်ရ။
နကဵုသ္ဇိုၚ်ပရေၚ်မဟာမိတ် ကိုဝ်ရဳယျာသၠုၚ်ကျာ-အမေရိကာန် ဇြဟတ်ခိုဟ်မံၚ်တုဲ သ္ဂောံသိုၚ်ခၞံအာ ၜၚ်ဗၠိုတ်ဍာ်သုၚ်စောဲဓါတ် နျူကလဳယျာဏံ သွက်ပရေၚ်ၜိုဟ်လလမ် ကေုာံ ဂီုကၠီု တ္ကအ်ကိုဝ်ရဳယျာ ဒှ်သကေႅတဆန္ဒပိုဲတံတုဲ ကေတ်အာယိုက်တာလျိုၚ်ထမံက်ရုပ်ရဴရောၚ် သမ္မတ လဳဂျေဝ်မျံၚ် ဟီုလဝ်ကဵု ကမ္မတဳ ပရေၚ်ဗျူဟာ စဵုဒၞာအနာဂတ် ဍုၚ်နိဂီုညးတံရ။
သွက်ၜၚ်ဗၠိုတ်ဍာ်ဏံဂှ် သုၚ်စောဲယူရေနဳယာန် နွံအဆံၚ် သ္အးဇ္ၚးသဝ်ဝ်တုဲ သ္ဂောံသိုၚ်ခၞံအာ အပ္ဍဲကိုဝ်ရဳယျာသၠုၚ်ကျာရောၚ် ဝန်ဇၞော်ပရေၚ်စဵုဒၞာ အာန်ဂျူဗက် ဟီုရ။
နကဵုကိုဝ်ရဳယျာသၠုၚ်ကျာ သွက်ဂွံပိုၚ်ပြဳၜၚ်ဗၠိုတ်ဍာ် သုၚ်စောဲဓါတ်နျူကလဳယျာတံဂှ် ညးလးထ္ၜးပျးကဵုလဝ် အစီအဇန်သ္ဇိုၚ်တံရ။
ကိုန်အစဳဇန်ဏံဂှ် တန်တဴမံၚ်ကဵု သ္ဇိုၚ်သွာၚ်နျူကလဳယျာ၊ သွာၚ်သိုၚ်ခၞံၜၚ် ကေုာံ သွာၚ်ကမၠောန်ပရေၚ်စဵုဒၞာ ဍုၚ်ကိုဝ်ရိယျာသၠုၚ်ကျာတံတုဲ ချူခၞံအာ မဒှ်ရ။
ဆဂး ပရေၚ်ကဵုကၠုၚ်လဝ် ဂတိဝတ် သွက်ဂွံရာန် ဟွံသေၚ်မ္ဂး ပတိတ်လွဟ်နျူကလဳယျာတံဂှ် ဟွံဂိုတ်ဂစာန်ပုဟ်ဟီုလဝ်ဂှ် ဆက်ထိၚ်ဒဝ်အာရောၚ် ဝန်ဇၞော်ပရေၚ်စဵုဒၞာ ဟီုလဝ်ရ။
Ref:Reuters