ကအ်သံၚ်၊ ဂျောန် ၆
အပ္ဍဲကဵုရးတနၚ်သဳ ပွိုၚ်ဍုၚ်ကအ်သံၚ် ကရောၚ်ပၞာန်ဒပ်ကဝ်မယှေန် ထပက်ပၞာန်လုပ်ကၠုၚ်ဂှ် ဒးဒုၚ်မာတ်ဆိုအ်ဗတိုက်ဂှ်ရ ကောန်ပၞာန် ဒပ်ကဝ်မယှေန်ပၞာန် ၄ တၠ ချိုတ်အာလဝ်နွံရဂှ် ဂွံတီကေတ် နူဂကောံစဵုဒၞာညးဍုၚ်ကွာန် ပွိုၚ်ဍုၚ်ကအ်သံၚ်ရ။
ကောန်သ္ဂံၚ်ဒပ်ကဝ်မယှေန်ပၞာန် နူဗွိုၚ်ဒပ်ခမံက်ဂျဳ ပွိုၚ်ဍုၚ်ကအ်သံၚ် ဇြဟတ်ကောန်ပၞာန်ၜိုတ် ၂၀၀ ဂှ် စနူဂိတုမေ ၂၅ တေံတုဲ ပ္ဍဲဒေသ မလိဝါန်ကဵု ဒေသမာရာန်ဂှ် ပါ်လဝ် ၃ ကရောၚ်ပၞာန်တုဲ ဂေတ်ထပက်မံၚ် ကရောၚ်ပၞာန်ရောၚ်။
ပၞောဝ်ကဵုအကြာ ၃ ကရောၚ်ပၞာန်ဂှ်တုဲ ကရောၚ်ပၞာန်ဇြဟတ်မၞိဟ်ပါ ၜိုတ် ၇၀ တၠ မွဲကရောၚ်ပၞာန် ပ္ဍဲဂိတုဂျောန် ၁ တုဲကၠုၚ်ဏအ် အကြာဒေသကၞောတ်ၜဳ လၟိဟ် ၂ ကဵု မိုၚ်ဒကောဝ် မလိဝါန်ဂှ် နူကဵုတမ်ဒပ်ဗတိုက် (ပကဖ) ရးတနၚ်သဳ ကေုာံ ပကဖ ပွိုၚ်ဍုၚ် ကအ်သံၚ်တအ် မာတ်ဆိုအ်ဗတိုက်လဝ်ရ။
ဟိုတ်နူ ပရေၚ်ကၟာတ်ဆိုအ်ဗတိုက်ဂှ်ရ ပေါဲဗတိုက်ၜါလပါ် ဒှ်အာ အခိၚ်ကဝက်နာဍဳပြၚ်တုဲ လပါ်ဒပ်ကဝ်မယှေန်ပၞာန် ပရေၚ်ဒးဝပ် ချိုတ်ဂၠိုၚ်အာလဝ် မဒှ်ရ။
အပ္ဍဲပေါဲဗတိုက်ဏံ ကောန်သ္ဂံၚ်ဒပ်ကဝ်မယှေန်ပၞာန် ၄ တၠ ချိုတ်အာ တုဲ ပ္ဍဲ ၁၄ တၠ ဒးဝပ်ဂှ် သ္ကိုပ်ဗိုလ်မွဲတၠပါလုပ်တုဲ ကရောၚ်ပၞာန် ကလေၚ်ဆုတ်စဴအာယျရောၚ်ဂှ် ညးတာလျိုၚ်လလောၚ်ပရိုၚ် ဂကောံစဵုဒၞာညးဍုၚ်ကွာန် ပွိုၚ်ဍုၚ်ကအ်သံၚ် ဟီုကဵု ဌာန်ပရိုၚ်သြင်လောန်တိုၚ်မ်ရ။
ပ္ဍဲပွိုၚ်ဍုၚ်ကအ်သံၚ် အခိၚ်ဥတုဗြဲဏအ် ဟိုတ်နူဒပ်ကဝ်မယှေန်ပၞာန် ထပက်မံၚ်ကရောၚ်ပၞာန်ဂှ်ရ ပရေၚ်ပၞာန် အကြာၜါလပါ် အကာဲအရာကြံၚ်မ္ၚိုဟ်မံၚ်တုဲ ပေါဲဗတိုက်ဒှ်မံၚ်ဆက်က်ကီုရ။
ပ္ဍဲရးတနၚ်သဳ စနူဂိတုမေတေံတုဲ ဒပ်ကဝ်မယှေန်ပၞာန် ထပက်ကရောၚ်ပၞာန်ကီု ကြဳဗုမ်နူဗလးကျာတံကီု ကၠောန်ကၠုၚ်မံၚ် အဆက်က်ရောၚ်။
ပရိုၚ် – သြင်လောန်တိုၚ်မ်
Photo – PDF