လိုၚ်ဗၠဲ၊ ဂျောန် ၆
သ္ကိုပ်ပၞာန်သဝ်ချေတ်တူ က္ဍိုက်က္ဍိုပ် ဒပ်ကောန်ဂကူကရေၚ် KNA ပြံၚ်လဝ်ဗီုပြၚ် နူဒပ်မၚ်ပယျဵုကရေၚ် BGF သွက်ဂွံပံက်အာ တန်ဗတောန် ဒပ်(သ္ဂံၚ်ဗြဴ) ဒပ်တၟေၚ် အလန်ကၠာအိုတ် စဳဇန်မံၚ် ရောၚ်ဂှ် ဗက်ဂၠိုက်ဂၠာဲဂွံလဝ်ပရိုၚ် နူရိုဟ်ကၞက်ပရိုၚ် KNA တံရ။
အပ္ဍဲတမ်သၞာံ ၂၀၂၆ ဂိတုဂျာန်နဝါရဳ ၁ ဂှ် နူဒပ်မၚ်ပယျဵုကရေၚ် BGF ပြံၚ်သၠာဲဒက်ပတန်လဝ် ဒပ်ကောန်ဂကူကရေၚ် KNA တုဲ သ္ကိုပ်ပၞာန်သဝ်ချေတ်တူကဵု ဒုသ္ကိုပ်ပၞာန် သဝ်တေန်ဝေန် ညးဒယှ်တှ်မံၚ် ကမၠောန်လီသြန်အန်လာၚ် (ကျာဖျ) တံဂှ် သ္ကိုပ်သ္ကပၠမံၚ်တရဴ ဒပ် KNA မဒှ်ရ။
နူသၟဝ်တဲ ဒပ်ကဝ်မယှေန်ပၞာန်ဂှ် ကြဴနူပြံၚ်သၠာဲဒက်ပတန်လဝ် BGF တုဲ ဂကောံဒပ် KNA သ္ကိုပ်ပၞာန်သဝ်ချေတ်တူ သ္ကိုပ်သ္ကပၠမံၚ်တရဴတံဂှ် သွက်ဂွံယိုက်ဂၠေၚ်တာလျိုၚ်ပၞာန်မ္ဂး ကော်ကေတ်သၟတ် နူဒေသကွာန် တွဵုရးကရေၚ်တံတုဲ ထပ်ဒက်ပသၠဲ ဇၞော်ပတိုန်ကၠုၚ်ဇြဟတ်ရောၚ်။
ဂကောံဒပ် KNA ကော်နၚ်သၟတ်ယိုက်ဝန်ပၞာန်တံဂှ် ကဵုလဝ် တန်ဗတောန်ပၞာန်သ္ဇိုၚ် ဘာလၟေၚ်အလန်ကဵုအလန်ကီု၊ ကွတ်ပၞာန်သ္ဇိုၚ် သၟးဟွံက သီုကဵုနဲကဲပန်လွဟ်ဇၞော် လွဟ်ဍောတ် ကေုာံ တန်ဗတောန်ဒရုၚ်တံဂှ်လေဝ် ကဵုလ္ၚတ်ဗတောန်အာ ဗကတ်ဗကေၚ်လဝ် မဒှ်ရ။
လၟုဟ်ပြဟ်ဟ်ဏံမ္ဂး တန်ဗတောန် ဘာသ္ဇိုၚ်ကွတ်ပညာပၞာန် မောမ်မာန် သွက်ကောန်သ္ဂံၚ် ဒပ် KNA တံဂှ် ပ္ဍဲကဵုဌာန်ဂဥုပ် KNA ကွာန်လှာဒကှ် ပွိုၚ်ဍုၚ်လိုၚ်ဗၠဲ တွဵုရးကရေၚ်ဂှ် စနူဂိတုမေ ၃၀ တေံ ပံက်ကၠုၚ်လဝ်တုဲ ကွးဘာတန်ဗတောန်ဗွဲမဂၠိုၚ် တိုန်စိုပ်မံၚ်ရောၚ် ဂွံတီကေတ် နူရိုဟ်ကၞက်ပရိုၚ်ပၞာန် KNA တံရ။
တုဲပၠန် သွက်ဒပ်သ္ဂံၚ်ဗြဴတအ်ဂှ် သွက်သ္ဂောံပံက်အာကဵု တန်ဗတောန် ဒပ်တၟေၚ် အလန်ကၠာအိုတ်ဂှ် နူ KNA စံဇန်မံၚ်တုဲ ပ္ဍဲတန်ဗတောန်ဂှ် သၟတ်ဗြဴဗွဲမဂၠိုၚ်တံ ပါလုပ်တိုန်စိုပ်အာရောၚ် ဂွံတီ နူရိုဟ်ကၞက်ပရိုၚ်ပၞာန်တံရ။
ပ္ဍဲဒပ် KNA မ္ဂး သ္ဂံၚ်ဗြဴတံ ယိုက်မံၚ်တာလျိုၚ်နွံကီုလေဝ် ဒပ်တၟေၚ် သ္ဂံၚ်ဗြဴဂှ် ဟၟဲဏီတုဲ လၟုဟ်မှ သွက်သ္ဂောံကဵုအာတန်ဗတောန်ပၞာန် အလန်ကၠာအိုတ် မဒှ်ရ။
အပ္ဍဲတန်ဗတောန်ဒပ်တၟေၚ် KNA ဂှ် စနူကွတ်ပၞာန်သ္ဇိုၚ်တုဲ နဲကဲ ရပ်စပ်ပန် လွဟ်ဇၞော်လွဟ်ဍောတ်တံကီု၊ နဲကဲရံၚ်ဗှ်ဗီုတိ၊ နဲကဲသုၚ်စောဲ ဒရုၚ်၊ နဲကဲထံၚ်ပရိုၚ်တံကီု ဘာသာပရေၚ်ဍုၚ်ကွာန်၊ ဘာသာပရေၚ်ရီုဗၚ်ဟံၚ်ပြာ်၊ ပရေၚ်အာက္ဍိုပ် ကေုာံ ဘာသာစပ်ကဵု ပရေၚ်စန်ဒက်တံလေဝ် ဗတောန်ကဵုမံၚ် မဒှ်ရ။
ဒပ် KNA သ္ကိုပ်ပၞာန်သဝ်ချေတ်တူ ကဵု ဒုသ္ကိုပ်ပၞာန် သဝ်တေန်ဝေန် က္ဍိုက်ပ်ဂှ် ၜိုန်ရပါ်တိတ်ထောံ နူ BGF တုဲ ပရေၚ်ပံၚ်တောဲ ပရေၚ်ပၞာန်ကဵု ဒပ်ကဝ်မယှေန်ပၞာန်တံ ဟွံမွဲကီုလေဝ် သှ်ေမံၚ် ဒပ် BGF ဟွံပြံၚ်သၠာဲ KNA ဏီဂှ်တှ်ေ ဆက်ပံၚ်တောဲမံၚ်ကဵု ဒပ်ကဝ်မယှေန်ပၞာန် ဖိုအ်ဏီရောၚ်။
ပရိုၚ် – သြင်လောန်တိုၚ်မ်
Photo – KNA