မတ်မလီု၊ ဂျောန် ၁၂
အပ္ဍဲကဵုစၠတ်ထဝ်တွဵုရးမန် သွက်ဂွံကလၚ်ရမျှာၚ်ညးဍုၚ်ကွာန်တံ ညံၚ်ဂွံပဵုတုဲစိုပ်တရဴမာန်ဂှ် ဒက်ပတန်ကမ္မတဳလိက်တေၚ်စိုပ်တုဲ ဒုၚ်အာတဲ လိက်တေၚ်စိုပ်တံရောၚ် နူလပါ်စၠတ်ထဝ်တွဵုရး အလဵုအသဳပၞာန် ကဵုသမ္တီလလောၚ်တြးလဝ်ရောၚ်။
သွက်ဂွံပလံၚ်ဗစိုပ်အာ လိက်တေၚ်စိုပ်၊ လိက်ဓရ်ဆာန်ဍူ၊ လိက်ပတိုန်ထ္ၜးကေုာံ လိက်ကိစ္စပရေၚ်ကေၚ်ကာ နာနာသာ်တံဂှ် နူကဵုစၠတ်ထဝ်တွဵုရး ဒက်ပတန်အာ ကမ္မတဳလ္ၚတ်သ္ၚဳဂၠိပ်ဗ္စာရဏာ မွဲဂကောံတုဲ ကမ္မတဳဏံဂှ် ရန်လဝ် သွက်သ္ဂောံသောၚ်ကလးကဵု လိက်တေၚ်စိုပ်၊ လိက်အာတ်အရီုဗၚ် ပရေၚ်ဓရ်ဆာန်ဍူ ညးဍုၚ်ကွာန်တံ ပဵုတုဲညံၚ်ဂွံစိုပ်တရဴမာန်ရောၚ် သ္ဂးရ။
ယဝ်ရ ဒက်ပတန်ကမ္မတဳဏံ တုဲဒှ်အာမ္ဂး ပရေၚ်ဒုၚ်တဲ လိက်တေၚ်စိုပ်၊ ပွမစၟဳစၟတ်၊ စှ်ေရေၚ်တၠုၚ်ဗလးတိ ပ္ညဳပ္ညပ်သောၚ်ကလးအာတုဲ လတူလိက်တေၚ်စိုပ်တံမ္ဂး နကဵုတင်စၟတ်သမ္တီ လစွံစိုတ်ကမ္မတဳဂှ် ပ္ညဳပ္ညပ်ရေၚ်တၠုၚ်အာ မွဲကရောံကဵု ဂကောံအလဵုအသဳတံရောၚ် ကဵုလဝ်သမ္တီရ။
လတူလိက်တေၚ်စိုပ် ညးဍုၚ်ကွာန်တံဂှ် နူလပါ်စၠတ်ထဝ် ဗီုလဵုကေတ်တာလျိုၚ်၊ ဗီုလဵုဒုၚ်တာလျိုၚ်ကေုာံ သောၚ်ကလးဖန်ဖက်ကဵုမာန်ရောဟီုဂှ် အကာဲအရာဒးမၚ်ရံၚ်အာဒှ်မံၚ်ကီုလေဝ် လ္တူပရေၚ်ဏံမ္ဂး ညိလေဝ်ဂလာန်ပတေဟ်ဟၟဲလဝ်ပုဟ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အဓိကတာလျိုၚ်စၠတ်ထဝ်ဂှ် ဒှ်ပရေၚ်ချူခၞံဥပဒေ၊ ပရေၚ်ထိၚ်ဒဝ် ဂတးဂတန် မွဲဟာန်ကေုာံ ကလၚ်ရမျှာၚ် သ္ပစၞးညးဍုၚ်ကွာန်တံဟီုတုဲ သွက်သ္ဂောံကလၚ်ရမျှာၚ်ညးဍုၚ်ကွာန်တံ သၠဲသၠဲလးလးမာန်ဂှ် ဒးဒက်ပတန်အာ ကမ္မတဳဗီုဏံရောၚ် ဥက္ကဌစၠတ်ထဝ်တွဵုရးမန် အလဵုအသဳပၞာန် ဥူတိတ်ထွိုဲ သ္ဂးလဝ်ရ။
အပ္ဍဲလက်ထက်အလဵုအသဳ NLD တုဲကၠုၚ်တေံမ္ဂး လတူလိက်တေၚ်စိုပ် ညးဍုၚ်ကွာန်တံဂှ် နူကဵုကမ္မတဳလိက်တေၚ်စိုပ် စၠတ်ထဝ်တွဵုရးမန် စှ်ေရေၚ်တၠုၚ်အပ္ဍဲဗလးတိတံဂှ်ကီု၊ ဆဵုဂဗသဳကၠဳ ကီု၊ သၟာန်သၟုက်တင်သၟာန် အပ္ဍဲစၠတ်ထဝ်တံသၟးဟွံက ပ္ညဳပ္ညပ်ရေၚ်တၠုၚ်လဝ်ကဵု မွဲကရောံကု ဂကောံအလဵုအသဳတံ နွံကၠုၚ်လဝ်ရောၚ်။
အပ္ဍဲကဵုစၠတ်ထဝ်တွဵုရးမန် အလဵုအသဳပၞာန်လၟုဟ်ဏံမ္ဂး ကမ္မတဳဆေၚ်စပ်ကဵု ပရေၚ်ချူခၞံဥပဒေ၊ ကမ္မတဳစၟဳစၟတ် စရၚ်သြန် ညးဍုၚ်ကွာန်၊ ကမ္မတဳလ္ၚတ်သ္ၚဳဂၠိပ် ပရေၚ်ဘဏ္ဍာကိုန်အစဳဇန် ကေုာံ ကိစ္စပရေၚ်ပိုန်ဒြပ်၊ ပရေၚ်ဂကောံအလဵုအသဳတွဵုရး ဒုၚ်တာလျိုၚ်၊ ကတိဝတ်ကေုာံ တၚ်ဒုၚ်လျိုၚ်နာနာ ကမ္မတဳစၟဳစၟတ်တံသီုဖအိုတ်ဂှ် ပံက်လဝ်ကမ္မတဳ ၅ ဂကောံတုဲ ဒက်ပတန်လဝ်ရ။
ပရိုၚ် – သြင်လောန်တိုၚ်မ်
Photo – MOI