နေပျဳဒဝ်၊ ဂျောန် ၁၂
လက်ထက်အလဵုအသဳပၞာန် ပြံၚ်လဝ်ဗီုပြၚ် ညးဍုၚ်ကွာန်တံလၟုဟ်ဏံ သွက်ဂွံထမံက်အာရုပ်ရဴ လၟေၚ်ကမၠောန် ပရေၚ်ၜိုဟ်လလမ်မာန်ဂှ် ကမ္မတဳညဳသၟဟ်ဂကူ ပ္ညဳပ္ညပ်ထမံက်ရုပ်ရဴပရေၚ်ၜိုဟ်လလမ် NSPNC ကေုာံ ဂကောံမဟာမိတ်ကောန်ဍုၚ်အရၚ်ရပ်လွဟ် ထ္ပက်လဝ်စၟတ်တဲ ဒေါအ်ပန်ပှော် ၇ ဂကောံတံ စကၠောန်ဗဒှ်လဝ် ပရေၚ်ဆဵုဂ္ဗသဳကၠဳယျ။
ပ္ဍဲအရာစၟတ်သမ္တီလဝ် တင်သဳကၠဳပ္ညဳပ္ညပ်ဆဵုဂ္ဗလဝ်ဏံဂှ်တှ်ေ ညံၚ်ဂွံဒှ်ကၠုၚ် ပေါဲသဳကၠဳပရေၚ်ၜိုဟ်လလမ် ဗွဲမစိုပ်တရဴမာန်ဂှ် သီုၜါလပါ် ပံၚ်တောဲရေၚ်တၠုၚ် ညံၚ်သ္ဂောံထမံက်အာရုပ်ရဴ ပရေၚ်တင်တုပ်စိုတ် အပ္ဍဲ NCA မွဲစွံမာန် မဒှ်ရ။
တုဲပၠန် ဂကောံရပ်လွဟ်ကောန်ဍုၚ်အရၚ် နုက်တိတ်အာလဝ် နူဂၠံၚ်တရဴ NCA တံ ညံၚ်သ္ဂောံကၠိုဟ်ခၠၚ်ဒုၚ်တဲကၠုၚ် ပရေၚ်ကော်ဘိက် ဓရ်ၜိုဟ်လလမ်အလဵုအသဳတုဲ ညံၚ်သ္ဂောံကလေၚ်ပါလုပ်အာ အပ္ဍဲလၟေၚ်ကမၠောန် NCA မာန်ပၠန်ဂှ်သဳကၠဳလဝ်ရောၚ် နူကဵုအလဵုအသဳပၞာန် လလောၚ်တြးလဝ်ပရိုၚ်ရ။
နကဵုပရေၚ်ဍုၚ်ကွာန် ယှအ်ဖျေံတုဲ ဟၟဲကဵုတင်နၚ်ဒစးဒုၚ် ပရေၚ်ခုတ်စၟတ်နာနာတံ ညံၚ်သ္ဂောံကၠောန်အာညိဂှ် ဗ္တိုက်ဖ္အောဝ်ကဵုလဝ်ကီုရောၚ် နူဂကောံမဟာမိတ်ကောန်ဍုၚ်အရၚ် ရပ်လွဟ် ၇ ဂကောံ ထ္ပက်စၟတ်တဲ ပရေၚ်ဒေါအ်ပန်ပှော် ညးအခေါၚ်ဟီုဂးနွံ သ္ကိုပ်ဗိုလ်ဇၞော် သဝ်ကျဝ်ညောအ် ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လပါ်ပိုဲတံလေဝ် ပတိုန်ထ္ၜးလဝ် နွံရ။ နကဵုအလဵုအသဳ သွက်သ္ဂောံယှအ်ဖျေံအာကဵု ပရေၚ်ဍုၚ်ကွာန်တံ ကၠောန်ကဵု မုတံ၊ တုဲတှ်ေ ညံၚ်သ္ဂောံလလောၚ်တြး ပရေၚ်ဒေါအ်ပန်ပှော် ဟၟဲကဵုတင်နၚ်ခုတ်စၟတ် ဒစးဒုၚ်တအ်ဂှ် လေဝ် ဗ္တိုက်ဖ္အောဝ်လဝ်နွံရ။ တုဲတှ်ေ ပ္ဍဲအခိၚ်ကၠောန်ထမံက်အာရုပ်ရဴ လၟေၚ်ကမၠောန်ပရေၚ်ၜိုဟ်လလမ်မ္ဂး ဟွံသေၚ်ကဵုဗီုပြၚ် ပတိုန်လဝ်ရုပ်ရဴကိုန်ဂစိုတ်မွဲဟွံသေၚ် အတိုင်အကာဲအရာ ဗီုက္တဵုဒှ်မံၚ်တအ်ဂှ် ညံၚ်သ္ဂောံဒှ်အာ လၟေၚ်ကမၠောန်သၠာဲဂတးပြံၚ်အာ ဗီုပြၚ်ဂွံလောဲသွာအာဂှ်လေဝ် ပိုဲတံပတိုန်ထ္ၜးဟီုဂးလဝ် နွံမံၚ်” သာ်ဝွံ သ္ဂးရ။
သွက်သ္ဂောံပတိတ်အာ လိက်လလောၚ်တြး ပရေၚ်ဒေါအ်ပန်ပှော် ဟၟဲကဵုပရေၚ်တင်နၚ်ခုတ်စၟတ် ဒစးဒုၚ်တံတုဲ ညံၚ်သ္ဂောံရေၚ်တၠုၚ်အာ လၟေၚ်ကမၠောန် ထမံက်ရုပ်ရဴပရေၚ်ၜိုဟ်လလမ် ပြံၚ်လောဲပလေဝ်လောဲလောဲမာန်တံဂှ် သဳကၠဳလဝ်ရောၚ် အပ္ဍဲလိက်လလောၚ်တြးအလဵုအသဳပၞာန် ချူထမံက်ထ္ၜးလဝ်ကီုရောၚ်။
နူကဵု သမ္မတသီအဝဵုက္ဍိုက်ပ် ကမ္မတဳဗဟဵုထမံက်ရုပ်ရဴပရေၚ်ၜိုဟ်လလမ်ကေုာံ ညဳသၟဟ်ကောန်ဂကူဂှ် ပတဝ်လဝ်က္ဍိုပ်ကု ပရေၚ်ဖောအ်ဗြဳတောတက်ကဵု ဍုၚ်ဂွံညိၚ်ဝပ်တုဲ သွက်သ္ဂောံ ထမံက်ရုပ်ရဴ လၟေၚ်ကမၠောန်ပရေၚ်ၜိုဟ်လလမ်ဂှ် ပ္ဍဲဂိတုအေဗရာ ၂၁ တုဲကၠုၚ်ဏံ ပတိတ်လဝ်လိက်လလောၚ်တြး မွဲတၞးကီုရ။
အပ္ဍဲကဵုလိက်လလောၚ်တြးဂှ်မ္ဂး သွက်သ္ဂောံကၠောန်ဗဒှ်အာ ပေါဲသဳကၠဳဗၠးဗၠးၜးၜး ဟၟဲကဵုတင်နၚ်ခုတ်စၟတ် ဒစးဒုၚ်တံတုဲ ကော်ဘိက်ဏာ သွက်သ္ဂောံဆဵုဂ္ဗသဳကၠဳပရေၚ်ၜိုဟ်လလမ်ကု ဂကောံရပ်လွဟ်ကောန်ဍုၚ်အရၚ်တံရောၚ်။
လတူဏံမ္ဂး မဟာမိတ်ကောန်ဍုၚ်အရၚ်ရပ်လွဟ် ၇ ဂကောံ ထ္ပက်လဝ်စၟတ်တဲဒေါအ်ပန်ပှော်ကေုာံ ကမ္မတဳပ္ညဳပ္ညပ် ပရေၚ်ၜိုဟ်လလမ် NSPNC အလဵုအသဳပၞာန်တံဂှ် အပ္ဍဲဂိတုဂျောန် ၉-၁၀ ဏံ ပ္ဍဲကဵုဒၞာဲဟဝ်တေဝ် M Gallery နေပျဳဒဝ် ဆဵုဂဗသဳကၠဳလဝ်ဗွဲပလး မဒှ်ရ။
နကဵုဗီုပြၚ် နဲကဲဗီုလဵု သ္ဂောံစကၠောန်အာ လၟေၚ်ကမၠောန် ပရေၚ်ၜိုဟ်လလမ်ဂွံမာန်ရောဂှ် ကၠောန်လဝ်ပရေၚ်သၠာဲဂတး သၠဳဂၠိပ်ချပ်ဗ္စာ အကြာသီုၜါလပါ်တံတုဲ အဆံၚ်သဳကၠဳ ပ္ညဳပ္ညပ် ချိုတ်တ်ပၠိုတ်တ်ဂှ် ဟွံစိုပ်ဏီပုဟ် သ္ကိုပ်ဗိုလ်ဇၞော် သဝ်ကျဝ်ညောအ် သ္ဂးရ။
တုဲပၠန် လၟေၚ်ကမၠောန်ပရေၚ်ၜိုဟ်လလမ်ဂှ် ညံၚ်သ္ဂောံကိတ်ညဳကဵုအကာဲအရာလၟုဟ်ဏံ သွက်သ္ဂောံကၠောန်အာ လၟေၚ်အဆံၚ်ၚ်တံကီု ညံၚ်သ္ဂောံဒှ်ကၠုၚ် တၠုၚ်လအာညးဆေၚ်စပ်တံ သီုဖအိုတ်ပါလုပ်မာန်တံဂှ် အတိုၚ်လၟေၚ်ၚ် ဒးဂစာန်ရေၚ်တၠုၚ်အာရောၚ် ညးဆက်ဟီုရ။
“ပ္ဍဲကဵုပွိုၚ် ၁၀၀ တ္ၚဲဏံ ပိုဲတံစဟီုဂလာန်ပရေၚ်ၜိုဟ်လလမ်တုဲ အခက်အခုဲဍုၚ်ပိုဲဏံ သွက်သ္ဂောံ တတ်ကၠောံၜက်အာ ဍာံဍာံမာန်ဂှ် ပရေၚ်သဳကၠဳ နွံမံၚ်ပၟိက်တံဂှ် ဗီုပြၚ်လုပ်ဗဗွဲသၞောဝ်ကီု၊ ဗီုပြၚ်သဘဴဗွဲပလးကီု နကဵုနဲကဲနာနာ ပိုဲတံဒးကၠောန်အာတုဲ လၟေၚ်ကမၠောန်တံဂှ် ဇမၠိၚ်ဂၠိၚ်သ္ၚောဲအာ ဗွဲမလောန်မာန်ရောၚ်” သာ်ဝွံ သ္ဂးရ။
ကၠာဟွံစိုပ် ဂိတုဂျူလာၚ် ၃၁ အပ္ဍဲပွိုၚ် ၁၀၀ တ္ၚဲဏံ ကုဂကောံရပ်လွဟ်ကောန်ဍုၚ်အရၚ်ဒေါအ်ပှော် ထ္ပက်လဝ်စၟတ်တဲတံကီု ဟွံဂွံထ္ပက်လဝ်ဏီတံကီုဂှ် သွက်သ္ဂောံဆဵုဂဗသဳကၠဳပရေၚ်ၜိုဟ်လလမ်ဂှ် တုဲကၠုၚ်ဂိတုအေဗရာ ၂၀ တေံ သမ္မတသီအဝဵု ဥူမေန်အံၚ်လှိုၚ် ကော်ဘိက်လဝ်ရောၚ်။
မွဲလပါ်ဂှ်လေဝ် ဒပ်ပၞာန်သၟဝ်တဲ အလဵုအသဳပၞာန်တံသၠုၚ်ပတိုန်လဝ် အသိၚ်ဇြဟတ် ကၠောန်မံၚ်ပရေၚ်ပေါဲဗတိုက်ဗလးကျာကဵု ထပက်ပၞာန် ကလေၚ်ဝေၚ်မံၚ်ပၞာန်ပၠန်ရ။ ဟိုတ်ဂှ်ရ ပရေၚ်ကော်ဘိက် ဓဝ်ၜိုဟ်လလမ်အလဵုအသဳပၞာန်ဏံဂှ် လဟီုကဵုကမၠောန် ဟွံကိတ်ညဳပုဟ် ဂကောံဒပ်ပၠန်ဂတးတံ ဟီုပတိတ်လဝ်အိုတ်ရောၚ်။
အပ္ဍဲအကာဲအရာပြဟ်ဟ်ဏံမ္ဂး အကြာအလဵုအသဳပၞာန်ကဵု ဂကောံဒပ်ပၠန်ဂတးတံ ညံၚ်သ္ဂောံစိုပ် လ္တူတရဴဂၠံၚ် ပရေၚ်ဆဵုဂ္ဗသဳကၠဳတံ ဟီုဂှ် ပၟိက်အရာကိစ္စဇၞော် သွက်ဂွံဂၠာံဍစိုပ်အာ ပရေၚ်ဒေါအ်ပန်ပှော်ဟီုဂှ် လံသ္ၚောဲမံၚ်ဖိုဟ်ဏီရောၚ်။
ပရိုၚ် – သြင်လောန်တိုၚ်မ်
Photo – MOI