ကအ်ကြိက်၊ ဂျောန် ၁၃
ပ္ဍဲတွဵုရးကရေၚ် ပွိုၚ်ဍုၚ်ကအ်ကြိက် ဗ္ဒိုပ်ဒပ်ကဝ်မယှေန်ပၞာန် လုပ်ဖျေံလဝ်သ္ဇိုၚ် အပ္ဍဲကွာန်ကအ်ဗိန်ဂှ် ဒးဒုၚ်ပန်တုဲ ကောန်ဒပ်ကဝ်မယှေန်ပၞာန် ၂ တၠ ချိုတ်အာလဝ်ရောၚ် ရဲကွာန်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပ္ဍဲဂိတုဂျောန် ၁၂ ၜိုတ်အခိၚ်ဂယး ၉ နာဍဳဂှ် နူကဵုဒပ်ပၠန်ဂတးမွဲဂကောံ ဇြဟတ်မၞိဟ်ၜိုတ် ၁၀ တၠပြၚ်တံ လုပ်ပန် ဒပ်ကဝ်မယှေန်ပၞာန် ဖျေံလဝ်ဒပ် ဗ္ဒာဲဘာတန်ဒေါဝ်ပါ်ကွာန်ကအ်ဗိန် ဂှ်ရောၚ်။
ဟိုတ်နူလုပ်ပန်တုဲ ဒပ်မွဲလပါ်ကဵုမွဲလပါ် ကလေၚ်ပန်ညးသ္ကံ လံအာအခိၚ်မိနေတ်ညိညတုဲ ကောန်ဒပ်ကဝ်မယှေန်ပၞာန် ၂ တၠ ချိုတ်အာလဝ် အပ္ဍဲကဵုဒၞာဲဗ္ဒိုပ်ဂှ်ရ။
ကြဴနူဒှ်ပန်လဝ်ညးသ္ကံတုဲဂှ် ဒပ်ကဝ်မယှေန်ပၞာန် နူကဵုၜၚ်ကျာပၞာန် ကၠုၚ်ကြဳဖျေံဏာဗုမ် ၂ မ လပါ်ပလိုတ်ကွာန်ကအ်ဗိန် သ္ၚောဲခြာဗၞတ်မွဲတိုၚ်ပြၚ်ဂှ်တှ်ေ ပရေၚ်ဒးဝပ်ချိုတ်တံဂှ် ဟွံဂွံတီကေတ်ပရိုၚ်ဏီပုဟ် သ္ဂးရ။
ဒၟာနူ မွဲလပါ်ကဵုမွဲလပါ် ဒှ်ပန်ညးသ္ကံဂှ်ရ ဒပ်ကဝ်မယှေန်ပၞာန် ကၟာတ်ဆိုအ်စၟဳစၟတ်မံၚ် အပ္ဍဲကွာန်ဂှ်တှ်ေ ညးဒေသဗွဲမဂၠိုၚ်တံ ဟွံဂံၚ်တိတ်မ္ၚး ဟွံဂံၚ်အာကၠုၚ်ပုဟ် သ္ဂးရ။
စနူသၞာံ ၂၀၂၄ တေံ ဂကောံဒပ်ပၠန်ဂတးတံ ဗတိုက်သီဂွံလဝ် ဗ္ဒိုပ်ဒပ်ဗၠာဲသၟိၚ် ကအ်ဗိန်တုဲမှ ဒပ်ကဝ်မယှေန်ပၞာန် နကဵုဇြဟတ်ဗွဲမဂၠိုၚ် ကၠုၚ်ဖျေံလဝ်ဗ္ဒိုပ် အပ္ဍဲကွာန်ကအ်ဗိန် မဒှ်ကီုရ။
အပ္ဍဲဘာလကျာ်ကွာန်ကအ်ဗိန်ကီု၊ ဘာဗတောန်လိက်၊ ကျာ်ပါၚ်ကြုၚ် ကီု သီုဖအိုတ်နွံ ၄ ဒၞာဲ ဒပ်ကဝ်မယှေန်ပၞာန်တံ လုပ်ဖျေံလဝ်ဒပ်နွံမံၚ်ရောၚ် ညးဒေသတံ ဟီုလဴရ။
ကွာန်ကအ်ဗိန်ဝွံ ဒှ်ဒေသဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD အဓိက ချဳဒရာၚ်မံၚ်ပရေၚ်ပၞာန်နွံတုဲ၊ စပ်ကဵုပရေၚ်ပန်လဝ်ဏံဂှ် နူကဵုဌာန်ပရိုၚ်သြင်လောန်တိုၚ်မ် ဆက်စၠောံသၟာန်သၟုက်လဝ် ညးအခေါၚ်ဟီုဂးနွံ NMSP AD ကီုလေဝ် စဵုကဵုအခိၚ်ဏံ ကလေၚ်ဟီုလဴကဵုလဝ်ပရိုၚ် ဟၟဲဏီပုဟ်။
ပရိုၚ် – သြင်လောန်တိုၚ်မ်
Photo – Social Media