ရေဝ်၊ ဂျောန် ၁၄
အပ္ဍဲကဵုတွဵုရးမန် ပွိုၚ်ဍုၚ်ရေဝ် စပ်ကဵုပရူပရာ သွက်ဂွံ ပါ်တြးပရအ် အာကဵု သၞောတ်ဓါတ်လလဳ နူကၟိန်ဍုၚ်တုဲ ညးစၞးစၠတ်ထဝ်တွဵုရး ပွိုၚ်ဍုၚ်ကျာ်ထဝ် ဒေသဆန္ဒမာဲလၟိဟ် ၂ မာံအံၚ်ထူ သၟာန်သၟုက်လဝ် တင်သၟာန်နွံရ။
အပ္ဍဲကဵုကောံဓရီုလၟေၚ်ဍာံ ဒုတိယဝါ စၠတ်ထဝ်တွဵုရးမန် အလန်တတိယ ကၠောန်ဗဒှ်လဝ် ဂိတုဂျောန် ၁၂ တုဲကၠုၚ်ဏံဂှ် သၟာန်သၟုက်လဝ် တင်သၟာန်ဏံရ။
စပ်ကဵုပရေၚ်ကိစ္စ တင်သၟာန်လဝ်သာ်ဏံတုဲ ဝန်ဇၞော်ပရေၚ် ဓါတ်လလဳ၊ ဓါတ်၊ ကွတ်စက်ကေုာံ ပရေၚ်ဆက်စၠောံအာကၠုၚ် ဥူဇေယျာဥူ သှ်ဏာကဵုဂှ်တှ်ေ သွက်သ္ဂောံပါ်တြးပရအ်ကဵု ဓါတ်လလဳ အပ္ဍဲကဵုပွိုၚ်ဍုၚ်ရေဝ်ဂှ်တုဲ နူကဵုရုၚ်ပါ်တြးဓါတ်လလဳ ဇြပ်ဗု ဇြဟတ်လာၚ် ဓါတ် ၆၆ ကေဗွဳ ၅၂ ဒဿမ ၆ တိုၚ်ကီု ပရေၚ်ကမၠောန်သိုၚ်ခၞံ ရုၚ်ပါ်တြးဓါတ် ၆၆/၁၁ ကေဗွဳ ရေဝ်တံဂှ် ဖန်ဖက်ရေၚ်တၠုၚ်မံၚ်ဖိုဟ်ရောၚ် သ္ဂးရ။
ပြဟ်ဟ်ဏံမ္ဂး ကမၠောန်သိုၚ်ခၞံရုၚ်ပါ်တြးဓါတ် ၆၆/၁၁ ကေဗွဳ ရေဝ်ဂှ် တုဲဒှ်အာ ၁၀၀% တုဲ၊ သွက်သ္ဂောံဖန်ဖက်ရေၚ်တၠုၚ်အာ ရန်လဝ် လာၚ်ဓါတ် ၆၆ ကေဗွဳ ၅၂ ဒဿမ ၆ တိုၚ်ဂှ် ကမၠောန်တုဲအာ ၃၆ ဒဿမ ၀၉ တိုၚ်တုဲ ပေၚ်မံၚ် ၁၀၀% ရောၚ် ဟီုရ။
အတိုင်အကာဲအရာဒေသ လၟုဟ်ဏံမ္ဂး သွက်သ္ဂောံ တောဲအာဇုက် ဓါတ်လလဳပေၚ်ၚ်မာန်ဂှ် ဒးတံၚ်ဇုက်လာၚ်ဓါတ်လလဳ ၁၄ ဒဿမ ၉၃ တိုၚ် သှ်ေမံၚ်ဏီတုဲ ယဝ်ရကမၠောန်တောဲဇုက် လာၚ်ဓါတ်လလဳ တုဲဒှ်အာ ၁၀၀% မ္ဂး ဗီုကဵုဍုၚ်တၞဟ်ဟ်တံကီု တြးကဵုဏာဓါတ်လလဳမာန်ရောၚ် ဟီုဂးလဝ်ရ။
ၜိုတ်အခိၚ်ကာလလဵု သွက်သ္ဂောံတြးအာကဵု ဓါတ်လလဳ အပ္ဍဲပွိုၚ်ဍုၚ်ရေဝ်မာန်ရော ညးတၠတင်သၟာန်ဏံ ထပ်သၟာန်ဏာတုဲ နူကဵုလိက် ကလေၚ်ကဵုအာသွဟ်ရောၚ် ဝန်ဇၞော်ဟီုရ။
အပ္ဍဲတွဵုရးမန်မ္ဂး ပွိုၚ်ဍုၚ်ရေဝ်မွဲဟေၚ် ဟွံဂွံဓါတ်လလဳ နူသၞောတ်ကၟိန်ဍုၚ်ဏီတုဲ၊ ပရေၚ်ဓါတ်လလဳတံဂှ်တှ်ေ ဒးရာန်သုၚ်စောဲမံၚ် နူကဵုကာမ္ပဏဳပုဂ္ဂလိကတံ နကဵုၚုဟ်မးသၠုၚ်သၠုၚ်ရ။
ရဲဒေသပွိုၚ်ဍုၚ်ရေဝ် ဟွံဂွံလဝ်ဓါတ်လလဳ နူကဵုသၞောတ်ကၟိန်ဍုၚ်ဏီတံဂှ် နူကဵုကာမ္ပဏဳပုဂ္ဂလိကတံ တြးကဵုမံၚ် ဓါတ်လလဳ မွဲယူနေတ်မ္ဂး နူ ၃၆၀၀ ဒကေဝ် စဵုကဵု ၆၀၀၀ ဒကေဝ်ပြၚ် ဒးကဵုတုဲ သုၚ်စောဲမံၚ်အိုတ်ရ။
ပရိုၚ် – သြင်လောန်တိုၚ်မ်
Photo – Social Media