သွက်သ္ဂောံကလေၚ်လုပ်စိုပ် ပ္ဍဲဗွိုၚ်အာသဳယာန်မာန်ဂှ် သမ္မတသီအဝဵု စၟဳစမံၚ်

နေပျဳဒဝ် ၊ ဂျောန် ၁၄

ကြဴနူ သမ္မတသီအဝဵုအလဵုအသဳပၞာန် ယိုက်ဂၠေၚ်တာလျိုၚ်တုဲ စပ်ကဵု ဝန်ဇၞော်ပရေၚ်ဍုၚ်သအာၚ် နူဍုၚ်အပ္ဍဲဒေသတံ ကၠုၚ်ဆဵုဂ္ဗလဝ်တုဲဂှ် သွက်ဂွံကလေၚ်လုပ်စိုပ်အာ အကြာဗွဳဗွိုၚ်အာသဳယာန်ပၠန်ဂှ် ဥူမေန်အံၚ်လှိုၚ် စၟဳစမံၚ်ရောၚ်။

ပ္ဍဲအကြာတ္ၚဲတုဲကၠုၚ်တံဏံ ဝန်ဇၞော်ပရေၚ်ဍုၚ်သအာၚ် အေန်ဒဝ်နဳယှာ ကြဴနူကၠုၚ်လဝ်နေပျဳဒဝ် ဂိတုဂျောန် ၁၂ ဂှ်တှ်ေ ဂကောံညးစၞး ဒုသ္ကိုပ်ဝန်ဇၞော်ကေုာံ ဝန်ဇၞော်ပရေၚ်ဍုၚ်သအာၚ် ဍုၚ်လဴတံ ကၠုၚ်ဆဵုဂ္ဗလဝ်ကဵု သမ္မတသီအဝဵုရ။

အပ္ဍဲပရေၚ်ဆဵုဂ္ဗလဝ်ဂှ်မ္ဂး ညးစၞးတၟေၚ်ကေုာံ ဝန်ဇၞော်ပရေၚ်ဍုၚ်သအာၚ် နူဂကောံဍုၚ်အာသဳယာန်တံကီု ဍုၚ်သ္ၚိရေၚ်တၟေၚ်ဆက်ဇိုၚ်ဝုတ်ဒိုဟ်တံကီု ကၠုၚ်ဆဵုဂ္ဗလဝ်ဗီုဏံဂှ်တှ်ေ လတူအကာဲအရာပရေၚ်အပြံၚ်သၠာဲ ပရေၚ်ဍုၚ်ကွာန်ဍုၚ်ဗၟာဂှ် ညးတံတီညာတ် ကၠိုဟ်ခၠၚ်အာလဝ်ပေၚ်ၚ်ရောၚ် ဥူမေန်အံၚ်လှိုၚ် ဟီုရ။

တုဲပၠန် အကြာဍုၚ်ဗၟာကဵုအာသဳယာန် ဇြဟတ်ပရေၚ်ဆက်ဆောံ ညံၚ်ဂွံခိုဟ်တိုန်အာဂှ် သွက်သ္ဂောံဖန်ဗဒှ်ကဵုအခေါၚ်အရာတံနွံတုဲ ညးတံကၠုၚ်လဝ်ရောၚ် အလဵုဇကုညး ကၠိုဟ်ကေတ်မံၚ်ရောၚ် ဟီုလဴကၠုၚ်လဝ်ရ။

သွက်သ္ဂောံဂွံ ပရေၚ်သ္ပစၟတ်သမ္တီ လုပ်ဗဗွဲသၞောဝ်ပရေၚ်ဍုၚ်ကွာန် နူကဵုအာသဳယာန်ကဵုဂၠးကဝ်တံဂှ် နကဵုနဲကဲကလုတ်တမာန် ကော်ဘိက်ကော်ဆဵုဂ္ဗမံၚ် ဍုၚ်ဖိလေတ်ပိုၚ်၊ မလေယှာ၊ သေံ၊ အေန်ဒဝ်နဳယှာကေုာံ ဍုၚ်လဴတံ အတိုၚ်လၟေၚ်ၚ်ရောၚ်။

အကြာဆဵုဂ္ဗလဝ်ဂှ်မ္ဂး နကဵုဍုၚ်ဗၟာ ပံၚ်တောဲကၠောန်မံၚ် အပ္ဍဲဗွိုၚ်အာသဳယာန် ပရေၚ်ထမံက်ရုပ်ရဴတင်တုပ်စိုတ်ဘုံ ၅ တင် တၠုၚ်လအာ ညံၚ်ဂွံဒှ်ခိုဟ်အိုတ်ရောၚ် နူကဵုအလဵုအသဳပၞာန် ပလံၚ်ကဵုမံၚ် ဟရိပ်အရေဝ်ဂှ်ကီုရ။ ဆဂးဂှ် ပရေၚ်ပကီုပရာတ် တံဂှ်တှ်ေ ဆက်ကၠောန်မံၚ်ဖိုဟ်ရောၚ်။

တုဲပၠန် ဆက်ကွာ်အာမံၚ် အတိုၚ်လၟေၚ်ဂၠံၚ်တရဴ ဒဳမဝ်ကရေဇြဳ ဗော်ဇဳတံကီု နူကဵုအလဵုအသဳ ဒုၚ်ရုဲစှ်လဝ်တံမ္ဂး ညံၚ်သ္ဂောံဂွံ ဓဝ်ၜိုဟ်လလမ် အပ္ဍဲဍုၚ်ကီု သွက်ပရေၚ်ဖောအ်ဗြဳ ဍုၚ်နိဂီု ညံၚ်ဂွံတောတက်အာမာန် ဗီုဂစာန်ကၠောန်မံၚ်တံဂှ်လေဝ် လဴကဵုလဝ် ကီု မဒှ်ရ။

မွဲလပါ်လေဝ် ဥက္ကဌအာသဳယာန် ဝန်ဇၞော်ပရေၚ်ဍုၚ်သအာၚ် ဖိလေတ်ပိုၚ် ထရဳသာလာဇာရို ဂှ်တှ်ေ သွက်သ္ဂောံလ္ၚတ်အာ အကာဲအရာဗလးတိကီု သွက်သ္ဂောံဂၠာဲအာသွဟ်တံဂှ်ကီု ပ္ဍဲအကြာတ္ၚဲဂတတံဏံမ္ဂး သွက်သ္ဂောံဆဵုဂ္ဗအာကဵု ဂကောံကောန်ဍုၚ် အရၚ် ဍုၚ်ဗမာတံမာန် ရန်တၟံလဝ်ရောၚ် ပ္ဍဲဂိတုဂျောန် ၁၀ ဂှ် ဟီုပတိတ်လဝ်ရ။

သွက်ပရေၚ်ၜိုဟ်လလမ်အပ္ဍဲဍုၚ်ဂှ် အလဵုအသဳညးတံ ကော်ဘိက်လဝ်နွံတုဲ အပ္ဍဲပွိုၚ် ၅ သၞာံဏံ ညံၚ်သ္ဂောံဂွံအာ ပရေၚ်ၜိုဟ်လလမ် လၟိုန်ထာဝရမာန်ဂှ် ဂစာန်ကၠောန်အာရောၚ် ဥူမေန်အံၚ်လှိုၚ် ဟီုလဴလဝ်ကဵု ဂကောံညးစၞးဍုၚ်လဴ ကၠုၚ်စိုပ်လဝ် နေပျဳဒဝ်တံရ။

ဆဂး ပြဟ်ဟ်ဏံမ္ဂး ဆၜိုတ်ကဵုဂကောံရပ်လွဟ်ကောန်ဍုၚ်အရၚ် ဟွံဒှ်လဝ်ပေါဲဗတိုက်ကဵု ဒပ်ပၞာန်တံဂှ်ရ ဆဵုဂ္ဗကၠုၚ်လဝ်နွံတုဲ၊ ဂကောံကောန်ဍုၚ်အရၚ်ပါလုပ်မံၚ် ပရေၚ်ပၠန်ဂတးတံဂှ်တှ်ေ လ္တူပရေၚ်ကော်ဘိက်လဝ် ဓဝ်ၜိုဟ်လလမ်ဏံဂှ် ဂလာန်ပတေဟ်ဟၟဲပုဟ် ဟီုပတိတ်လဝ်ရောၚ်။

ဒပ်ပၞာန်ဂှ် ယဝ်ရ ဆက်အုပ်လဝ်ဂတာတဲ အဝဵုပရေၚ်ဍုၚ်ကွာန်မ္ဂး ဂွံပရေၚ်ၜိုဟ်လလမ်မာန် ဟွံသေၚ်တုဲ၊ လစွံစိုတ်ညးဍုၚ်ကွာန် ကောန်ဍုၚ်အရၚ်တံဏံဂှ် နကဵုအာသဳယာန်လေဝ် ဒးကၠိုဟ်ခၠၚ်လဝ်ထေက်ရောၚ် ဥက္ကဌကမ္မတဳပရေၚ်အုပ်ဓုပ် ကံၚ်သဳဖိတ်ဒရေဝ် တွဵုရးမန် နာဲမန်သာၚ် ဟီုကဵု သြင်လောန်တိုၚ်မ် ရ။

ဒုၚ်သ္ဇိုၚ်ကဵုပရေၚ်သီအဝဵု ၂၀၂၁ တုဲ နူကဵုကၠောန်လဝ်ကဵုပေါဲရုဲမာဲဂှ် အလဵုအသဳပၞာန် ဂစာန်ထမံက်ထ္ၜးမံၚ် ဗီုပြၚ်အလဵုအသဳညးဍုၚ်ကွာန်ကီုလေဝ် နူကဵုအာသဳယာန်ကီု ဍုၚ်ပွဳဗွိုၚ်ဂၠးကဝ်တံကီု ပရေၚ်သ္ပစၟတ်သမ္တီ ထံက်လဝ်ကဵုဂလာန် ဟၟဲဏီပုဟ်။

လတူဏံ အလဵုအသဳညးတံဂှ် ဒှ်အလဵုအသဳညးဍုၚ်ကွာန်ရုဲစှ်လဝ်တုဲ နူကဵုစၠတ်ထဝ်လေဝ် ရုဲစှ်ခါန်ကၞက်ကဵုလဝ် ဗီုပြၚ်သၞောတ်စှ်ေစှ်ေကီုရောၚ် ဟွံဒးလုပ်ပြိုၚ်ပေါဲရုဲမာဲမွဲသာ် ညးဒှ်ကၠုၚ် သမ္မတ ဥူမေန်အံၚ်လှိုၚ် ကြဴဇာဟီုမံၚ်ရောၚ်။

ဟိုတ်ဂှ်ရ ဍုၚ်အာသဳယာန်တံကဵု ဍုၚ်အပ္ဍဲဒေသတံဂှ် အတိုၚ်ဆန္ဒမာဲ ညးဍုၚ်ကွာန်တံကဵုလဝ် ပရေၚ်ထံက်ဂလာန်ဂှ်ကီု ဆန္ဒညးစၞးအမာတ်စၠတ်ထဝ်တံဂှ် လ္ပထၜေက်လဝ်မတ်ညိဂှ် အခိၚ်ဆဵုဂ္ဗလဝ်ကဵု ဂကောံညးစၞးဍုၚ်လဴဂှ် ညးဟီုလဝ်ရ။

လတူအလဵုအသဳဍုၚ်ဗၟာ ဂွံဒုၚ်ရုဲစှ် ယိုက်မံၚ်တာလျိုၚ်ဍုၚ်နိဂီုဏံဂှ် ဂကောံညးစၞးဍုၚ်လဴ ဘိုင်ဒတူလိုၚ်ထံက်ဂလာန်အာ ဗွဲမခိုၚ်ကၠိုက်ဗိုန်ဗတ်တုဲ သွက်သ္ဂောံအာဝေၚ်ဍုၚ်လဴ နကဵုတရဴအဆံၚ်ကၟိန်ဍုၚ်ဂှ် နူကဵုဍုၚ်လဴ ဘိက်ပၟိၚ်လဝ်ကီုရ။

နူကဵုတရဴဏံမ္ဂး ပရေၚ်ဆာန်ကၟိန် အကြာၜါဍုၚ်ကီု အကြာအာသဳယာန်တံမွဲကရောံကီု ပတေဟ်ကေတ်လဝ် ဒှ်ပရေၚ်အထံက်ပၚ်ရီုဗၚ်ဗွဲမဂၠိုၚ်ဂှ် ဟီုဂးလဝ်ရောၚ် နူကဵုအလဵုအသဳပၞာန် လလောၚ်တြးလဝ်ရ။

တုဲပၠန် နူကဵုပရေၚ်ပံၚ်တောဲကဏ္ဍစုၚ် အကြာၜါဍုၚ်တုဲ ပရေၚ်ဆက်ဆောံၜါဍုၚ်သၟးဟွံက သီုကဵုဍုၚ်အပ္ဍဲဒေသ ဍုၚ်အာသဳယာန်တံဂှ်လေဝ် အကာဲအရာသ္ဂောံသၠုၚ်ပတိုန်အာ ပရေၚ်ကဏ္ဍဆက်ဆောံတံဂှ်လေဝ် သဳကၠဳလဝ်ကီုရ။

ဥူမေန်အံၚ်လှိုၚ် သီကေတ်လဝ်အဝဵုဍုၚ်ဂှ် နကဵုအဆံၚ်အလံၚ်သမ္မတ အာလဝ်တရဴဍုၚ်အိန္ဒိယတုဲ နကဵုပရေၚ်ဘိက်ပၟိၚ် သမ္မတယှဳကျေအ်ဖျေန်ဂှ် ပ္ဍဲဂိတုဂျောန် ၁၅ ဏံမ္ဂး သွက်ဂွံအာဍုၚ်ကြုက် နွံမံၚ်ရောၚ်။

အပ္ဍဲတရဴဏံမ္ဂး ပရေၚ်ဆက်ဆောံအကြာၜါဍုၚ်၊ ပရေၚ်ပိုန်ဒြပ်၊ ပရေၚ်ဂီုကၠီုကေုာံ ပရေၚ်ပံၚ်တောဲကဏ္ဍစုၚ်တံဂှ် သဳကၠဳအာညးသ္ကံရောၚ် နူကဵုအလဵုအသဳပၞာန် လလောၚ်တြးလဝ်ပရိုၚ်ရ။

ပရိုၚ် – သြင်လောန်တိုၚ်မ်

Photo – MOI