လံၚ်လုၚ်၊ ဂျူလာၚ် ၁၂
အပ္ဍဲကဵုရးတနၚ်္သဳ ပွိုၚ်ဍုၚ်လံၚ်လုၚ် ဗ္ဒာဲကရပ်ကွာန်လေဝ်တောန်ခါန် ပ္ဍဲဂိတုဂျူလာၚ် ၁၀ အခိၚ်လဒေါဝ်တ္ၚဲဂှ် ပေါဲဗတိုက်ဒှ်လဝ်တုဲ ညးဒေသ ၁၀၀၀ ပြၚ် ဒးဂြိပ်ပါဲဒဴအောပ်မံၚ်ဒၞာဲတၞဟ်ဟ်ရောၚ် ဂွံတီကေတ် နူဂကောံဒပ်စဵုဒၞာညးဍုၚ်ကွာန် ပွိုၚ်ဍုၚ်လံၚ်လုၚ် LLPDF ရ။
အပ္ဍဲဂိတုဂျူလာၚ် ၁၀ အခိၚ်တ္ၚဲစေၚ်ၜိုတ် ၁ နာဍဳ နူကဵုဂြိုပ်ကွာန်ဂအ်အေန် ကရောၚ်ပၞာန်ဒပ်ပၞာန်ဗၟာ ဇြဟတ်ၜိုတ် ၁၈၀ လုပ်ကၠုၚ်လပါ်ကွာန် လေဝ်တောန်ခါန်တုဲ ဒှ်လဝ်ပေါဲဗတိုက်ကဵု ဒပ်ပံၚ်တောဲ PDF တံ ၜိုတ်ပွိုၚ် ၂၀ မိနေတ်နွံမံၚ် သ္ဂးရ။
မွဲအခိၚ်ဓဝ် ဆဵုညာတ်ကရောၚ်ပၞာန်လုပ်ကၠုၚ်လပါ်ကွာန်တုဲ မိၚ်အသိၚ်လွဟ် ရမျှာၚ်ပေါဲဗတိုက်ဟီုဂှ် ကောန်ကွာန်တံ ဂြိပ်ပါဲဒဴအာ ဒၞာဲဗၠးဘဲကြပ်ကဵုညးတံဂှ် ညးတာလျိုၚ် LLPDF ဟီုကဵု ဌာန်ပရိုၚ်သြၚ်လောန်တိုၚ်မ်ရ။
အပ္ဍဲပေါဲဗတိုက်ဏံ အကာဲအရာပရေၚ်ဒးဝပ်ချိုတ်လဝ် သီုၜါလပါ်တံဂှ် ဟွံဂွံတီဏီကီုလေဝ် ကြဴနူပေါဲဗတိုက်ဒှ်တုဲဂှ် ကရောၚ်ပၞာန်လုပ်အာလပါ်အပ္ဍဲကွာန်ယေန်ဗုက်ဂှ်ရောၚ် သ္ဂးရ။
ဟိုတ်နူပေါဲဗတိုက်ဒှ်တုဲ ညးဒေသနူကွာန် ညှေန်မဝ်၊ ယေန်ဗုက်၊ လေဝ်တောန်ခါန်၊ ဂအ်အေန်တံ ၁၀၀၀ ပြၚ် ဒးဂြိပ်ပါဲဒဴမံၚ် ဒၞာဲဗၠးဘဲတံရောၚ်။
အပ္ဍဲဂိတုဂျူလာၚ် ၁ တေံလေဝ် ပ္ဍဲကွာန်သေတ်ပြေဝ် ပွိုၚ်ဍုၚ်လံၚ်လုၚ် ပေါဲဗတိုက်ဒှ်တုဲ လပါ်ဒပ်ပၞာန်သီအဝဵု ဒးလဝ်ဝပ် ၅ တၠ နွံရောၚ် ဂွံတီကေတ်ရ။
ပရိုၚ် – သြၚ်လောန်တိုၚ်မ်
