ဇြပ်ဗု၊ ဂျူလာၚ် ၁၂
အပ္ဍဲတွဵုရးမန် ဍုၚ်ဇြပ်ဗု အရာပ်အံၚ်ဇေယျကဵု အရာပ်အံၚ်ကုသိုဲတံဂှ် ဂိတုဂျူလာၚ် ၁၀ အခိၚ်သဝ်တ္ၚဲတေံ ကျာလပှ်စိၚ်လပိုက်တုဲ သ္ၚိဌာန်ကရပ်ပွဳပွူ ၄၀ မ လီုလာ်အာလဝ်နွံရောၚ် ဂွံတီကေတ် နူညးဍုၚ်ကွာန် ရီုဗၚ်ရေၚ်တၠုၚ်မံၚ်တံရ။
ဂိတုဂျူလာၚ် ၁၀ အခိၚ်သဝ်တ္ၚဲ ၆ နာဍဳကဝက်ဂှ် ဗြဲဂူရိုပ်ထတ်လောန်တုဲ ကျာလပှ်စိၚ် လုပ်ထပိုက်ဏာ အသိၚ်ထတ်တ်ဂှ် သ္ၚိဌာန်စမြိုၚ်ဒၞာဲ ပ္ဍဲကဵုၜါအရာပ်ဏံ ကၟဳသ္ၚိလာ်ထောင်စာ်၊ ကၟာၚ်ဒေါမ်လီုလာ်၊ တၞံဆုတၞာၚ်ဆုတံ ကဝ်ပိုတ်အာတုဲ ဇုက်ဓါတ်တိုက်ပၟတ်ဓါတ်လလီတံလေဝ် ကဝ်ပိုတ်လီုလာ်ပေၚ်ပြးဇးမံၚ် ဒှ်ကၠုၚ်လဝ်ရောၚ် သ္ဂးရ။
ဟိုတ်နူကျာလပှ်စိၚ်လပိုက်တုဲ သ္ၚိဌာန်တံကီု ဘာဗတောန်လိက်ကဵု ဘာလကျာ်ဂမၠိုၚ် အပံၚ်သီုဖအိုတ် ၃၇ မ ကၟဳလာ်ထောင်စာ်၊ ကဝ်ပိုတ်လီုလာ်ဒေါမ်စှ်ေအာနွံမံၚ်ကီုလေဝ် ဘဲအန္တရာဲလတူမၞိဟ်တံဒးလဝ်ဘဲဝပ်ဟၟဲပုဟ် သ္ဂးရ။
တုဲပၠန် အပ္ဍဲအရာပ်တံဏံမ္ဂး တၞံဆုဇၞော်ဇၞော်ဂမၠိုၚ် ကဝ်ပိုတ်ဒေါမ်လဝ်ဂှ်ကီု၊ ဇုက်ဓါတ်ပိုတ်၊ သောပ်၊ တၞာင်ဆုပိုတ်တ် နူစမြိုၚ်ဒၞာဲသ္ၚိတံ ပေၚ်ပြးမံၚ်လတူဂၠံၚ်နွံတုဲ နူကဵုဒပ်ပလိုတ်ပၟတ် ပွိုၚ်ဍုၚ်ကဵု ဂကောံရီုဗၚ်ပရေၚ်မၞိဟ် ညးဍုၚ်ကွာန်တံ ဘိုၚ်ကဵုအရီုဗၚ်သ္အးဇ္ၚးမံၚ်အိုတ်ရ။
ဟိုတ်နူကျာလပှ်စိၚ်ဏံ ညးဍုၚ်ကွာန် ဒးဘဲဒဒိုက်ကျာ ကရပ်၂၀၀ တၠနွံတုဲ ဗက်ဇူတဴ မံၚ်စံၚ်အာအကြာ သ္ၚိမသကလောကောဒေံတံ မွဲခဏနွံမံၚ်ဂှ်ကီု၊ ညးသြန်သ္ပမာန်တံကဵု ဒၞာဲလီုလာ်အောန်န်တံဂှ် ကလေၚ်ပလေဝ်မံၚ် ကၟဳသ္ၚိဌာန်ညးတံယျရောၚ် ဂွံတီကေတ်ရ။
အပ္ဍဲဂိတုဂျူလာၚ် ၅ ဗ္တံကဵု ၆ အခိၚ်နူဂယးပြဟ်ဂှ်လေဝ် ပ္ဍဲဍုၚ်ပံၚ်ကဵု ဍုၚ်မတ်မလီုတံ လဗိုတ်ကျာပိုက်ထတ်ဒှ်တုဲ သ္ၚိဌာန်ပွဳပွူ ၁၀၀ မ လီုလာ်အာလဝ်ကီုရောၚ်။
ပရိုၚ် – သြၚ်လောန်တိုၚ်မ်
Photo – CJ