သွက်ကိုန်အစဳဇန် ဍုၚ်တၟိ လှိုၚ်ရတနာ- မတ်မလီု သုၚ်စောဲသြန် ဗာတ်ဂျက် ဂၠိုၚ်အိုတ်

မတ်မလီု၊ ဂျူလာၚ် ၁၂

အပ္ဍဲကဵုသြန်ဂအုံ သွက်ရုၚ်အလဵုအသဳတွဵုရးမန် ဂွံအခေါၚ်စကာသုၚ်စောဲအာ ပ္ဍဲသၞာံဘဏ္ဍာ ၂၀၂၆ – ၂၀၂၇ မ္ဂး ပ္ဍဲကိုန်အစဳဇန်ဍုၚ်တၟိ လှိုၚ်ရတနာ-မတ်မလီု ပံၚ်တောဲပရအ်စလဝ်ကဵု ခရိုနဳ ဥူမိုဝ်ကျဝ်ဂှ် ဒှ်ပမာဏလၟိဟ်သြန် သုၚ်စောဲလဝ် ဗာတ်ဂျက်ဂၠိုၚ်အိုတ်ရ။

သွက်သၞာံဘဏ္ဍာ ၂၀၂၆ – ၂၀၂၇ အတိုၚ်စရၚ်သြန်ဂအုံ ပရေၚ်ဘဏ္ဍာ တွဵုရးမန် ဌာန်ပရိုၚ်သြၚ်လောန်တိုၚ်မ် ဂွံလဝ်မ္ဂး ရုၚ်အလဵုအသဳတွဵုရးမန်ဂှ် ဂွံအခေါၚ်သုၚ်စောဲသြန်ဒကေဝ် ၁၄၇၅၀ ကိုတ်ပြၚ် မဒှ်ရ။

နူဏံ ၆၁ က္ဍိုပ်ကၠံ ဒှ်သြန်ကိုတ် ၉၀၀၀ ပြၚ်တံဂှ် ဂအုံသုၚ်စောဲဗဝ်စုတ်လဝ် သွက်ကိုန်အစဳဇန်ဍုၚ်တၟိလှိုၚ်ရတနာ -မတ်မလီု ဂှ်ရ။

အတိုၚ်ပရေၚ်သုၚ်စောဲသြန်ဗာတ်ဂျက် သွက်ကိုန်အစဳဇန် ဍုၚ်တၟိ လှိုၚ်ရတနာ-မတ်မလီုမ္ဂး သွက်ပရေၚ်လးဂၠံၚ် ကၠောန်ဒဒန်တံကဵု ပရေၚ်ဗဝ်တိ တံဂှ် သြန်ဗာတ်ဂျက် ၆၀၀၀ ကိုတ်၊ သွက်ပရေၚ် ဂွံသုၚ်စောဲဍာ်ဂှ် သြန်ဗာတ်ဂျက် ၁၀၀၀ ကိုတ်ကေုာံ သွက်ပရေၚ် ဂွံဓာတ်လလဳဂှ် သုၚ်စောဲလဝ် သြန်ဗာတ်ဂျက် ၂၀၀၀ ကိုတ် နွံရောၚ်။

သၟဝ်က္ဍိုပ်လိက် ဂကောံအလဵုအသဳဂးတုဲ သွက်ကိုန်အစဳဇန်ဒၞာဲတိဂအာၚ် ကိစ္စဒးသုၚ်စောဲလဝ် သြန်ဘဏ္ဍာညးဍုၚ်ကွာန်တံဂၠိုၚ်အိုတ် ဒှ်အာလဝ်သာ်ဏံဂှ်ပရေၚ်ဒှ်ဟွံထေက်ပုဟ် သၟာပရေၚ်ဍုၚ်ကွာန် ဝှ်ကြံၚ်မွဲတၠ ပါ်ပါဲလဝ်ရ။

“ဍာံဍာံမ္ဂး သုၚ်စောဲသြန် သွက်လးဂၠံၚ်ကၠောန်ဒဒန် သွက်ပလေဝ်တိဂအာၚ်တံဏံ သၟဝ်က္ဍိုပ်လိက်အလဵုအသဳဂှ် ဒှ်ဟွံထေက်ပုဟ် အဲညာတ်ရ။ ကွေံကွေံဂှ် ယဝ်ရ စုတ်လဝ်သၟဝ်က္ဍိုပ်လိက် အလဵုအသဳဍာံဍာံမ္ဂး ဇၟာပ်အရာပရေၚ်သုၚ်စောဲသြန် ဒၞာဲသီုဖအိုတ်တံဂှ် နူကဵုအလဵုအသဳ စဳရေၚ်ဖန်ဖက်အာတိုက်ရိုက်မာန်မှ ခိုဟ်ဏောၚ်”သာ်ဝွံ သ္ဂးရ။

တုဲပၠန် သြန်ဂအုံပရေၚ်ဘဏ္ဍာ ဂကောံအလဵုအသဳတွဵုရးဂှ် သွက်ပရေၚ်ဖောအ်ဗြဳသာယာပွိုၚ်ဍုၚ် အပ္ဍဲတွဵုရးဂှ်ရ ထေက်ကဵုဒးသုၚ်စောဲသြန် သၞောတ်ဗ္ၜတ်တုပ်သၟဟ်တုဲ၊ ဗဝ်ဂအုံသုၚ်စောဲလဝ်သွက်ပရေၚ်ကိစ္စမွဲဒၞာဲဓဝ် သာ်ဏံဂှ် ဒှ်ဟွံထေက်ပုဟ် ညးဆက်ဟီုရ။

အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ် လ္ၚတ်တီလဝ်မ္ဂး ပရေၚ်သုၚ်စောဲသြန် သွက်ကိုန်အစဳဇန်ဍုၚ်တၟိလှိုၚ်ရတနာမတ်မလီုဂှ် သွက်ပွိုၚ်မွဲသၞာံ ဂကောံဗဂဵုလဟဵုသာယာတွဵုရးမန် သုၚ်စောဲဘဏ္ဍာ ၁၀ ပွိုၚ်ဍုၚ်တံဂှ် ခြာမံၚ်ၜိုတ်သြန် ၁၀၀၀ ကိုတ်ဓဝ်ရ။

သွက်သၞာံဘဏ္ဍာ ၂၀၂၆ – ၂၀၂၇ ဂှ် ဂကောံဂဵုလဟဵုသာယာတွဵုရးမန် ဂွံအခေါၚ်သုၚ်စောဲသြန် ၁၀၀၀၀ ကိုတ်ရ။

တုဲပၠန် ဌာနပရေၚ်ဂၠံၚ်ဍာန်တွဵုရး သြန်ဗာတ်ဂျက် ၁၀၀၃၀ ကိုတ်၊ ဌာနပရေၚ်ဖောအ်ဗြဳ ဂၠံၚ်ဒေသကွာန်ရး ၁၀၀၀၀ ကိုတ်၊ ကမၠောန်ပါ်တြး ပရေၚ်ဓာတ်လလဳတွဵုရး ၁၀၅၀၀ ကိုတ် ဂွံအခေါၚ်သုၚ်စောဲလဝ်ရောၚ်။

ပရေၚ်သုၚ်စောဲသြန် သွက်ကိုန်အစဳဇန်ဍုၚ်တၟိလှိုၚ်ရတနာဂှ် တုပ်မံၚ်ကဵုအကာဲအရာဌာနပရေၚ်ဂၠံၚ်ဍာန်တွဵုရး၊ ဌာနပရေၚ်ဖောအ်ဗြဳ ဂၠံၚ်ဒေသကွာန်ရး၊ ကမၠောန်ပါ်တြး ပရေၚ်ဓာတ်လလဳကေုာံ ဂကောံဂဵုလဟဵုသာယာတွဵုရးမန်တံ ရ။

စပ်ကဵု ပရေၚ်ကိုန်အစဳဇန် အခိၚ်ကၠာတေံမ္ဂး ပတိုန်ထ္ၜးသ္ပဒတန်ပ္ဍဲစၠတ်ထဝ်တုဲမှ ဖန်ဖက်ကၠောန်အာဂွံတုဲ ပရေၚ်သုၚ်စောဲသြန်ဗာတ်ဂျက် ဂကောံအလဵုအသဳလၟုဟ်ဏံဂှ် အတိုၚ်ဗီုပၟိက်စိုတ်ညးတံ မိက်ဂွံဖန်ဂှ် စဳရေၚ်ဖန်ဖက်လဝ်ရောၚ် အမာတ်တြေံ နူကဵုပွိုၚ်ဍုၚ်သဓီု ဥူအံၚ်ကျဝ်တူ ဟီုကဵု  ဌာန်ပရိုၚ်သြၚ်လောန်တိုၚ်မ်ရ။

“အတိုၚ်နဲကဲဥပဒေစၠတ်ထဝ်မ္ဂး ယြဴကိုန်အစဳဇန်လဵုမွဲဟွံဟီု ယဝ်ရကၠောန်မ္ဂး ဒးပတိုန်ထ္ၜးစၠတ်ထဝ် ကေတ်တၚ်တုပ်စိုတ်တုဲမှ ကၠောန်ဂွံဏောၚ်။ ဒၞာဲဏံ တၚ်ဒးချပ်ကိုပ်ကၠာမွဲဂှ် ပ္ဍဲရုၚ်ဂကောံအလဵုအသဳလၟုဟ်ဏံဂှ် အေန်ဂျေန်နဳယျာ စီုသကီုပရေၚ်ကမၠောန်တံ နွံမံၚ်ကီုဟာ၊ ဟွံသေၚ်သာ်ဂှ်တုဲ ဟီုမံၚ်ပရေၚ်ဗာတ်ဂျက် ဂကောံအလဵုအသဳမ္ဂး သြန်ဗာတ်ဂျက်တံဏံဂှ် ဒှ်မံၚ်ဗီုပၟိက်စိုတ် မိက်ဂွံစဳရေၚ်ဖန်ဖက်ကေတ် နကဵုဇိုၚ်တဲညးတံဟေၚ်” သာ်ဝွံ သ္ဂးရ။

တုဲပၠန် စပ်ကဵုပရေၚ်ကိုန်အစဳဇန် ဒၞာဲတိဍုၚ်တၟိလှိုၚ်ရတနာဏံတုဲ ဂကောံအလဵုအသဳသုၚ်စောဲလဝ် သြန်ဂအုံဘဏ္ဍာကွေံကွေံ ဍာံဍာံကီုဟာ၊ သြန်ဂွံနၚ် သွံဒၞာဲဂအာၚ်တိတံ ဗီုလဵုသုၚ်စောဲမံၚ်ရော စနူပရေၚ်တံဏံဂှ် ညးစၞးစၠတ်ထဝ်တံ ထေက်ကဵု ဒးဂၠိုက်ဂၠာဲထမံက်ထ္ၜးအာရောၚ် ညးဆက်ဟီုရ။

ကိုန်အစဳဇန်ဍုၚ်တၟိလှိုၚ်ရတနာဂှ် ရန်လဝ် သွက်ကောန်ဇာတ် ကၟိန်သ္ၚိဌာန်ကောန်ပၞာန် စုတိကလိလောန်လဝ်တံကဵု သွက်ညးယိုက်ဝန် အလဵုအသဳဒေါအ်ဇူတံကီုလေဝ် ဗွဲကြဴဏံမ္ဂး ဒၞာဲဂအာၚ်တိ ထမံက်ပတိတ်ဂွံလဝ် နူကိုန်အစဳဇန်ဏံဂှ် ခရိုနဳမတ်မလီု ဥူမိုဝ်ကျဝ်ကဵု ညးတာလျိုၚ်ကံၚ်သဳပၞာန်တွဵုရးကၠာတံ ကလေၚ်သွံစလဝ်တုဲ ဂွံဏာသြန် ကိုတ်လ္ၚီပြၚ်နွံရောၚ်။

စပ်ကဵုပရေၚ်ကိစ္စ ကိုန်အစဳဇန်ဍုၚ်တၟိလှိုၚ်ရတနာ ခရိုနဳ ဥူမိုဝ်ကျဝ်ကဵု ကံၚ်သဳပၞာန်တွဵုရးကၠာတေံ ပံၚ်တောဲရေၚ်တၠုၚ်လဝ်ဂှ် ဂိတုဂျောန် ၁၆ တုဲကၠုၚ်တေံ ပ္ဍဲကဵုစၠတ်ထဝ်တွဵုရးမန် ညးစၞးစၠတ်ထဝ် တွဵုရး ပွိုၚ်ဍုၚ်ကျာ်မြဟ် ဒၞာဲဆန္ဒမာဲလၟိဟ် ၂ ဥူတဇြေန် ကေၚ်သၟာန်လဝ်ဂလာန်နွံရ။

သွက်ဂလာန် တင်သၟာန်ဏံဂှ် နူဂကောံအလဵုအသဳတွဵုရးမန် ဝန်ဇၞော်ပရေၚ်ဗဂဵုလဟဵုသာယာ ဒံက်တာအံၚ်မျာတ်ကျဝ်သိၚ် သှ်ကဵုလဝ်ဂှ်တှ်ေ နူကိုန်အစဳဇန်ဍုၚ်တၟိလှိုၚ်ရတနာဏံဂှ် သွက်ညးယိုက်ဝန်အလဵုအသဳတံဖျေံကဵုလဝ် ဒၞာဲတိဂအာၚ်  ၁၃၀၃ ဂအာၚ်တုဲမံၚ်တုဲ သွက်ဂွံထပ်ဖျေံကဵုဂအာၚ်သ္ၚိ သွက်ညးယိုက်ဝန်တံဂှ်ဟၟဲပုဟ် သ္ဂးလဝ်ရ။

ဒၞာဲခံက်တိဂအာၚ် လၟိဟ်လ္ၚီပြၚ်ထမံက်ပတိတ်ဂွံလဝ် နူကိုန်အစဳဇန်ဍုၚ်တၟိလှိုၚ်ရတနာဂှ် ပါ်လဝ် ၃ ဂကူ ဇြုၚ် A, B, C တံတုဲ၊ အတိုၚ်ဇြုၚ်တံဏံမ္ဂး တိဂအာၚ်သ္ၚိ မွဲမွဲခံက်မ္ဂး စနူ ၇၅၀ ကိုတ် စဵုကဵု ၄၀၀၀ ကိုတ်ပြၚ် ၚုဟ်မးမံက်မံၚ်တုဲ အခိၚ်လၟုဟ် ဒၞာဲခံက်ဂအာၚ်သ္ၚိ လ္ၚီပြၚ်ၚ် ဆက်သှ်ေမံၚ်ဏီရောၚ် ဂၠိုက်ဂၠာဲသၟာန်သၟုက်တုဲ ဂွံတီလဝ်ရ။

ပရိုၚ် – သြၚ်လောန်တိုၚ်မ်
Photo – Social Media