ဍာ်ဗု၊ ဂျူလာၚ် ၁၄
အပ္ဍဲရးတနၚ်္သဳ ပွိုၚ်ဍုၚ်ဍာ်ဗု ဒေသနဗုလေဝ် ကရောၚ်ပၞာန် ဒပ်ပၞာန်သီအဝဵု လုပ်ကၠုၚ်လပါ်သၞေဟ်ၜၚ်ဇြိုဟ်ထဝါဲဂှ် စံၚ်ပလီုထောံလဝ် သ္ၚိဌာန်ညးဍုၚ်ကွာန်တံဂှ်ရ ညးဒးဂြိပ်ပါဲနွံကၠုၚ် ၄၀၀၀ ပြၚ်ယျ ဂွံတီကေတ် နူကောန်ဂကောံစဵုဒၞာဒေသတံရ။
ဒပ်ပၞာန်ဇြဟတ်နွံမံၚ် ၜိုတ် ၇၀၀ ပြၚ်တံ စထပက်ကၠုၚ်ကရောၚ်ပၞာန် နူဂိတုဂျူလာၚ် ၉ တေံတုဲ တ္ၚဲဂျူလာၚ် ၁၁ ဂှ် စံၚ်ပလီုထောံသ္ၚိဌာန် ပ္ဍဲကွာန်ဧကနိဂှ်ကီု ပ္ဍဲဂျူလာၚ် ၁၂ ဂှ်လေဝ်စံၚ်ပလီုထောံသ္ၚိဌာန် ပ္ဍဲကွာန်ဝဇြောန်တဝ်ရောၚ် သ္ဂးရ။
ကရောၚ်ပၞာန်ဝွံ လုပ်ဂၠံက်ဂၟာဲဒၟံၚ် ပ္ဍဲကွာန်အဆက်ဆက်တုဲ စံၚ်သ္ၚိကီုလုပ်ဂၠာဲအပ္ဍဲသ္ၚိတံကီု၊ စၟဳစၟတ်မၞိဟ် ဆဵုမလတူဂၠံၚ်မ္ဂး ဗက်သၟာန်သၟုဟ်စၟဳစၟတ်မံၚ်တုဲ ကောန်ကွာန်ဒးဂြိပ်ပါဲဘဲပၞာန်တံဂၠိုၚ်တိုန်မံၚ်ရဂှ် ကောန်ဂကောံစဵုဒၞာဒေသ မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဟိုတ်နူဒပ်ကရောၚ်ပၞာန်စံၚ်လဝ်ဂှ်ရ သ္ၚိဌာန်နူကွာန်ဧကနိ ၜိုတ် ၂၀ မ ကေုာံ သ္ၚိဌာန်နူကွာန်ဝဇြောန်တဝ် ၂ မ ပၟတ်တူလီုလာ်ဆောံလေၚ်အာလဝ် နွံရ။
စဵုကဵုဂိတုဂျူလာၚ် ၁၃ ဏံဂှ် ကရောၚ်ပၞာန်ဆက်ချဳဒရာၚ်မံၚ် အကြာပွဳဗွိုၚ် ကွာန်သာယာကုန်အေၚ်တုဲ ညးဍုၚ်ကွာန် ၄၀၀၀ ပြၚ် နူကဵုကွာန်ဝက်ချံၚ်၊ ခမံက်ချံၚ်၊ ဧကနိ၊ ဝဇြောန်တဝ်၊ ယၚေဝ်၊ သာယာကုန်အေၚ်၊ ကညေန်အေၚ်တံ ဒးဂြိပ်ပါဲအောပ်မံၚ် ဒၞာဲဗၠးဘဲတံရောၚ်။
တုဲပၠန် စနူကရောၚ်ပၞာန်ဏံထပက်လုပ်ကၠုၚ်ဂှ် ရပ်ကၠေၚ်လဝ် ညးဒေသ ၃၀ တၠပြၚ်တံနွံကီုလေဝ် စဵုကဵုတ္ၚဲဏံ ဟွံဗလးကဵုဏီပုဟ် ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media