မတ်မလီု၊ ဂျူလာၚ် ၁၈
နူက္ဍိုပ်သ္ကိုပ်ပၞာန်သီအဝဵုဂှ် ဥူမေန်အံၚ်လှိုၚ် ယိုက်ဂၠေၚ်ဒၟံၚ်တာလျိုၚ် သမ္မတ အပ္ဍဲဂကောံဒပ်ပၞာန်ပြံၚ်လဝ်ဗီုပြၚ် အလဵုအသဳဂှ် ပေၚ်စိုပ်အာ ပွိုၚ် ၁၀၀ တ္ၚဲကီုလေဝ် အခေါၚ်အရာဒဳမဝ်ကရေဇြဳ သုန်ဂြာံအာလဝ်တံဂှ် ဆက်ထမံက်အာရုပ်ရဴဟွံမာန်ဏီပုဟ်။
အပ္ဍဲဂိတုအေဗရာ ၁၀ တုဲကၠုၚ်တေံ ကၠောန်လဝ်ကောံဓရီုလၟေၚ်ဍာံကိုပ်ကၠာအိုတ် စၠတ်ထဝ်ကၟိန်ဍုၚ် အလန်တတိယဂှ် ဥူမေန်အံၚ်လှိုၚ် ယဵုဒုၚ်သစ္စာ နဒဒှ်သမ္မတကၟိန်ဍုၚ်တုဲ ဒက်ပ္တန်လဝ်ဂကောံအလဵုအသဳ ကၟိန်ဍုၚ် ဒှ်မံၚ်အလဵုအသဳပြံၚ်လဝ်ဗီုပြၚ်ရ။
ကၟိန်ဍုၚ်ဗၟာဂှ် ကလေၚ်ဖျေံစွံလဝ်ဇိုၚ် လတူဂၠံၚ်တရဴဒဳမဝ်ကရေဇြဳတုဲ ဂါံကွာ်ပတဝ်အာဒၟံၚ် ဇရေၚ်အနာဂတ်ခိုဟ်သန်တေံရောၚ် အပ္ဍဲဂလာန်ပထမကိုပ်ကၠာအိုတ် အခိၚ်ဒုၚ်တဲတာလျိုၚ်သမ္မတဂှ် ညးကြဴဇာ ကညာၚ်ကမြေဲ ဟီုဂးလဝ်ရ။
ပြဟ်ဟ်ဏံ နတဲမ္ဂး ပရေၚ်ပန်ဗတိုက်ပၞာန်ကျာ စွံပွန်လတူညးဍုၚ်ကွာန်တံကဵု စမြိုၚ်ဒၞာဲညးဍုၚ်ကွာန်တံကီု၊ ပွမဖံက်ပကဝ်အခေါၚ်အရာမၞိဟ်တံကီု၊ ပရေၚ်ဂီုကၠီုဟၟဲတံဆက်နွံမံၚ်တုဲ၊ အခေါၚ်ဟီုဂးချူဆန်သၠးပွးတံလေဝ် ဆက်တုဲ ဒးဒုၚ်ထိၚ်ကြာပ်လဝ်ဖအိုတ်ရောၚ်ဂှ် တၚ်နၚ်တံဏံထမံက်ထ္ၜးမံၚ်ရ။
အတိုၚ်တၚ်နၚ် ဂွံလဝ်နူဂကောံ “ရမျှာၚ်” မ္ဂး စနူအခိၚ်သီအဝဵု စဵုကဵုအခိၚ်လၟုဟ်ဏံ ပရေၚ်ကေန်မရာ CCTV တံ၊ သၞောတ် PSMS ကေုာံ Biometric Data တံပံၚ်ပစပ်တုဲ မၚ်စၟဳစၟတ်မံၚ်ညးဍုၚ်ကွာန်တံ အခိၚ်ပေၚ်ၚ်၊ သွက်ဂွံကၟာတ်ဒမၠုပရိုၚ် အပ္ဍဲဒေသပဋိပက္ခတံဂှ်လေဝ် အလဵုအသဳပၞာန်တံ ကုတ်ထပိုတ်လဝ် လိုၚ်အေန်တာနိတ်တံရောၚ်။
အပ္ဍဲသၟဝ်တဲတၠအဝဵုမွဲတၠဂှ် အဟိန်ဒက်ပ္တန်အာမံၚ်ပရေၚ်ယန္တရာ ဍဵုဍိုက်တံဂှ် ပဵုတုဲညံၚ်ဂွံထိၚ်ကြာပ်အာ ပရေၚ်အခေါၚ်အရာမၞိဟ်ကေုာံ အခေါၚ်အရာပရေၚ်ဒဳဂျေတ်တေလ်တံဂှ် ပလေဝ်စဒၟံၚ်ရောၚ် ညးလ္ၚတ်တံ ထံက်ထ္ၜးအိုတ်ရ။
ကမၠောန်အလဵုအသဳပၞာန် ပြဟ်ဟ်ဏံဂှ် ဒှ်မံၚ်ဗီုပြၚ်ကလေၚ်စိုပ်အာသၟဝ်တဲတၠအဝဵု မွဲဝါပၠန်ရောၚ် နူဂကောံကိုန်အစဳဇန် အေန်တာနိတ်ဗၟာ MIP ညးလ္ၚတ်အခေါၚ်ဗၠးၜးဒဳဂျေတ်တေလ် ကိုတေတ်ဥာဏ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပရေၚ်ပလေဝ်စလဝ် လပါ်ခိုဟ်တံဂှ် ပိုဲတံဟွံဆဵုလဝ်ဏီပုဟ်။ စနူ ၂၀၂၁ တေံဂှ် ကလေၚ်စိုပ်အာ သၟဝ်တဲတၠအဝဵုမွဲဝါပၠန်ရ။ နူဂှ်မွဲကဆံၚ် ဒးဇီုကပိုက်မံၚ်ကဵု အကာဲအရာ ပဵုတုဲကြေပ်ကၠုၚ်ဂှ်ရ။ ကၠောန်ပရေၚ်ကိစ္စတံမ္ဂး အယောၚ်အလာ ပဵုတုဲဂွံကြေပ်တိုန်အာသၟး ပိုဲတံဆဵုမံၚ်။ ဍေံတံကဵုဍေံတံ ၁၀၀ တ္ၚဲဟွံက ၜိုတ်လဵုဒှ်ဒှ်လေဝ် ကိစ္စဟၟဲပုဟ်၊ သွက်ပိုဲတံမ္ဂး အကာဲအရာတၟေၚ် မုလေဝ်ဟၟဲပုဟ်”သာ်ဝွံ သ္ဂးရ။
အတိုၚ်တၚ်နၚ် MIP မ္ဂး အကြာပွိုၚ် ၃ ဂိတု တုဲကၠုၚ်ဏံ ဟိုတ်နူပရေၚ်ဗတိုက်ပၞာန်ကျာဒပ်ပၞာန်သီအဝဵုတံတုဲ ညးဍုၚ်ကွာန်ကောန်အရာပ် ၃၁၄ တၠ ချိုတ်အာလဝ်နွံ ဂွံတီရ။
ဣဏံဂှ် အပ္ဍဲအခိၚ်ဥူမေန်အံၚ်လှိုၚ် ကေတ်လဝ်တာလျိုၚ်သမ္မတ စနူဂိတုအေဗရာ စဵုကဵုဂိတုဂျောန် သၞာံဏံဂှ် ပါဲနူရးလ္ဂုၚ်တုဲ ပ္ဍဲရး၊ တွဵုရးတၞဟ်ဟ်တံမ္ဂး ပရေၚ်ဗတိုက်ပၞာန်ကျာက္တဵုဒှ်လဝ် ဟွံအောန်နူကဵု ၅၂၀ ဝါနွံတုဲ၊ ဗွဲမဂၠိုၚ်တံဂှ် က္တဵုဒှ်လဝ် ပ္ဍဲကဵုဒေသဒးဒုၚ်ကုတ်ထပိုတ်လဝ် လိုၚ်အေန်တာနိတ်တံရောၚ်။
ဟိုတ်နူပရေၚ်ဗတိုက်တံဏံတုဲ စမြိုၚ်ပရေၚ်ဘာသာ ၂၂ မ၊ ဘာဗတောန်လိက် ၁၇ မ၊ ရုၚ်ဂဥုဲ ၇ မ ကေုာံ ဗဒိုပ်ဒဴပၞာန် ၅ ဒၞာဲ ပါလုပ်မံၚ်ရောၚ် ပ္ဍဲလိက်လလောၚ်တြး MIP ပတိတ်လဝ်ဂှ် ထမံက်လဝ်ရ။
နူကဵုဒပ်ပၞာန်သီအဝဵုဂှ် ယဝ်ရရံၚ်အာ ဂကောံအလဵုအသဳပြံၚ်လဝ်ဗီုပြၚ်ကဵု စၠတ်ထဝ်တံမ္ဂး ညးကေတ်လဝ်တာလျိုၚ်အဆံၚ်သၠုၚ်ၚ်တံဂှ် ဒှ်ညးတာလျိုၚ်ပၞာန်တြေံတံသၟး အုပ်လဝ်ဂတာတဲတုဲ ပ္ဍဲဒၞာဲဂဥုပ်ဒပ်ဂှ်လေဝ် ပအပ်လဝ်တာလျိုၚ် ကုသ္ကိုပ်ပၞာန်ဇၞော် ယေဝ်ဝေန်ဥူ ရောၚ်။
အပ္ဍဲအကာဲအရာဏံ အခေါၚ်ဟီုဂးချူဆန်တြးပတိတ်ဗွဲမသၠးၜး ကြက်ရှ်သာပရေၚ်ဒဳမဝ်ကရေဇြဳဂှ်မ္ဂး သွက်ညးဍုၚ်ကွာန် နွံသၟဝ်ယန္တရာပရေၚ်အုပ်ဓုပ်အလဵုအသဳပၞာန်တံဂှ် ဆက်ဒးဒုၚ်ကၟာတ်လဒဵုလဝ်ဖအိုတ်တုဲ သီုကဵုဒးဒုၚ်မၚ်ရံၚ်မံၚ် ပွိုၚ် ၂၄ နာဍဳရောၚ်။
အတိုၚ်ပရေၚ်လိက်စၟတ်သမ္တီဂကောံ “ရမျှာၚ်” မ္ဂး အပ္ဍဲဂိတုဂျောန်ဂှ် ဟိုတ်နူချူတၚ်စၟတ်သမ္တီ ပ္ဍဲအန်လာၚ်ကေုာံ ပွမပါ်ပရအ်တြး ပတိုန်လဝ်ပိုအ်(Post) ပရေၚ်ဒစဵုဒစးဒပ်ပၞာန်တုဲ မၞိဟ်ဒးဒုၚ်ရပ်လဝ် ၄ တၠနွံတုဲ၊ ပါဲနူဂှ် အစာချူလိက် ဥူတေန်ညောအ် ကေုာံ ကောန်တြုံညးဂှ်လေဝ် နကဵုၝောံပိုဒ် ၅၀၅ (က) ဥပဒေပရေၚ် ဖ္ဍိုက်ဟရိုက်ဍုၚ်နိဂီုဂှ် အလဵုအသဳပၞာန် ဖျေံထောံဒုဟ်ထံၚ် ၃ သၞာံရ။
ပ္ဍဲအေဗရာ တုဲကၠုၚ်တေံလေဝ် လိုင်သေန်ကမၠောန်ဌာန်ပရိုၚ် “Chin World, KHONUMTHUNG MEDIA GROUP, မျက်မှောက်ခေတ်, မြေလတ်အသံ, Red News Agency ကေုာံ Asia Citizens” တံဂှ်လေဝ် နကဵုဟိုတ်ပရေၚ်ဂီုကၠီု ဍုၚ်နိဂီုတုဲ နူကဵုအလဵုအသဳပၞာန် ကၟာတ်ဗဒေါအ်သီထောံလဝ်ဏီရ။
တုဲပၠန် ဟိုတ်နူယိုက်ဝန်ပၞာန် ပရေၚ်ဒးဒုၚ်ရပ်မံၚ်နကဵုဟိုတ်နာနာတံတုဲ ပရေၚ်အာတ်သြန်လောန်ၜက်ကဵုဆတံလေဝ်ဆက်နွံမံၚ်တုဲ သုၚ်စောဲမံၚ်သၟတ်တံ နကဵုဗီုပြၚ်ဂဒံၚ်မၞိဟ် ပ္ဍဲဒၞာဲမုက်ပၞာန်ဂှ်လေဝ် ဒေါအ်ထောံလဝ်ဟွံသေၚ်ပုဟ်။
အပ္ဍဲပွိုၚ် ၁၀၀ တ္ၚဲဏံ ပရေၚ်ကမၠောန်ပရူဒဒှ်ပတဝ်လဝ်က္ဍိုပ်ကဵု ဇရေၚ်ပရေၚ်အပြံၚ်လှာဲ ပြာပြာကတ်ကတ်တံဟၟဲတုဲ ပရေၚ်ဒပ်ပၞာန် ဆက်အုပ်ဓလီုဂှ်ရ ဒြဟတ်ထတ်မံၚ်ဖိုဟ်ရောၚ် နူကဵုဖံၚ်ဒေယှေန် အခေါၚ်အရာမၞိဟ် ညးဍုၚ်မန် နာဲအဲမန် သ္ၚဳဂၠိပ်လဝ်ရ ။
“အကာဲအရာတံ ပဵုပရေံကၠုၚ်ရ။ ဟိုတ်ဂှ်တုဲ အပ္ဍဲပွိုၚ် ၁၀၀ တ္ၚဲဏံ ပရေၚ်ပြံၚ်လှာဲ ပြာပြာကတ်ကတ်တံဂှ် ဒှ်ဆၜိုတ် ပွမပြံၚ်လှာဲယၟုညးတာလျိုၚ်တံ ဗီုပြၚ်ဒက်ပ္တန် ဂကောံပၞာန်တံဏံသၟးရ။ ပိုဲတံဟီုမံၚ်လၟိုန်ရ နူဂကောံပၞာန် Version 1 ဂှ် ဒှ်အာ Version 2 ရ။ အခိၚ်အုပ်ဓုပ်မံၚ်လၟုဟ်ဝွံ ဒှ်ဂကောံပၞာန် Version 2.0 ရ။ ယန္တရာပရေၚ်ဂီုကၠီု၊ တိုၚ်ခဳပရေၚ်အုပ်ဓုပ် ကဏ္ဍအိုတ်သီုတံဂှ် ဒပ်ပၞာန်ဟေၚ် ဆက်အုပ်ဓလီုလဝ် ဗွဲမဇၞော်ကဵုဇြဟတ် သီုဒၞာဲဖအိုတ်ရ။ ပွမဗလးထ္ၜးကဵုကောန်ထံၚ်တံ၊ ပွမကဵုအခေါၚ်သၠးဗၠးဒုဟ်ဒဏ်တံ၊ ပွမဖန်ဗဒှ် အကာဲအရာတၠုၚ်လအာ လပါ်ခိုဟ်တံဂှ်လေဝ် ဒှ်ဆၜိုတ်ပွမဝေၚ်ပရေၚ် Propaganda (ပရေၚ်တြးဝါဒ) ပ္ဍဲမုက်လိက်အာသဳယာန် ကေုာံ ဂၠးကဝ်တံတုဲ၊ ပရေၚ်ကမၠောန်ပတဝ်က္ဍိုပ် ဇရေၚ်အပြံၚ်လှာဲဇေတ်တ် ဟွံသေၚ်ပုဟ်” သာ်ဝွံ သ္ဂးရ။
အတိုၚ်တၚ်နၚ်တံမ္ဂး ကြဴနူဒက်ပ္တန်လဝ်ဗီုပြၚ်အလဵုအသဳပၞာန်တုဲ ၜိုန်ရကဵုလဝ်အခေါၚ် ပရေၚ်သၠးဗၠးဒုဟ်ဒဏ်ၜါဝါ ကုကောန်ထံၚ် ၄၃၀၀ ပြၚ်တံ နွံကီုလေဝ်၊ နူကဵုထံၚ်အလုံမွဲဍုၚ်တံဂှ် ကောန်ထံၚ် ၃၁၀ဝ ပြၚ်ရ ဗၠးတိတ်ကၠုၚ်တုဲ အပ္ဍဲဏံဂှ်တှ်ေ ကောန်ထံၚ်ပရေၚ်ဍုၚ်ကွာန်တံပါကၠုၚ် ၜိုတ် ၃၀၀ ဓဝ်ရ။
ပါဲနူဂှ်ပၠန် ကိစ္စသွက်ဂွံဗလးပတိတ်ကဵုကောန်ထံၚ်ပရေၚ်ဍုၚ်ကွာန် ဒးဒုၚ်ရပ်လဝ်တံကီု၊ အတိုၚ်ဂၠးကဝ်ကဵု အာသဳယာန်အာတ်မိက်လဝ် သွက်ညးစၞးတၟေၚ်အာသဳယာန် ဂွံအခေါၚ်အာဆဵုဂဗကဵု က္ဍိုပ်သ္ကိုပ်ညးဍုၚ်ကွာန် ဒဝ်အံၚ်သာန်သုကျဳဂှ် နူကဵုအလဵုအသဳပၞာန် တးပါဲလဝ်စဵုကဵုလၟုဟ်ဏီရ။
မွဲလပါ်ပၠန် ဟိုတ်နူထမံက်လဝ်ရုပ်ရဴ တၚ်တုပ်စိုတ်ဘုံ အာသဳယာန် ၅ တၚ် ပြာပြာကတ်ကတ်ဟွံမာန်ဏီတုဲ၊ ပါဲနူဍုၚ်မိတ်သဟာဲလ္ၚဵုတုဲ နူဂကောံအလဵုအသဳဂၠးကဝ်တံမ္ဂး ပရေၚ်သ္ပစၟတ်သမ္တီ ဗွဲမလုပ်သၞောဝ် နကဵုပရေၚ်ဍုၚ်ကွာန်ဂှ်အလဵုအသဳပၞာန် ဟွံဂွံဒုၚ်စသိုၚ်လဝ်ဏီပုဟ်။
သွက်ဂွံကလေၚ်ပါလုပ်အာ အကြာပ္ဍဲပွဳဗွိုၚ်ဂၠးကဝ်ဂှ် ပ္ဍဲအရာသမ္မတသီအဝဵု ဥူမေန်အံၚ်လှိုၚ် ဂစာန်ကၠောန်မံၚ်ဏံ ဟိုတ်နူဒှ်မံၚ်အလဵုအသဳညးဍုၚ်ကွာန်တံရုဲစှ်တုဲ ညံၚ်ဂွံရှ်ေသှ်ေအဲပရဲဆန္ဒညးဍုၚ်ကွာန်ညိဂှ် ကလေၚ်ဟီုဒၟံၚ်လၟိုန်ရ။
ဣဏံဝွံ စကာပရေၚ်ညးဍုၚ်ကွာန်တံ သွက်ဂွံဂွံပရေၚ်စၟတ်သမ္တီ ဗွဲမလုပ်သၞောဝ် နကဵုပရေၚ်ဍုၚ်ကွာန် ဟွံပဵုနူဂှ်တုဲ၊ အခေါၚ်အရာမၞိဟ်တံကဵု အကာဲအရာပရေၚ်ဂီုကၠီုတံဂှ်လေဝ် ပြာပြာကတ်တ်ဟွံပြံၚ်လှာဲအာပုဟ် ညးလ္ၚတ်တံ ထံက်ထ္ၜးလဝ်ရ။
မွဲလပါ်ပၠန် စနူသီအဝဵုတုဲစဵုကဵုတ္ၚဲဏံ ဟိုတ်နူပရေၚ်ကၟာတ်လဒဵုလဝ်ကီု ပရေၚ်ပိုန်ဒြပ်ညးဍုၚ်ကွာန်တံ ဍိုန်လျစှ်ေအာမံၚ်ဂှ် မူဝါဒသွက်ဂွံကလေၚ်လွဳလွတ်အာ အပ္ဍဲကိုန်အစဳဇန်ပွိုၚ် ၁၀၀ တ္ၚဲ အလဵုအသဳပၞာန် စကၠောန်လဝ် ပ္ဍဲဂိတုအေဗရာ ၂၀ တေံဂှ် ဟွံဂွံဆဵုလဝ်ပုဟ်။
ဟိုတ်နူအလဵုအသဳပၞာန် ဒၞာတာကၟာတ်လဒဵုလဝ် ကပေါတ်ဗၞိက်နာနာသာ်တံတုဲ အပ္ဍဲ ၁၀၀ တ္ၚဲဏံဂှ် ၚုဟ်မးကပေါတ်တံယအ်စှ်ေအာဟၟဲ၊ ပဵုတုဲသၠုၚ်တိုန်ကၠုၚ်မံၚ်ရောၚ် ညးဍုၚ်ကွာန်ဒေသမန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အပ္ဍဲအကြာ ၁၀၀ တ္ၚဲဏံဂှ်ရ ၚုဟ်မးကပေါတ်တံ သၠုၚ်တိုန်အာဂှ် အဲဂွံဆဵု။ သွက်ဂွံထိၚ်ချုက်အာ ၚုဟ်မးကပေါတ်ဟီုဂှ် ပရေၚ်ကိစ္စ အကာဲအရာ ဟိုတ်ပရူပရာတံ နွံဗွဲမဂၠိုၚ်။ လၟုဟ်မ္ဂး အကာဲအရာဂၠးကဝ် ဟိုတ်နူၚုဟ်ကၠေၚ်ဒဳဇြေလ်တုဲ သြန်စရိတ်အိုတ်မံၚ် ပရေၚ်ကွဳစက်ဖ္ဍိုက်ကပေါတ်တံ သၠုၚ်တိုန်၊ တုဲမ္ဂး အတိုၚ်လၟေၚ်မွဲဒမြိပ်ဂၠံၚ်တံလေဝ် ကပေါတ်ဒးဒုၚ်ဒၞာတာလဝ်ကီု ကပေါတ်ဒးဒုၚ်စၟတ်ပိုၚ်ခြာတံ ဂၠိုၚ်တိုန်တုဲ လပါ်ဏံမ္ဂး ၚုဟ်မးကပေါတ်တံလေဝ် သၠုၚ်တိုန်ကၠုၚ်မံၚ်။ အပ္ဍဲပွိုၚ် ၁၀၀ တ္ၚဲဏံ ၚုဟ်မးကပေါတ်ယအ်အာဂှ် ပိုဲတံဟွံဆဵုကေတ်ပုဟ်၊ ပဵုတုဲသၠုၚ်တိုန်ကၠုၚ်မံၚ်ရောၚ် ပိုဲတံဆဵုရ”သာ်ဝွံ သ္ဂးရ။
အပ္ဍဲကဵုကောံဓရီု ဂကောံအလဵုအသဳပၞာန် ကၠောန်ဗဒှ်လဝ် ဂိတုဂျူလာၚ် ၇ ဂှ်တှ်ေ သွက်ပရေၚ်ဖောအ်ဗြဳကၟိန်ဍုၚ်မ္ဂး ပရေၚ်ဇၞော်မောဝ်ပိုန်ဒြပ်တံဂှ် ကိစ္စဇၞော်မံၚ်တုဲ တၚ်ကော်ဆောဇၞော်အိုတ် သွက်ညးတံဂှ် ဒှ်ပရေၚ်ၚုဟ်မးကပေါတ် သၠုၚ်တိုန်ဂှ်ရောၚ် ဥူမေန်အံၚ်လှိုၚ် ဒုၚ်ဝန်လဝ်ရ။
အတိုၚ်လိက်လလောၚ်တြး ဂကောံ Economist Intelligence Unit (EIU) မ္ဂး စဵုကဵုစိုပ်သၞာံပေၚ် ၂၀၃၀ တေံဂှ် ပရေၚ်ပိုန်ဒြပ်ကၟိန်ဍုၚ်ဗၟာ သွက်ဂွံကလေၚ်စိုပ်အာဒၞာဲအကာဲအရာ ကၠာဟွံဂွံဒှ်ယဲကဝ်ဗေတ်ကဵု ကၠာဟွံဂွံသီအဝဵုတေံဂှ် ဒးဆက်ရုန်မဵုဂစာန်အာမံၚ်ဏီရောၚ် ပ္ဍဲဂျာန်နဝါရဳ ၂၄ တေံဂှ် ကဵုလဝ်သမ္တီနွံရ။
မွဲလပါ်ပၠန်မ္ဂး ဟိုတ်နူပရေၚ်ပေါဲဗတိုက်ရပ်လွဟ်က္တဵုဒှ်မံၚ် အပ္ဍဲကၟိန်ဍုၚ်ဗၟာတုဲ ညးဒးထောံဌာန်ဒၞာဲဝါဲ နွံမံၚ်ကြပ် ၃ ဒသမ ၈ ပြကောဋိကိုတ်တုဲ၊ ဗွဲမဂၠိုၚ်တံမ္ဂး ဒှ်ညးဒးဂြိပ်ပါဲဒဴမံၚ်ဂၠိုၚ်ၚ်ကဵု အလန်တံရောၚ် နူရုၚ်ပ္ညဳပ္ညပ်ပရေၚ်ဓရ်ဗ္စာရဏာမၞိဟ် ကုလသမဂ္ဂ UNOCHA Myanmar ပတိတ်လဝ် လိက်လလောၚ်တြးရောၚ်။
ပရိုၚ် – သြၚ်လောန်တိုၚ်မ်
Photo – MOI