မတ်မလီု၊ ဂျူလာၚ် ၁၈
အပ္ဍဲတွဵုရးမန် ပွိုၚ်ဍုၚ်ဗွဲမဂၠိုၚ်မ္ဂး စနူသတ္တဟတတိယ ဂိတုဂျူလာၚ်ဏံတုဲ ဆေၚ်သွံကၠေၚ်တံ ကလေၚ်ဇီုကပိုက်မံၚ်ကဵု ပရေၚ်ကၠေၚ်စက်ပိုတ်အာ မွဲဝါပၠန်ရဂှ် ညးဒေသတံ ဟီုကဵုဌာန်ပရိုၚ် သြၚ်လောန်တိုၚ်မ်ရ။
ဍုၚ်ဇၞော်မဟာ တွဵုရးမန် ဍုၚ်မတ်မလီုကီု သီုကဵုပွိုၚ်ဍုၚ်ပံၚ်၊ သဓီု၊ မုဟ်ဍုၚ်ကေုာံ ပွိုၚ်ဍုၚ်တၞဟ်ဟ်တံလေဝ် ပ္ဍဲဆေၚ်သွံကၠေၚ် ဗွဲမဂၠိုၚ်တံဂှ်တှ်ေ ကၠေၚ် ၉၂၊ ၉၅ ကေုာံ ကၠေၚ်ဒဳဇြေလ်ကဆံၚ်သၠုၚ် စနူပရဳမဳယာန်တံဏံ ပိုတ်မံၚ်အိုတ်ရောၚ်။
ပြဟ်ဟ်ဏံ ၚုဟ်မးကၠေၚ်စက် ၜိုန်ရယအ်စှ်ေအာညိညိကီုလေဝ်၊ ပ္ဍဲဆေၚ်သွံကၠေၚ်ဗွဲမဂၠိုၚ်တံဂှ် ဟိုတ်နူကၠေၚ်စက်အိုတ်ပိုတ်မံၚ်တုဲ ဗီုအခိၚ်ကၠာတေံ အတိုၚ်ဖျေံလဝ်နဲကဲ စောံ-မ တံဂှ်လေဝ် ဟွံသွံကဵုတုဲ ကၟာတ်လဝ်ပရေၚ်သွံကၠေၚ်တံရောၚ်။
ပြဟ်ဟ်ဏံ ပ္ဍဲဍုၚ်သဓီု ဆေၚ်ကၠေၚ်ကြပ်သီုဖအိုတ်တံကၟာတ်ထောံလဝ်ဂှ် ရာန်ကၠေၚ်ဟွံဂွံတုဲ ဒှ်မံၚ်အခက်အခုဲရောၚ် ညးဒေသဍုၚ်သဓီုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ကၠေၚ်တံဂှ် ပြဟ်ဟ်ဏံ ပ္ဍဲသဓီုပိုဲ ဆေၚ်ကြပ်ဖအိုတ်တံ ဗွဲမဂၠိုၚ်ကၟာတ်လဝ်၊ ဗီုလဵုလေဝ် ရာန်ဟွံဂွံပုဟ်၊ ‘ဟၟဲ-ဟၟဲ’ မံၚ်ဖအိုတ်၊ ရာန်ဟွံဂွံဇေတ်တ်၊ ဗီုပြၚ်လဵုမှ ဟွံသွံကဵုပုဟ်၊ အခက်အခုဲမ္ဂး ဒှ်အခက်အခုဲဇေတ်တ်ရ၊ ဇၞော်ကဵုဇြဟတ် ပိုဲတံဒှ်မံၚ်အခက်အခုဲ” သာ်ဝွံ သ္ဂးရ။
အပ္ဍဲဒေသမ္ဂး ကၠေၚ်ဍေၚ်တံဂှ် နူကဵုသၞေဟ်ၜၚ် Puma International Port Terminal ကွာန်ဂဒုၚ်ပဝ် ပွိုၚ်ဍုၚ်မုဟ်ဍုၚ်ဂှ် ကာန်ပနဳ Myanmar Energy King ကေုာံ ကာန်ပနဳ Ya Zar Min Industry အံၚ်လဝ်တေန်ဒါတုဲ ပၠုပ်တြးသွံကဵုမံၚ်ရောၚ်။
ညံၚ်ၚုဟ်ကၠေၚ်ဂွံယအ်စှ်ေအာ ကေုာံ ညံၚ်ဂွံရာန်ကေတ်ဗွဲမလောဲသွာတုဲ ပ္ဍဲကောံဓရီုစၠတ်ထဝ်တုဲကၠုၚ်တေံလေဝ် ညးစၞးစၠတ်ထဝ် မွဲတၠသၟာန်လဝ် သွက်ဂွံကဵုအခေါၚ်ကလေၚ်ရာန်ကေတ် နူသၞေဟ်ၜၚ်တဳလဝါ လ္ဂုၚ်ကီုလေဝ်၊ နူလပါ်ဝန်ဇၞော်ဆေၚ်စပ်ဂှ်တှ်ေ အစဳအဇန်ပြဟ်ဟ်ဏံဟၟဲဏီပုဟ် ကလေၚ်ဟီုသှ်ကဵု လဝ်ရ။
အပ္ဍဲဍုၚ်မုဟ်ဍုၚ်ဂှ် ၜိုန်ရသၞေဟ်ၜၚ် တြးသွံကဵုကၠေၚ်စက် နွံမံၚ်ကီုလေဝ် ကၠေၚ်ဍေၚ်အိုတ်ပိုတ်မံၚ်မွဲဏှမွဲဏှတုဲ၊ ပြဟ်ဟ်ဏံ မၞိဟ်ဒးအာၜေတ်ရာန်ကေတ်ဟၟဲကီုလေဝ် ပ္ဍဲဆေၚ်တံဂှ် ကၠေၚ်ဟၟဲမံၚ်ပုဟ် ညးဒေသဍုၚ်မုဟ်ဍုၚ်မွဲတၠ ဟီုကဵုဌာန်ပရိုၚ် သြၚ်လောန်တိုၚ်မ်ရ။
“ပ္ဍဲမုဟ်ဍုၚ်ပိုဲဏံဂှ် သၞေဟ်ၜၚ်ဖ္ဍိုက်ကၠေၚ်နွံမံၚ်ဏောၚ်၊ ဆဂး ကၠေၚ်အိုတ်မံၚ်မွဲဏှမွဲဏှတုဲ၊ ပ္ဍဲတွဵုရးမန်ပိုဲမ္ဂး အာဗက်ရာန် ပွိုၚ်ဍုၚ်တၞဟ်တံ ဂွံမံၚ်ဏီ၊ ပြဟ်ဟ်ဏံ ဂွံမိၚ်ပရိုၚ်ဗက် ပ္ဍဲပိုဲဏံ အာစုတ်ကၠေၚ်ဂှ် ဟွံဂွံယျ၊ ပြဟ်ဟ်ဏံ ပရေၚ်မၞိဟ်တံဒးအာၜေတ်ဂှ် ဟၟဲဏီပုဟ်၊ ဗီုဏံရ ဆေၚ်တံပံက်လဝ်ကီု၊ ကၠေၚ်ဂှ် ဟၟဲပုဟ်” သာ်ဝွံ သ္ဂးရ။
မွဲလပါ်ပၠန် ဂကောံအလဵုအသဳပၞာန်ပြံၚ်လဝ်ဗီုပြၚ်ဂှ် သွက်ဂွံယှအ်စကာအာကၠေၚ်စက်ဂးတုဲ စနူဂိတုမာတ် ၇ တုဲကၠုၚ်တေံ ပ္ဍဲကဵုပရေၚ်အာကၠုၚ်ကွဳစက်တံဂှ် စၟတ်ပိုၚ်ခြာလဝ်နဲကဲ စောံ-မ တံတုဲ၊ ကၠေၚ်စက်ဂှ်လေဝ်ကဵုသွံလဝ် အတိုၚ်လီတာ စၟတ်စွံလဝ်တံဂှ်ရောၚ်။
အပ္ဍဲဒေသမ္ဂး ဟိုတ်နူကၠေၚ်စက်ကေတ်ဝါတ်ကၠုၚ်တုဲ စနူဂိတုအေဗရာ ၂၂ တုဲကၠုၚ်တေံ သုၚ်စောဲနဲကဲ QR Code တုဲ တန်တဴကဵုဂကူစက်ယာန်၊ ဇြဟတ်စက်တံဂှ် စၟတ်ပိုၚ်ခြာကဵုလၟိဟ်အခေါၚ်ရာန်ကၠေၚ်စက်ဂွံ အပ္ဍဲပွိုၚ်မွဲသတ္တဟတုဲ ဒးရာန်ကေတ်မံၚ်အတိုၚ်စၟတ်ပိုၚ်ခြာကဵုလဝ် တ္ၚဲစောံ-မ တံဂှ်ရောၚ်။
တုဲပၠန် ပ္ဍဲဂိတုတုဲကၠုၚ်တံဂှ်လေဝ် ဟိုတ်နူကၠေၚ်စက်ပိုတ်အာတုဲ ဆေၚ်ကၠေၚ်တံဂှ် ကုတ်အခိၚ်တုဲသွံကဵုမံၚ်ဂှ်ကီု၊ မၞိဟ်တံဒးအာၜေတ်မၚ်တိက်ဗ္တံ ရာန်မံၚ်အခိၚ်လံလဂှ်လေဝ်နွံ၊ ပါဲနူဂှ်ပၠန် ၜိုတ်နွံပၟိက်ရာန်ဟွံဂွံတုဲ ဘဝပရေၚ်ပိုန်ဒြပ်မၞိဟ်တံ ဒးဆောံလေၚ်အာလဝ် နွံကၠုၚ်ရ။
အပ္ဍဲတွဵုရးမန်မ္ဂး စနူသတ္တဟပထမ ဂိတုမာတ်တေံတုဲ ကၠေၚ်စက်တံဂှ် အတိုၚ်နွံပၟိက်ရာန်ကေတ်ဟွံဂွံ၊ ဒးရာန်ကေတ်မံၚ်နကဵုသၞောတ်ထ္ၜတ်တံကီု၊ ကၠေၚ်စက်ပိုတ်အိုတ်မံၚ် မွဲဏှမွဲဏှနွံတုဲ သီုဒးဆဵုဂဗမံၚ်ကဵု ၚုဟ်မးကၠေၚ်က္ဍၚ်သၠုၚ်နူကဵု ရး၊ တွဵုရး ညးတၞဟ် တံရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – Socia Media