မတ်မလီု၊ ဂျူလာၚ် ၁၉
အပ္ဍဲတွဵုရးမန် ကၠေၚ်စက်ညံၚ်ဟွံဂွံပိုတ်အာဂှ်ဖန်ဇန်လဝ်ရောၚ် ဝန်ဇၞော်ဓာတ်လလဳ၊ ဓါတ်အစောံ၊ ကွတ်စက်ကေုာံ ပရေၚ်ဆက်စၠောံ အာကၠုၚ် အလဵုအသဳဒပ်ပၞာန်ခါန်ကၞက်လဝ် ဥူဇေယျာဥူ ဟီုလဝ်ကီုလေဝ် နတဲမ္ဂး ကၠေၚ်စက်တံပိုတ်မံၚ်အိုတ်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဟိုတ်နူပၠုပ်နၚ်မံၚ်ကၠေၚ်စက် နူသၞေဟ်ၜၚ်ဂဒုၚ်ပဝ် ပွိုၚ်ဍုၚ်မုဟ်ဍုၚ်တုဲ နူကဵုအပ္ဍဲဒေသဗၟံက်လဒေါဝ်တေံ ၜိုန်ရဒှ်မံၚ်ပဋိပက္ခကီုလေဝ် တွဵုရးမန်ဂှ် ကၠေၚ်စက်သွက်ဂွံပိုတ်အာဟၟဲပုဟ် အပ္ဍဲကောံဓရီုစၠတ်ထဝ်တုဲကၠုၚ်တေံ ဥူဇေယျာဥူ ဟီုလဝ်ရောၚ်။
ပြဟ်ဟ်ဏံမ္ဂး ဒၞာဲဆေၚ်သွံကၠေၚ် ဍုၚ်မတ်မလီု၊ ပံၚ်၊ သဓီု၊ မုဟ်ဍုၚ် ကေုာံ ပွိုၚ်ဍုၚ်တၞဟ်ဟ် ဗွဲမဂၠိုၚ်တံဂှ် ကၠေၚ် ၉၂၊ ၉၅ ကေုာံ ကၠေၚ်ဒဳဇြေလ် ပရဳမဳယာန်တံ စနူသတ္တဟတတိယ ဂိတုဂျူလာၚ်ဏံတုဲ ကလေၚ်ပိုတ်မံၚ်ပၠန်ရောၚ်။
ဟိုတ်နူကၠေၚ်စက်ပိုတ်မံၚ်သာ်ဏံတုဲ အပ္ဍဲဆေၚ်ဗွဲမဂၠိုၚ်တံဂှ် ဗီုအခိၚ်ကၠာတေံအတိုၚ်စၟတ်ပိုၚ်ခြာလဝ် တ္ၚဲ စောံ-မ တံဂှ်လေဝ် ဟွံသွံကဵု၊ ကၟာတ်ထောံဆေၚ်သွံကၠေၚ်စက်တုဲ ဆေၚ်လ္ၚဵုတံမ္ဂး ကၠေၚ်ၜိုတ်သှ်ေဇးမံၚ်ညိညတံဂှ်ရ ပတိတ်သွံကဵုမံၚ်ရောၚ် ဂွံတီရ။
ဝန်ဇၞော်အလဵုအသဳပၞာန် ဟီုမံၚ် ကၠေၚ်စက်ဟွံဂွံပိုတ်အာဂှ် ညံၚ်မၞိဟ်တံဂွံအထေၚ်ဇၞော်ရောၚ်ဗက်ဟီုမံၚ်ဂှ်တုဲ နတဲဏံမ္ဂး စိုပ်အခိၚ်နူဂယးပြဟ်ဂှ် အတိုၚ်ဗီုကၠာတေံပၠန် ဒးဗက်ဂၠာဲမံၚ်ကၠေၚ်စက်အိုတ်ရဂှ် ညးဒေသမွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“အရေဝ်ညးတံဟီုဂှ် အခိၚ်လဵုဍာံမံၚ် ကေၚ်နွံကၠုၚ်ကီုရော၊ ဟီုမံၚ်ကၠေၚ်ဟွံဂွံပိုတ်ပုဟ်ဂှ် ညးတံဒးထိၚ်ချုက်မာန်ဏောၚ်၊ ဒးစၞောန်ပ္ညုၚ်မာန်ဏောၚ်၊ အရေဝ်ညးတံဟီုကဵု ကမၠောန်ကၠောန်မံၚ်ဂှ် တၞဟ်ခြာမံၚ်၊ ဟီုမံၚ်ကၠေၚ်ဟွံပိုတ်ပုဟ်ဂှ် ဆၜိုတ်ညံၚ်မၞိဟ်တံ ဂွံအထေၚ်ဇၞော်ရ၊ ဟိုတ်နူဟွံသွံကဵုကၠေၚ်တုဲ လၟုဟ် စိုပ်နူဂယးပြဟ်တှ်ေ မၞိဟ်တံ ဒးကလေၚ်ဗက်ဂၠာဲမံၚ်ကၠေၚ်ရ၊ ယဝ်ရဂွံမိၚ်ရမျှာၚ်သွံကဵုမံၚ်ဒၞာဲတေံမ္ဂး ဂြိပ်အာ၊ စိုပ်တေံတှ်ေ ဟွံသွံကဵုပၠန်၊ ထပ်အာဒၞာဲတၞဟ်ပၠန်၊ ဟွံသွံကဵုပၠန်တုဲ စနူဂယးဏံမ္ဂး မၞိဟ်ဗွဲမဂၠိုၚ် ဒးဗက်မံၚ် လက္ကရဴကၠေၚ်ရ၊ ဒှ်ဒဒိုက်ကွေံကွေံ“သာ်ဝွံ သ္ဂးရ။
တုဲပၠန် တွဵုရးမန်ဏံဂှ် ဟိုတ်နူကၠေၚ်ပိုတ်မံၚ် မွဲဏှမွဲဏှဂၠိုၚ်နူကဵု ရး၊ တွဵုရးတၞဟ်ဟ်တံတုဲ ညးတာလျိုၚ်တံ ထေက်ကဵု ဒးစှ်ေဗက်လ္ၚတ် ပ္ဍဲတိဍာ်တံကီု ဒးဗက်ဂၠာဲသွဟ်သောင်ကလးအာကီု၊ ယဝ်ရအာမံၚ်အတိုၚ်ဏံမ္ဂး ဗီုကၠာတေံရ အကာဲအရာဒးတိက်မၚ်ပြေၚ်မၞိဟ် ၜေတ်ရာန်ကေတ်တံဂှ် ကလေၚ်က္တဵုဒှ်ကၠုၚ်မာန်ရောၚ် ညးဆက်ဟီုရ။
အပ္ဍဲဒေသမ္ဂး ကၠေၚ်စက်တံဂှ် နူကဵုကာန်ပနဳ Myanmar Energy King ကေုာံ ကာန်ပနဳ Ya Zar Min တံ နူသၞေဟ်ၜၚ် Puma International Port Terminal ပ္ဍဲကွာန်ဂဒုၚ်ပဝ် ပွိုၚ်ဍုၚ်မုဟ်ဍုၚ်ဂှ် တြးသွံကဵုမံၚ် သွက်ပွိုၚ်ဍုၚ် အပ္ဍဲတွဵုရးတံရ။
ပြဟ်ဟ်ဏံ အပ္ဍဲဒေသဂှ်မ္ဂး ဟိုတ်နူကၠေၚ်စက်အောန်မံၚ်တုဲ စနူအေဗရာ ၂၂ တုဲကၠုၚ်တေံ သုၚ်စောဲနဲကဲ QR Code တန်တဴလတူဂကူစက်ယာန်၊ ဇြဟတ်စက်တံတုဲ စၟတ်ပိုၚ်ခြာကဵု လၟိဟ်ကၠေၚ်စက်ရာန်ဂွံ အပ္ဍဲမွဲပွိုၚ်သတ္တဟတံတုဲ ဒးရာန်ကေတ်မံၚ် အတိုၚ်စၟတ်ပိုၚ်ခြာလဝ်တ္ၚဲ စောံ-မ တံရောၚ်။
အပ္ဍဲတွဵုရးမန်မ္ဂး စနူသတ္တဟပထမ ဂိတုမာတ်တေံတုဲ ရာန်ကၠေၚ်စက်တံအတိုၚ်ပၟိက်ဟွံဂွံ၊ ဒးရာန်မံၚ်ကဵု သၞောတ်ထ္ၜတ် တင်စၟတ်ပိုၚ်ခြာတံကီု၊ ကၠေၚ်စက်ပိုတ်မံၚ်မွဲဏှမွဲဏှတုဲ သီုဒးဆဵုဂဗမံၚ်ကဵု ၚုဟ်မးကၠေၚ်စက်သၠုၚ်တိုန်မံၚ် နူကဵုရး၊ တွဵုရး တၞဟ်ဟ်တံရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – MOI