အပ္ဍဲကိုန်အစဳအဇန်ပရေၚ်ၜိုဟ်လလမ် အလဵုအသဳပၞာန် ၁၀၀ တ္ၚဲ ဒပ်တအာၚ် TNLA ပါလုပ်ကၠုၚ်

နေပျဳဒဝ်၊ ဇူလာၚ် ၂၁

အလဵုအသဳပၞာန် သမ္မတသီအဝဵု ဥူမေန်အံၚ်လှိုၚ် ပၠတရဴလဝ် အပ္ဍဲကိုန်အစဳအဇန် ပွမဂစာန်ကၠောန် ပရေၚ်ၜိုဟ်လလမ်ပွိုၚ် ၁၀၀ တ္ၚဲဂှ် နူကဵုဂကောံမဟာမိတ်ပိကောဒေံ ဒပ်တအာၚ် TNLA ထမံက်လဝ်ရုပ်ရဴ ပရေၚ်လဝေၚ်ပၞာန် ၁၀၂၇ တေံ ပါလုပ်ကၠုၚ် အလန်ကိုပ်ကၠာအိုတ် မဒှ်ရ။

ပ္ဍဲဂိတုဂျူလာၚ် ၁၉ ဏံ ပ္ဍဲဟဝ်တေဝ်ယှိုဲအုၚ်သာန် နေပျဳဒဝ်ဂှ် ကမ္မတဳပ္ညဳပ္ညပ်ထမံက်ရုပ်ရဴ ပရေၚ်ညဳသၟဟ်ကောန်ဂကူကဵု ပရေၚ်ၜိုဟ်လလမ် NSPNC ကဵု ဂကောံဗၠးၜးတွဵုရးပလံၚ် PSLF/TNLA တံ ဆဵုဂဗသဳကၠဳလဝ်ရဂှ် နူကဵုလိက်ပရိုၚ်တြးဝါဒ ကၟိန်ဍုၚ် ချူထမံက်ပတိတ်လဝ်ရ။

အပ္ဍဲပရေၚ်ဆဵုဂဗဏံဂှ် သွက်ဂွံပံၚ်တောဲ ကိုန်အစဳဇန်ဂစာန်ရေၚ်တၠုၚ်အာ ပရေၚ်ၜိုဟ်လလမ် သမ္မတကဵု NSPNC တံ ပွိုၚ် ၁၀၀ တ္ၚဲကီု ၊ သွက်ဂွံဒ္ဂေတ်ဗက်အာ တၚ်တုပ်စိုတ်ဟိုၚ်ဂေန်၊ သွက်ဂွံထမံက်ရုပ်ရဴ တၚ်တုပ်စိုတ်ဒေါအ်ပန်ပှော် တုပ်လဝ်စိုတ်တုဲတုဲတံ သဳကၠဳလဝ်ညးသ္ကံရဂှ် အလဵုအသဳပၞာန် ပတိတ်လဝ်ပရိုၚ်ရ။

တုဲပၠန် သွက်ဘဝ ကောန်ညးဍုၚ်ကွာန် အပ္ဍဲဒေသတံ ဂွံသက်သာသၠဲလးတိုန်ကၠုၚ်၊ လတူပြသၞာ ပရေၚ်ဍုၚ်ကွာန်ဂှ် ညံၚ်ဂွံသောၚ်ကလးအာ နနဲပရေၚ်ဍုၚ်ကွာန် ၊ ပရေၚ်ကိစ္စ သွက်ဂွံဆက်ပံၚ်တောဲကၠောန်အာ လၟေၚ်ကမၠောန် ပရေၚ်ၜိုဟ်လလမ်ကေုာံ ပရေၚ်ပညာ၊ ပရေၚ်ထတ်ယုက်၊ ပရေၚ်ဇၞော်မောဝ်ဖောအ်ဗြဳဒေသ၊ ပရေၚ်ဆက်စၠောံဂၠံၚ်ဍာန် အာကၠုၚ်တံဂှ်လေဝ် သဳကၠဳလဝ်အိုတ်ရ။

အပ္ဍဲပေါဲသဳကၠဳဝွံ သွက်ဂွံခုတ်စၟတ်ပိုၚ်ခြာကဵု တွဵုရးတအာၚ်ဂှ် အာတ်မိက်လဝ်ဂှ်ကီု နူကၟိန်ဍုၚ်ပံၚ်ကောံဏံ ဟွံနုက်တိတ်တုဲ ဆက်သဳကၠဳအာ လၟေၚ်ကမၠောန်ပရေၚ်ၜိုဟ်လလမ်တံရောၚ် နူလပါ် TNLA ပတိုန်ထ္ၜးလဝ်ဂှ် အတိုၚ်ဂလာန်ရိုဟ်ကၞက်ပရိုၚ် တိုန်စိုပ်လဝ်ပေါဲသဳကၠဳမွဲတၠဟီုလဝ်ကဵု ဌာန်ပရိုၚ် BBC ဗၟာဂှ် ထမံက်ထ္ၜးလဝ်ရ။

ပရေၚ်သွက်သ္ဂောံဂွံ တွဵုရးတအာၚ်ဂှ် ဒှ်တင်ရန်တၟအ် အန္တိမပရေၚ်ဍုၚ်ကွာန် TNLA တုဲ တင်ရန်တၟအ်ပရေၚ်ဍုၚ်ကွာန်ဏံ နကဵုနဲကဲလဵု ဒှ်မာန်နာနာသာ်တံဂှ် ထမံက်အာမံၚ်ရုပ်ရဴရောၚ် က္ဍိုပ်သ္ကိုပ်ကွးဘာတြေံ ကိုမေန်တွိုဲတေတ် သ္ၚဳဂၠိပ်လဝ်ရ။

“သွက်ဂွံဂွံ တၚ်ရန်တၟအ်အန္တိမ ပရေၚ်ဍုၚ်ကွာန်ညးတံဂှ် နကဵုနဲကဲနာနာဒှ်မာန်ဖအိုတ်တံဂှ် သုၚ်စောဲတုဲ ထမံက်အာမံၚ် ရုပ်ရဴ ရန်တၟအ်ပရေၚ်ဍုၚ်ကွာန်ညးတံရောၚ်။ လတူအရာပရေၚ်ဏံလေဝ် ပရေၚ်ဇာတ် ဂကောံဇြဟတ်ပၠန်ဂတးပိုဲတံ တုဲဒှ်အာမွဲအခန်ယျဂှ် ဟွံထေက်ကဵု စၟတ်သမ္တီပရေၚ်ဒဒှ်ဏံတုဲ၊ ရုပ်ရဴ တင်ရန်တၟအ်ပရေၚ်ဍုၚ်ကွာန်ညးတံဂှ် သုၚ်စောဲအာ နဲကဲဒှ်မာန်တံတုဲ ထမံက်အာမံၚ်တံဂှ် ပိုဲတံ (ဂကောံပၠန်ဂတးတမ်ကညၚ်တံ) လေဝ် ဒဒှ်ရ ဂွံအာနဲကဲဂၠံၚ်တရဴဒှ်မာန်မွဲနဲမွဲဗီုကီုရောၚ်ဂှ် ပိုဲတံဂပ်ဝ် ဒးထ္ၜးကဵုထေက်ရ” သာ်ဝွံ သ္ဂးရ။

အတိုၚ်သ္ဇိုၚ်ဥပဒေသၞောဝ် ၂၀၀၈ မ္ဂး အပ္ဍဲကဵုတွဵုရးသေံဂှ် ပွိုၚ်ဍုၚ်နသာန် ကဵု မာန်တုၚ် ၜါပွိုၚ်ဍုၚ် ပံၚ်ပကောံတုဲ ခုတ်စၟတ်ပိုၚ်ခြာလဝ်ကဵု နဒဒှ် ဒေသဂွံအခေါၚ် ပရေၚ်အုပ်ဓုပ် ပလံၚ်ရောၚ်။ အပ္ဍဲပရေၚ်လဝေၚ်ပၞာန် ၁၀၂၇ ဏံ လ္ပာ်သေံသၟဝ်ကျာ ဒပ်တအာၚ် TNLA တံ သီဂွံလဝ် ဍုၚ် ၁၂ ဍုၚ်ကီုရ။

ဆဂး အခိၚ်ဗွဲကြဴဏံ အလဵုအသဳကြုက် ဟိုတ်နူကဵုဇြဟတ်ဟရိုဟ်ကီု၊ ဟိုတ်နူဒပ်ပၞာန်သီအဝဵု ကလေၚ်ဗတိုက်ဂွံကီုတုဲ ဒးကလေၚ်ဗလးထောံ ဍုၚ်လ္ၚဵုတံတုဲ၊ မဟာမိတ်ကောဒေံပိ ဒပ်ကဝ်က MNDAA ဟိုတ်နူသီကေတ်လဝ်တုဲ သီုကဵုဍုၚ်ကွတ်ခါၚ် ဒးဒုၚ်ဆောံလေၚ်အာလဝ်ရ။

ဟိုတ်ဂှ်တုဲ ပြဟ်ဟ်ဏံ ဒပ်တအာၚ် TNLA တံ ဆက်ထိၚ်လဝ် ဍုၚ်နမတူ၊ နခါန်၊ နသာန်၊ မာန်တုၚ်၊ မိုင်ၚအ် ကေုာံ မိုင်လုၚ်တံတုဲ စပ်ကဵုအကာဲအရာ ပရေၚ်စၟတ်ပိုၚ်ခြာအာ တွဵုရးတအာၚ်ဂှ် တန်တဴမံၚ်လတူ တၚ်ချူခၞံ အတိုၚ်သ္ဇိုၚ်သၞောဝ်ဥပဒေ၂၀၀၈ ဂှ်ရ။

အတိုၚ်သ္ဇိုၚ်သၞောဝ်ဥပဒေ ၝောံပိုဒ် ၅၃ (က) မ္ဂး ပရူပရာ ဟိုတ်ပရေၚ်ကိစ္စ သွက်ဂွံစၟတ်ပိုၚ်ခြာပယျဵုတိဍာ် ရး၊ တွဵုရးမွဲမွဲ ယဝ်ရနွံကၠုၚ်မ္ဂး ကိုပ်ကၠာအိုတ် ဒးကံက်အာတင်လစွံစိုတ် အပ္ဍဲကဵုပယျဵုဒၞက်ပွိုၚ်ဍုၚ် ညးလုပ်မံၚ်အဝေါင် ညးအခေါၚ်ကဵုမာဲနွံ တံဂှ်ရောၚ် ချူလဝ်ရ။

နူကဵုဏံ ယဝ်ရဟွံဂွံမာဲထံက်ဂလာန် ကဝက်ပြၚ်မ္ဂး ကလေၚ်ပလေဝ် ပယျဵုဒၞက်တံဂှ် ညိလေဝ်ကၠောန်ဟွံဂွံပုဟ်။ ယဝ်ရ ဂွံမာဲထံက်ဂလာန် ကဝက်ပြၚ်အာမ္ဂး ဒးကေတ်ဆန္ဒ နူကဵုညးစၞးစၠတ်ထဝ် ဆေၚ်စပ်တံရောၚ်။

ယဝ်ရဂွံမာဲထံက်ဂလာန် နူညးစၞးတံ ပန်ဂအုံ ပိဂအုံ ၜက်လပါ်လတူဂှ်မှ ကေတ်တၚ်တုပ်စိုတ် စၠတ်ထဝ်ကၟိန်ဍုၚ်တုဲ ပလေဝ်စၟတ်သမ္တီပိုၚ်ခြာအာကဵု ပယျဵုတိဍာ် ရးဒေသ၊ တွဵုရးမွဲမွဲ ဂွံရောၚ် ပ္ဍဲၝောံပိုဒ် ၅၃ (ဃ) ထမံက်လဝ်နွံရ။

ပ္ဍဲအခိၚ်ဏံ အလဵုအသဳဒုၚ်ရုဲစှ်မံက်တိုန်ကၠုၚ်ယျတုဲ အရာပလေဝ်အာ သ္ဇိုၚ်သၞောဝ်ဥပဒေ ၂၀၀၈ ဂှ် ကၠောန်အာမာန်တုဲ၊ စပ်ကဵုပရေၚ်ပညာ၊ ပရေၚ်ထတ်ယုက်ကေုာံ ပရေၚ်ဇၞော်မောဝ်ဖောအ်ဗြဳဒေသ သွက်ညးဍုၚ်ကွာန် ဒေသတအာၚ်ပလံၚ်တံဂှ်လေဝ် ပံၚ်ပစိုပ်ရေၚ်တၠုၚ်ဖန်ဖက်အာကဵုရောၚ် ပ္ဍဲပေါဲသဳကၠဳ ဒုသ္ကိုပ်ပၞာန်ဇၞော် ယာပျေအ် ဟီုလဝ်ရ။

ပ္ဍဲကဵုကောံဓရီုစၠတ်ထဝ်ကၟိန်ဍုၚ် အလန်တတိယ ကၠောန်ဗဒှ်လဝ် ဂိတုဂျူလာၚ် ၇ တေံဂှ်လေဝ်
 ပ္ဍဲကဵုသ္ဇိုၚ်သၞောဝ်ဥပဒေ ၂၀၀၈ တင်နၚ် ထေက်ကဵုဒးပလေဝ် ထပ်ဗပေၚ် ၄၃ တၚ် နူကဵုသမ္မတ ပလံၚ်ဗ္စိုပ်ကဵုလဝ်တံဂှ် ဆက်ကၠောန်အာ သွက်ဂွံချူခၞံပတိုန်သၞောဝ်တံရောၚ် နာယက စၠတ်ထဝ် ကဵုလဝ်သမ္တီ လလောၚ်တြးရ။

စပ်ကဵုပရေၚ်ဆဵုဂဗသဳကၠဳလဝ် အကြာ NSPNC ကေုာံ PSLF/TNLA တံဂှ် ညးအခေါင်ဟီုဂးနွံ TNLA သ္ပလဝ်ဒတန်ကီုလေဝ်၊ ပရူပရာ အပ္ဍဲပေါဲသဳကၠဳတံဂှ် ပတိတ်ပရိုၚ်လလောၚ်တြးလဝ် ဟၟဲဏီပုဟ်။

ပ္ဍဲပရေၚ်လဝေၚ်ပၞာန် ၁၀၂၇ သေံသၟဝ်ကျာဂှ် TNLA သ္ကိုပ်သ္က ပၠတရဴလဝ် ကုမဟာမိတ် ကောဒေံပိတံကီုလေဝ် အတိုၚ်ပရေၚ်ပ္ညဳပ္ညပ် အလဵုအသဳကြုက်ဂှ် ကေတ်တၚ်တုပ်စိုတ် ဟိုၚ်ဂေန်တုဲ ဒေါအ်ပန်ပှော်လဝ် ဗွဲယာယဳမွဲခဏရောၚ်။

ဆဂး ဟိုတ်နူလပါ်ဒပ်ပၞာန်ဗၟာ ဖံက်ပကဝ်လဝ် တၚ်တုပ်စိုတ်တုဲ ပရေၚ်လဝေၚ်ပၞာန် ၁၀၂၇ သ္ကုတ်ဒုတိယ ထပ်ဒှ်ကၠုၚ်ပၠန်တုဲ ပ္ဍဲဍုၚ်ကူမေန် ဍုၚ်ကြုက်ဂှ် အကြာ TNLA ကဵု ဒပ်ပၞာန်ဗၟာတံ ထ္ပက်လဝ်စၟတ်တဲ လိက်ကသုက်ဒေါအ်ပန်ပှော် ပ္ဍဲအံက်တဝ်ဗါ ၂၈ သၞာံ ၂၀၂၅ တေံရ။

ဣဏံဝွံ ဂကောံရပ်လွဟ်ကောန်ဍုၚ်အရၚ် TNLA ပါလုပ်ကၠုၚ်လဝ် ပ္ဍဲပရေၚ်ထပိုတ်ရိုဟ်ကၞက် သၞောတ်တၠအဝဵုပၞာန်ညံၚ်ဂွံကၠက်ဂှ် ပရေၚ်ဇာတ်ဒေါအ်လဝ်မွဲသ္ကုတ်တုဲ လၟုဟ်ပါလုပ်ကၠုၚ် အပ္ဍဲကိုန်အစဳဇန်ပရေၚ်ၜိုဟ်လလမ် ၁၀၀ တ္ၚဲ အလဵုအသဳပၞာန် မဒှ်ရ။

အပ္ဍဲကဵုနေပျဳဒဝ် NSPNC ကဵု TNLA တံ ဆဵုဂဗဗွဲမလုပ်သၞောဝ် ဗီုဏံဂှ်တှ်ေ အပ္ဍဲညးတံသဳကၠဳလဝ် နူဍုၚ်ကူမေန်တေံဂှ် တၚ်တုပ်စိုတ် နွံဒၟံၚ်တုဲတုဲရောၚ်ဒှ်တုဲ သၞောတ်ဖိတ်ဒရေဝ်ဒုၚ်သ္ဇိုၚ်ကဵုဒေသဂှ် နူလပါ်အလဵုအသဳပၞာန်ကဵုမာန်ရောၚ် ဗိုလ်ဇၞော် CDM ဇြေန်ယဝ် သ္ၚဳဂၠိပ်လဝ်ရ။

“နူတမ်ဝါဒိအခိၚ်ကၠာ နူကူမေန်တေံရ တၚ်တုပ်စိုတ်ညးတံ နွံဒၟံၚ်တုဲတုဲဏောၚ်။ လၟုဟ် ဒှ်အာဗွဲမလုပ်သၞောဝ်ရ။ သာ်ဂှ်တုဲ နူဒပ်ပၞာန်လေဝ် ညးတံဟွံကဵုဖေက်ဒရေဝ်ဟာတှ်ေ ကဵုအာဏောၚ်။ သွက်ကောန်ဂကူတံဂှ် ဟွံကဵုပုဟ် သွက်ဒေသရ ကဵုအာရောၚ်။ ဟွံနုက်တိတ်နူကၟိန်ဍုၚ်ပံၚ်ကောံတှ်ေ တုဲမံၚ်ရ ဗွဲကြဴဏံ ဒပ်ပၞာန်ကျပၞာန်တုဲ ဒးလဗက်လယောဝ်အာကဵု အလိုက်ရ။ ဇေတ်တ်မ္ဂး နူလပါ် TNLA တံဂှ် လဂါံကွာ်ကၠုၚ် နူလပါ် ဇၞးပၞာန်ရ။ ကြုက် နွံလတူစၚ်ဂှ် ဒှ်ဒေၚ်ရ။ ဟိုတ်ဂှ်တုဲ ဒပ်တအာၚ်တံ မိက်ဂွံဂွံ တွဵုရးတအာၚ်ပလံၚ်ဂှ် ဂွံအာမာန်ရောၚ်”သာ်ဝွံ သ္ဂးရ။

သွက်ပရေၚ်ကၟိန်ဍုၚ် ဂွံညိၚ်ဝပ် ဖောအ်ဗြဳဇၞော်မောဝ်အာ ပရေၚ်ကော်ဘိက်ဗၠးဗၠးၜးၜး နကဵုတၚ်ဒစးဒုၚ် စၟတ်ပိုၚ်ခြာလဝ်ကၠာတဲ ဟၟဲသာ်ဏံဂှ် ပေၚ်စိုတ်ဗွဲမလောန်ရောၚ် ဒုဥက္ကဌ (၁) TNLA တာဂျုက်ဂျာ ဟီုလဴလဝ်ဂှ် လိက်ပရိုၚ် အလဵုအသဳပၞာန် ချူထမံက်လဝ်ရ။

ပြဟ်ဟ်ဏံ ပေါဲဗတိုက်တံဒေါအ်အာတုဲ ညးဍုၚ်ကွာန်တံလေဝ် ပရေၚ်ၜိုဟ်သြိုဟ် စဂွံကၠုၚ်ယျ၊ နူကဵုပေါဲသဳကၠဳ တ္ၚဲဏံတုဲ သွဟ်ခိုဟ်ဟ်တံ မံက်ဂတဝ်ကၠုၚ်ရောၚ် ပတှ်ေကေတ်ရ သာ်ဝွံ ညးသ္ဂးရ။

နူကဵု လၟေၚ်ကမၠောန်ပရေၚ်ၜိုဟ်လလမ်ဏံ မွဲအဆံၚ်ဂှ် သွက်ဂွံသဳကၠဳအာတင်နွံပၟိက် ဆေၚ်စပ်ကဵုပရေၚ်ဍုၚ်ကွာန်တံတုဲ သွက်ဂွံထမံက်အာရုပ်ရဴ ပရေၚ်ၜိုဟ်လလမ်ဍာ်ဇမၠိၚ်ကီု သွက်ပရေၚ်ဖောအ်ဗြဳဒေသတံကီု စပ်ကဵုအကာဲအရာပရေၚ်ဆဵုဂဗသဳကၠဳလဝ်ကဵု TNLA အခိၚ်ကၠာတံဂှ် ညးအုပ်ကာ NSPNC ဒုသ္ကိုပ်ပၞာန်ဇၞော် မေန်နိုၚ် သောင်ကလး သဳကၠဳလဝ်ကီုရောၚ်။

လတူတၚ်နၚ် ပရေၚ်သဳကၠဳလဝ် သီုညးၜါလပါ်တံဂှ် သွက်ဂွံသ္ပစွံလဝ်စၟတ်သမ္တီတုဲ ပ္ညဳပ္ညပ်ထ္ပက်လဝ်စၟတ်တဲရောၚ် ပ္ဍဲကဵုလိက်ပရိုၚ်တြးဝါဒ အလဵုအသဳပၞာန်တံ ချူထမံက်ထ္ၜးလဝ်ရ။

ပ္ဍဲကဵုပရေၚ်ဆဵုဂဗသဳကၠဳလဝ်ဏံဂှ် ဥက္ကဌ NSPNC ဒုသ္ကိုပ်ပၞာန်ဇၞော် ယာပျေအ်၊ ညးအုပ်ကာ ဒုသ္ကိုပ်ပၞာန်ဇၞော် မေန်နိုၚ်ကေုာံ ကောန်ကမ္မတဳပ္ညဳပ္ညပ်တံ ပါလုပ်တုဲ နူလပါ်ဒပ်တအာၚ် TNLA ဂှ် ဒုဥက္ကဌ (၁) တာဂျုက်ဂျာ၊ သ္ကိုပ်ဌာနပရေၚ်အုပ်ဓုပ်ကာနာနာ တာဂူဂျာ၊ သ္ကိုပ်ဌာနပရေၚ်ဆက်ဆောံမဟာမိတ် တာမိုဝ်ဟုၚ် ကေုာံ ညးစၞးတံ တိုန်စိုပ်လဝ်အိုတ်ရ။

ကမ္မတဳပ္ညဳပ္ညပ်ထမံက်ရုပ်ရဴ ညဳသၟဟ်ပရေၚ်ကောန်ဂကူကဵု ပရေၚ်ၜိုဟ်လလမ် NSPNC အလဵုအသဳပၞာန်ဂှ် ပ္ဍဲသတ္တဟတတိယ ဂိတုဂျောန်တုဲကၠုၚ်တေံ အာစိုပ်ဌာန်ဂအုပ် မာၚ်ဠာ ကေုာံ ပန်သာန်တုဲ ဆဵုဂဗလဝ်ကဵု က္ဍိုပ်သ္ကိုပ်ဂကောံ NDAA ကေုာံ UWSA ဟွံဒှ်လဝ် ပေါဲဗတိုက်ကဵုဒပ်ပၞာန်တံဂှ် သဳကၠဳလဝ် ပရေၚ်ၜိုဟ်လလမ်ကီုရ။

မွဲလပါ်ပၠန် ဒပ်ကဝ်က MNDAA တံလေဝ် ညံၚ်ဂွံပါလုပ်သဳကၠဳအာ ပ္ဍဲကဵုအစဳဇန်ပရေၚ်ၜိုဟ်လလမ် အလဵုအသဳဒပ်ပၞာန် ၁၀၀ တ္ၚဲကီုဂှ် နူကဵုအလဵုအသဳကြုက် ဗတိုက်ဖအောဝ်ဟီုဂးမံၚ်ဂှ် ပ္ဍဲမဳဒဳယာပရိုၚ်တံ ထမံက်ထ္ၜးလဝ် အိုတ်ရ။

ဂကောံကောန်ဍုၚ်အရၚ်တံ ကၠုၚ်စိုပ်နေပျဳဒဝ်တုဲ ဆက်သဳကၠဳအာ ပရေၚ်ၜိုဟ်လလမ်ဗွဲဂတတံဏံ နကဵုဗီုပြၚ်ဇၞးလဝ်ပၞာန် ပရေၚ်အာတ်မိက်တံ နွံကၠုၚ်မာန်တုဲ နူလပါ်အလဵုအသဳပၞာန်လေဝ် အကာဲအရာဒးဗက်ကဵုအလိုက်လေဝ် ဒှ်ကၠုၚ်မာန်ရောၚ် ညးလ္ၚတ်တံ သ္ၚဳဂၠိပ်လဝ်ရ။

လတူအကာဲဏံတုဲ ညံၚ်ဟွံဂွံရီုဗၚ်ထံက်ပၚ် ဒပ်ပၠန်ဂတး PDF တံ၊ ညံၚ်ဟွံဂွံကဵုအခေါၚ် ဖျေံအာသ္ဇိုၚ်၊ လ္ပကဵုအခေါၚ်သုၚ်စောဲ ဂၠံၚ်ပရေၚ်ဆက်စၠောံ စနူပရေၚ်ကေၚ်ကာတံဏံဂှ် နူလပါ်အလဵုအသဳပၞာန် အာတ်မိက်ကၠုၚ်မာန်ရောၚ် ဗိုလ်ဇၞော် CDM ဇြေန်ယဝ် ထံက်ထ္ၜးရ။

ဂကောံရပ်လွဟ်ကောန်ဍုၚ်အရၚ် ထ္ပက်လဝ်စၟတ်တဲတံကီု ဟွံထ္ပက်လဝ်တံကီု သွက်ဂွံဆဵုဂဗ သဳကၠဳအာပရေၚ်ၜိုဟ်လလမ် နကဵုတၚ်ဒစးဒုၚ်စၟတ်ပိုၚ်ခြာလဝ်ကၠာတဲဟၟဲတံဂှ် ပ္ဍဲဂိတုအေဗရာ ၂၀ တုဲကၠုၚ်တေံ သမ္မတသီအဝဵု ဥူမေန်အံၚ်လှိုၚ် ကော်ဘိက်လဝ် မဒှ်ရ။

ပြဟ်ဟ်ဏံမ္ဂး ဗီုကဵု TNLA ကီု ဂကောံရပ်လွဟ်ကောန်ဍုၚ်အရၚ် SNA၊ SSPP၊ 7 EAO Alliance၊ UWSA ကေုာံ NDAA တံ ဆဵုဂဗသဳကၠဳလဝ်ကု NSPNC အလဵုအသဳပၞာန်တုဲ ညံၚ်ရဴသာ်ဂှ်ကီု ဂကောံထ္ပက်လဝ် NCA တံ KNU/KNLA-PC၊ DKBA ကေုာံ NMSP တံ မွဲဂကောံတုဲမွဲဂကောံ ဆဵုဂဗသဳကၠဳလဝ်တုဲ နွံမံၚ်ရဂှ် ဂွံဆဵုကေတ်ရ။

ပရိုၚ် – သြၚ်လောန်တိုၚ်မ်

Photo – MOI