မတ်မလီု၊ ဂျူလာၚ် ၂၁
အပ္ဍဲတွဵုရးမန် ကပေါတ်ဗၞိက်သေံ ဂကောံအလဵုအသဳဒပ်ပၞာန်သီအဝဵု စၟတ်ပိုၚ်ခြာလဝ် နကဵုကပေါတ်ဟွံလုပ်သၞောဝ်တံဂှ် ပ္ဍဲကဵုအရာ ပရေၚ်ဖ္ဍိုက်ပလံၚ်ဗ္စိုပ်ကဵုမံၚ်တံဂှ်တှ်ေ နူကဵုဝန်ဇၞော်ဂီုကၠီု/ ပယျဵု သ္ကိုပ်ပၞာန် ကျဝ်သွာမျေအ် က္ဍိုက်ပ်ရေၚ်တၠုၚ်ကဵုမံၚ်ရောၚ်ဂှ် သၟာဗၞိက်တၠပရေၚ်ပိုန်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အခိၚ်ကၠာတေံမ္ဂး ကပေါတ်ဗၞိက်နူသေံတံဂှ် သၟာဗၞိက် တၠပရေၚ်ပိုန်ဒြပ်တံ ဂွံလဝ်အခေါၚ်ပၠုပ်သွံရာန် ဗွဲမဗၠးၜးကီုလေဝ် ကြဴနူဒပ်ပၞာန်သီအဝဵုတုဲ ကပေါတ်သေံတံဂှ် ထ္ၜးတိုန်ဟိုတ် ပရေၚ်ကမၠောန်ကူဗၞိက် ဟွံလုပ်သၞောဝ်ဂးတုဲ ဒၞာဲသၞေဟ်ကၚ်ဂိက်စၟဳစၟတ်တံဂှ် ဗက်ရပ်ထိၚ်သီကေတ်မံၚ်အိုတ်ရ။
ကပေါတ်သေံတံဂှ် နူကဵုသၞေဟ်ကၚ်ပတေၚ်ဓရတ် ၜိုန်ရဗက်ရပ်မံၚ် ကီုလေဝ်၊ သွက်ရဲကွဳစက်ဖ္ဍိုက်ကပေါတ်သေံ ကဵုလဝ်သြန်ကဵု ဝန်ဇၞော်ဂီုကၠီု/ ပယျဵု တွဵုရးမန်မ္ဂး ပရေၚ်စၟဳစၟတ်ဟၟဲ ကဵုအခေါၚ်အာကၠုၚ် ဂွံမံၚ်ပေၚ်ၚ်ရောၚ် ဂွံတီကေတ်ရ။
ပြဟ်ဟ်ဏံ ကပေါတ်နူသေံတံဂှ် ဟွံလုပ်သၞောဝ်ဂးတုဲ ပ္ဍဲကဵုသၞေဟ်ကၚ်အလဵုအသဳပၞာန်တံ ရပ်သီကေတ်မံၚ်ကီုလေဝ်၊ ရဲထပက်ကဵုလဝ်သြန် ကုဝန်ဇၞော်ဂီုကၠီု/ ပယျဵု တံမ္ဂး ပလံၚ်ဖ္ဍိုက်ဏာကပေါတ်တံ ဗွဲမလောဲသွာမာန်ရောၚ် သၟာဗၞိက် ဟွံမိက်ထမံက်ယၟုမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ယဝ်ရ ထပက်ကဵုလဝ်သြန် ဝန်ဇၞော်ဂီုကၠီု/ ပယျဵုမ္ဂး အာဂွံတုဲ ယဝ်ရဟွံကဵုလဝ်မ္ဂး ဒးဒုၚ်ရပ်ရောၚ် သၟာဗၞိက်ဂှ် ဆက်ဟီုရ။
တုဲပၠန် ကပေါတ်ဗၞိက်နူသေံ လုပ်ကၠုၚ်အပ္ဍဲတွဵုရးမန်တံဂှ် တန်တဴ လတူကွဳစက်ကဵု ဂကူကပေါတ်တံတုဲ ဒးကဵုလဝ်သြန်ကု ဝန်ဇၞော်ဂီုကၠီု/ ပယျဵု လၟိဟ်ကိုတ်ကဵုကၠံပြၚ်တုဲမှလေဝ် ဂွံအခေါၚ် ပလံၚ်ဖ္ဍိုက်ဏာကပေါတ်မာန်ရောၚ် ညးဆက်ဟီုရ။
ပြဟ်ဟ်ဏံမ္ဂး ပ္ဍဲအရာပရေၚ် ပလံၚ်ဖ္ဍိုက်ကပေါတ်သေံတံဂှ် ယဝ်ရ ကဵုလဝ်သြန်ကု ဝန်ဇၞော်ဂီုကၠီု/ ပယျဵု တွဵုရးမန်တုဲမ္ဂး နူမန်မွဲကဆံၚ် ဆက်စၠောံကဵုဝန်ဇၞော်ဂီုကၠီု/ ပယျဵု ဗဂေါ ကေုာံ လ္ဂုၚ်တေံတုဲ ကပေါတ်သေံတံဂှ် ဆက်ဖ္ဍိုက်ပလံၚ်ဗစိုပ်ဏာ စဵုကဵုစိုပ်ဒၞာဲမာန်ရောၚ် ဂွံတီကေတ်ရ။
ကပေါတ်သေံ ဒှ်ဗၞိက်ဟွံလုပ်သၞောဝ် နူကဵုအလဵုအသဳသီအဝဵု ခုတ်စၟတ်လဝ်တံဂှ် နူကဵုဂၠံၚ်ကွဳစက် ဗြဝတဳ-ဘာအၚ်-သဓီု-လ္ဂုၚ်တံကီု ဂၠံၚ်ကျာ်ပိ-မတ်မလီု-လ္ဂုၚ်တံကီု ဂၠံၚ်ရနံၚ်-ဗိက်-မတ်မလီု-လ္ဂုၚ်တံကီု ဂၠံၚ်သီုဖအိုတ်တံဏံအဓိကဂှ် ဒးတတ်လုပ်အာမံၚ် အပ္ဍဲတွဵုရးမန် ရောၚ်။
ဟိုတ်နူကပေါတ်သေံတံ ဒးတတ်လုပ်အာမံၚ် နူကဵုတွဵုရးမန်အဓိကဒှ်တုဲ ဝန်ဇၞော်ဂီုကၠီု/ ပယျဵုမန် သ္ကိုပ်ပၞာန် ကျဝ်သွာမျေအ် ဂှ် စပ်ကဵုပရေၚ်ပလံၚ်ဗစိုပ်ကပေါတ် ဟွံလုပ်သၞောဝ် တံဏံတုဲ ပ္ဍဲဇၟာပ်ပ်တ္ၚဲဂှ် ဂွံမံၚ်သြန်ကိုတ်ကဵုလ္ၚီပြၚ်ရောၚ် သၟာဗၞိက်တံ ဟီုကီုလေဝ် နူကဵုဌာန်ပရိုၚ်သြၚ်လောန်တိုၚ်မ် သ္ပဒတန်တၞဟ်ခြာ ဟွံမာန်ဏီပုဟ်။
ပြဟ်ဟ်ဏံ သွက်ဂွံပလံၚ်ဗစိုပ်ကပေါတ်သေံတံ ဗွဲမလုပ်သၞောဝ်မာန် ဂှ် နူကဵုအလဵုအသဳပၞာန် ပတေၚ်ဓရတ်လဝ်လိုင်သေန်ဂှ်ရ က္တဵုဒှ်အာမံၚ်ပရေၚ်ဗွဝ်ဖျာဒမၠုတံတုဲ လတူပရေၚ်တံဏံမ္ဂး ညးနွံအဝဵုတံ ဗက်စမံၚ်အဂတိရောၚ် သၟာဗၞိက်တံဟီုမံၚ်အိုတ်ရ။
ဍုၚ်ဗၟာဝွံ ဒးပဓန်စမံၚ်ကဵု ကပေါတ်ပၠုပ်နၚ်နူဍုၚ်သေံတံအဓိကတုဲ စၞစဇွောံမ၊ ကပေါတ်သုၚ်စောဲမၞိဟ်၊ ဂဥုဲ၊ ကပေါတ်ကျိုၚ်ကျေဝ်၊ ကပေါတ်သိုၚ်ခၞံ ကေုာံ ကပေါတ်သုၚ်စောဲနာနာတံဂှ် ကပေါတ်ဟွံလုပ်သၞောဝ်ဂးတုဲ အလဵုအသဳပၞာန်ဗက်ရပ်မံၚ်ဂှ်ရ အပ္ဍဲဗွဝ်ဖျာ ၚုဟ်မးသၠုၚ်တိုန်ကီု ကပေါတ်ပိုတ်အာကီု ပရေၚ်ဒးဇီုကပိုက်တံ ဒှ်မံၚ်ရောၚ်။
ပရိုၚ် – သြၚ်လောန်တိုၚ်မ်
Photo – MOI