မတ်မလီု၊ ဂျူလာၚ် ၂၂
ဂကောံအလဵုအသဳဒပ်ပၞာန် သ္ကိုပ်သ္ကတုဲ စၠတ်ထဝ်တွဵုရးမန် အလန်တတိယ ကောံဓရီုလၟေၚ်ဍာံတတိယဝါဂှ် စိုပ်ဂိတုအဝ်ဂတ် ၁၀ ဏံမ္ဂး ကလေၚ်ကၠောန်ဗဒှ်အာပၠန်ရောၚ်ဂှ် နူကဵုစၠတ်ထဝ်တွဵုရး ကဵုသမ္တီလလောၚ်တြးလဝ်ရ။
ဆဂး စပ်ကဵုဂလာန်သၟာန်တံကီု၊ ဂလာန်ပတိုန်ထ္ၜးပ္ဍဲကောံဓရီုဏံတုဲ နူကဵုလပါ်စၠတ်ထဝ် မုလေဝ် ကဵုသမ္တီလလောၚ်တြးလဝ် ဟၟဲဏီပုဟ်။
အပ္ဍဲကောံဓရီုစၠတ်ထဝ်ဏံမ္ဂး ညံၚ်ဂွံသၟာန်အာ ပရေၚ်ကိစ္စကၠေၚ်စက်ကလေၚ်ပိုတ်မံၚ်ဂှ်ကီု၊ ပရေၚ်ဗက်ရပ်မံၚ်သၟတ်တံ သွက်ဂွံယိုက်ဝန်ပၞာန်၊ ပရေၚ်ဗက်စအဂတိ၊ ပရေၚ်အာတ်မံၚ်သြန် ပ္ဍဲသၞေဟ်ကၚ်ဂိက်စၟဳစၟတ်ကေုာံ ပရေၚ်အုပ်ဓလီုသၞောဝ်ဓရ် ဍိုန်လျမံၚ်တံဂှ် ညးဒေသတံနွံပၟိက် မိက်ဂွံကဵုသၟာန်အာရောၚ်။
တုဲပၠန် နူကဵုဒပ်ပၞာန်၊ ဒပ်ဗၠာဲသၟိၚ်ကေုာံ ဒပ်မၚ်ကွာန်တံဖံက်ပကဝ်လဝ်ပရေၚ်သၞောဝ်ဓရ် ဟွံမွဲကဵုဥပဒေတံကီု၊ အလဵုဇကု က္ဍိုပ်သ္ကိုပ်အလဵုအသဳတံပါလုပ်မံၚ် အပ္ဍဲပရေၚ်ကူဗၞိက်ဟွံလုပ်သၞောဝ်ကီု၊ ပ္ဍဲကဵုဒေသ ဝိုၚ်ဝေၚ်တံဆက်နွံမံၚ်ဂှ် ညံၚ်သ္ဂောံသၟာန်အာဂလာန်ပတိုန်ထ္ၜးတံဂှ်လေဝ် ပရေၚ်အာတ်မိက်မံၚ် နွံရ။
ပ္ဍဲကောံဓရီုစၠတ်ထဝ်တွဵုရးမန် တတိယဝါ ကောံဓရီုလၟေၚ်ဍာံ အလန်ဒုတိယတုဲကၠုၚ်တေံဂှ် ပတိုန်ထ္ၜးသၟာန်လဝ် ဂလာန်သၟာန် ၂၅ တၚ်၊ ဂလာန်ပတိုန်ထ္ၜးလဝ် ၄ တၚ် နွံမံၚ်ရောၚ်။
အပ္ဍဲကောံဓရီုတေံဂှ် ဂလာန်ပတိုန်ထ္ၜး သွက်ဂွံကၟာတ်ထောံ ပရေၚ်ပံက်စက်သၠဲရမျှာၚ် သံၚ်ဗံက်ထတ်တ်တောဲလဝ်ကေုာံ သွက်ဂွံကၟာတ်ဗဒေါအ်ထောံဝိုၚ်ဝေၚ်တံဂှ်တှ်ေ ဒှ်ပရေၚ်ညးဍုၚ်ကွာန်တံ စွံအာရီုဂၠိုၚ်တုဲ ပ္ဍဲစၠတ်ထဝ်တွဵုရးဂှ် ညးဒစဵုဒစးဟၟဲ သ္ပလဝ်ဒတန်ရောၚ်။
ပရိုၚ် – သြၚ်လောန်တိုၚ်မ်
Photo – MOI