ဍာ်ဗု၊ ဂျူလာၚ် ၂၂
အပ္ဍဲကဵုခရိုၚ်ထဝါဲ ရးတနၚ်္သဳ ညးရီုဗၚ်ရေၚ်တၠုၚ်မံၚ်သွက်ပရေၚ်ပညာကေုာံ ပရေၚ်ဒဴပၞာန် က္ဍိုပ်သ္ကိုပ်ဂကောံ The Ants – Tanintharyi ပါလုပ်မံၚ် ၃ တၠတံဂှ် ကရောၚ်ပၞာန်ဒပ်ပၞာန်ဗၟာ ရပ်ဂစိုတ်ထောံလဝ်ရောၚ် ညးဒေသတံ ဟီုကဵု ဌာန်ပရိုၚ် သြၚ်လောန်တိုၚ်မ်ရ။
ညးတာလျိုၚ်ဂကောံ The Ants Humanitarian Aid Team – Tanintharyi ကိုအတာ၊ လျိုၚ်ပရေၚ်ဘဏ္ဍာ ကိုလဳယောန်၊ ညးတာလျိုၚ်ပ္ညဳပ္ညပ်ကိုန်အစဳဇန် ကိုမျာတ်တူတံ အခိၚ်စိုပ်မံၚ်အပ္ဍဲဒေသ ဗွိုၚ်ပရေၚ်ပိုန်ဒြပ်တၟေၚ်ထဝါဲ ဂိတုဂျူလာၚ် ၉ တုဲကၠုၚ်တေံဂှ် ကရောၚ်ပၞာန်ဒပ်ပၞာန်ဗၟာတံ ရပ်ဂွံဏာလဝ်ရ။
က္ဍိုပ်သ္ကိုပ်ဂကောံ The Ants – Tanintharyi ၃ တၠ ကရောၚ်ပၞာန်ဗမာရပ်ဏာလဝ်တံဂှ် ကလေၚ်ဂွံဆဵုညာတ်လဝ် ရုပ်ဇွညးတံ ပ္ဍဲဂိတုဂျူလာၚ် ၂၀ အပ္ဍဲကဵုဒၞာဲဂြိုပ် ကၠေၚ်သတ်ဗြဴ ကွာန်ဧကနိ ပွိုၚ်ဍုၚ်ဍာ်ဗု ဒေသဗွိုၚ်ပရေၚ်ပိုန်ဒြပ်တၟေၚ်ထဝါဲဂှ်ရောၚ်။
အဃောကလေၚ်ဆဵုလဝ်ဂှ်တှ်ေ ဘဲဒဏ်ဒးဝပ် ဒးဒုၚ်ထပက်လဝ် ဗီုပြၚ်ဒးဒုၚ်ပျဲပျာံလဝ်ဇၞော်ကဵုဇြဟတ်တုဲ ဒးချိုတ်အာလဝ်ကီု ဟိုတ်နူအကာဲအရာရုပ်ဇွတံ ရပ်ဂိုၚ်ကေတ်ကဵုတဲဟွံဂွံတုဲ ပ္ဍဲတ္ၚဲဂှ်ဟေၚ် စံၚ်ပ္တုဲ ဖျေံထောံလဝ်ကမ္မဌာန် အပ္ဍဲဒၞာဲဂှ်ရောၚ် ဂွံတီရ။
သၟတ် ၃ တၠ ဒးဒုၚ်ရပ်ဂစိုတ်တံဏံဂှ် ဒှ်သၟတ်အာယုက်ပွဳပွူ ၂၀ သၞာံတံတုဲ ဒှ်ညးချဳဒရာၚ်ဇြဟတ်က္တိုၚ်ကၟိုဟ် အပ္ဍဲကဵုပရေၚ်ပညာ ကာလအကြာ၊ ပရေၚ်ရဲဒဴပၞာန်ကေုာံ ပရေၚ်ကလေၚ်ပလန် အရာ ကာမံက်တိုန်ပ္ဍဲကွာန်အရာပ် ပ္ဍဲဒေသထဝါဲတုဲ ဒှ်ညးတၠုၚ်လအာနွံ ပရေၚ်က္ဍိုပ်သ္ကိုပ်သၟတ်တံရောၚ် သ္ဂးရ။
စပ်ကဵုပရေၚ်က္ဍိုပ်သ္ကိုပ် ၃ တၠဏံ ဒးဒုၚ်ဂစိုတ်လဝ်ဂှ် သွက်ဂွံဟီုပတိတ်မအရေဝ် ဝါတ်ခါဲလောန်ကွေံတုဲ သီုကဵုမိမကၟိန်သ္ၚိဌာန် ညးသှ်ေၜက်တံမွဲကရောံကီု မ္ဒးအောန်စိုတ်ဗွဲမလောန်ရောၚ် ပ္ဍဲဂျူလာၚ် ၂၁ ဂှ် နူကဵုဂကောံ The Ants – Tanintharyi ပတိတ်လဝ်လိက်သဝဏ်အောန်စိုတ် မဒှ်ရ။
ဟိုတ်နူက္ဍိုပ်သ္ကိုပ် ၃ တၠ ဒးဒုၚ်ဂစိုတ်လဝ်တုဲ နူကဵုဂကောံ The Ants – Tanintharyi ထမံက်မံၚ်ရုပ်ရဴ အစဳဇန်လၟေၚ်ပရေၚ်ကမၠောန်အိုတ်သီုတံဂှ် ဒေါအ်ဇူအာမွဲခဏရောၚ် ကဵုလဝ်သမ္တီရ။
ကရောၚ်ပၞာန် ရပ်လဝ်ညးဒေသကေုာံ မၞိဟ်တြုံရဲအာတရဴ ၜိုတ် ၁၅ တၠတံဂှ်လေဝ် စဵုကဵုအခိၚ်လၟုဟ် ဟွံဗၠးတိတ်ဏီတုဲ၊ ကရောၚ်ပၞာန်ဗၟာဂှ် ဆက်ချဳဒရာၚ်အာမံၚ် ပ္ဍဲအကြာဗွိုၚ်ပရေၚ်ပိုန်ဒြပ်တၟေၚ်ထဝါဲဏီဖိုဟ်ရောၚ် ညးဒေသတံဟီုတုဲ ဂွံတီရ။
ပရိုၚ် – သြၚ်လောန်တိုၚ်မ်
Photo – Social Media