သဵု(လ်) ၊ အံက်တဝ်ဗာ (၃၁)
ပ္ဍဲခရိုၚ်ပြေလၟောၚ် အဳထဝန် ဍုၚ်သဵု(လ်) ကိုဝ်ရဳယျာသၠုၚ်ကျာဂှ် အပ္ဍဲအခိၚ်ကၠောန်ဗဒှ်ဒၟံၚ် ပေါဲသ္ဘၚ်ဟဝ်လဝေန် ပ္ဍဲဗ္တံဂိတုအံက်တဝ်ဗာ စၟတ်တ္ၚဲ (၃၀) ဂှ် ဟိုတ်နူဂအုံဗွဝ်မၞိဟ်တံ ဂရိုဟ်လိုန်ဒးညးသ္ကအ် အပ္ဍဲဂၠံၚ်မဍုန်ဂြက်ဂှ်တုဲ မၞိဟ် (၁၅၀) ပြၚ် ဒးချိုတ်အာလဝ်ရ။
ညးတာလျိုၚ် နူ National Fire Agency, Choi Cheon-sik ဂှ် ပ္ဍဲအဳထဝန်ဂှ် နူကဵုဗွဝ်မၞိဟ်တံဏံ မွဲကဆံၚ် ဂွံဝပ်ဇီုကပိုက်တံ က္တဵုဒှ်လဝ်တုဲ (၁၅၀) တၠပြၚ် ကောန်တၟံဒေါအ်တုဲ ဒးလွဳကဵုလဝ်ဂှ် ဟီုရ။
ပ္ဍဲကရေပ်ဂၠံၚ် မၞုံဗ္ဒါဲ Hamilton Hotel မဒှ်ဒၞါဲဗော် ဍုၚ်သဵု(လ်) အဓိကဂှ် ဒးဒုၚ်ဂရိုဟ် ကဵုဂအုံဗွဝ်မၞိဟ်တံတုဲ ဒးဒုၚ်ၜုၚ်တက်တံလေဝ် နွံမာန်ဂှ် စှ်ေစိုတ်ရောၚ် Choi ဆက်ဟီုဂးလဝ်ရ။
ကုသၞာဲဒဴ မကၠုၚ်စိုပ်ယိုက်ဂၠေၚ်တာလျိုၚ်မာန် လွာဲလွာဲဂှ် မၞုံဍုၚ်သဵုတံ မပါလုပ် သီုကဵုသၞာဲဒဴကာတၟေၚ် အလုံကၟိန်ဍုၚ်မွဲ (၄၀၀) တၠပြၚ်တံဂှ် ဗလးနၚ် ပ္ဍဲဒၞါဲဒှ်ပရူဂှ်တုဲ ဟံၚ်ပြာ်ဒၟံၚ် ညးကလိဂွံလဝ်ဝပ်တံရ။
ပ္ဍဲကဵုဗဳဒဳယော မပြးထၞာန်ဒၟံၚ် လ္တူသဵုယှေဝ်မဳဒဳယျာတံဂှ် သၞာဲဒဴရီုဗၚ်ဟံၚ်ပြာ်တံ ကၠောန်သ္ပ CPR ကာတၟေၚ် ကုမၞိဟ်ဒေါမ်စှ်ေဒၟံၚ်တံတုဲ ဟံၚ်ပြာ်ဒၟံၚ်ဂှ် ဂွံဆဵုကေတ်ရ။
ဒပ်ဗၠာဲသၟိၚ်တံလေဝ် ဒဒှ်ရကဵုလဝ် CPR ကုမၞိဟ်ဂၠိုၚ်ကဵုဒါဇြိန် လ္တူဂၠံၚ်အဳထဝန်ဂှ် သ္ပလဝ်ဒတန်တုဲ ကုမၞိဟ်ဗွဲမဂၠိုၚ်ဂၠေၚ် မသှ်ေတံလေဝ် ပလံၚ်ဗစိုပ်လဝ် ရုၚ်ဂဥုဲ ဗ္ဒါဲဗ္ဒါဲတံရောၚ်ဂှ် သ္ဂးရ။
လၟေၚ်ဒဒှ်ဏံ ဗွဲလစှ်ေဂှ် ဂၠိုက်ဂၠါဲစၟဳစၟတ်ဒၟံၚ်ဖိုဟ်ဂှ်လေဝ် ဒပ်ဗၠာဲသၟိၚ်တံ ဟီုဂးလဝ်ရ။
အတိုၚ်မဳဒဳယျာ အပ္ဍဲဒေသတံ ထ္မံက်ထ္ၜးလဝ် ကၠာတဲတံဂှ်မ္ဂး ကြဴနူဂွံမိၚ်ကေတ် ပူဂဵုယၟုဒယှ်မွဲတၠ ကၠုၚ်စိုပ်ဂေတ်ဝေၚ်ဂှ်တုဲ မၞိဟ်ဗွဲမဂၠိုၚ်ဂၠေၚ်တံဝွံ ဂ္စါန်ဂြိပ်စိုပ်ကၠုၚ် Bar အဳထဝန်တုဲ ဒးဂဗလဝ်ကဵု လၟေၚ်ဒဒှ်ဏံရဂှ် ဂွံတီကေတ်ရ။
သမ္မတကိုဝ်ရဳယျာသၠုၚ်ကျာဂှ် အာတ်မိက်လဝ် ညးတာလျိုၚ်တံ သွက်ဂွံလွဳလွတ်ကဵု ညးမကလိဂွံဝပ်တံ ဗွဲမပြဟ်ဂှ်ကဵု သွက်ဂွံကလေၚ်သ္ၚဳဂၠိပ် ပရေၚ်ဂီုကၠီု ဒၞါဲကၠောန်ဗဒှ်လဝ် ပေါဲသ္ဘၚ်ဂှ်ရ။
သွက်ဂွံလွဳလွတ် ညးမကလိဂွံဝပ်တံဂှ် ဇံၚ်ခါတ်ပ္ဍဲရုၚ်ဂဥုဲဗ္ဒါဲဗ္ဒါဲတံ ညံၚ်ဂွံပြေပြံၚ် သွက်ဂွံရေၚ်တၠုၚ်ကဵုဂှ်ကီု၊ သွက်ဂွံဖျေံလဝ်ဂကောံ မကဵုအရီုဗၚ် စပ်ကဵုဂဥုဲဇဗ ဘဲအန္တရာယ်သဘာဝတံ ဗွဲမပြဟ်ဂှ်လေဝ် စၞောန်ပ္ညုၚ်လဝ် ဌာနဝန်ဇၞော်ဝေၚ်ဇြဟတ်ဂှ် ဂွံတီကေတ်ရ။
Ref: AP