ကျာ်ထဝ်၊ အံက်တဝ်ဗာ (၃၀)
ပတွဵုနူ ဂိတုအံက်တဝ်ဗာ သတ္တာဟတတိယ တုဲကၠုၚ်တေံတုဲ ပ္ဍဲပွိုၚ်ဍုၚ်ကျာ်ထဝ်၊ တွဵုရးဍုၚ်မန်တံဂှ် ဟိုတ်နူကဵုအကံက်ထလဳဂရာမ် ညးထံက်ဂလာန်ဒပ်ပၞာန်တံ ကဵုရပ်ဒက်ဒၟံၚ်ဂှ်ရ ညးဒေသဟွံအောန်နူကဵု (၁၀) တၠ ဒးဒုၚ်ရပ်ဒက်လဝ်ဂှ် ညးလ္တူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးထံက်ဂလာန်ဒပ်ပၞာန်တံဝွံ ပ္ဍဲကဵုအကံက်ထလဳဂရာမ်ဍေံတံဂှ် စပ်ကဵုညးဒစဵုဒစး ကံၚ်ဇြဳပၞာန်တံ ၊ညးထံက်ဂလာန်အလဵုအသဳညဳသၟဟ်ဂကူ NUG တံကဵု ညးချဳဒရာၚ် ဒစဵုဒစးတၠအဝဵုပၞာန်တံ ၊ ဆက်စပ်ကဵု PDF တံဂးတုဲ ပ္တိုန် Post တုဲ စကာကဵုရပ်ဒက်ဒၟံၚ်ရ။
ဒၟါနူညးထံက်ဂလာန် ဒပ်ပၞာန်တံ ကဵုရပ်ဒက်ဂှ်တုဲ ဒဝ်နုနုယဳ၊ ဒဝ်မိုဝ်ဝ်ယဳ နူအရာပ် (ကံ့ကော်)၊ ကိုဝ်ကျဝ်ဇြေန်လာတ် နူအရာပ် (ဖက္ကလိပ်) ၊ ကိုဝ်ယှိုၚ်အံၚ်ထောန် ကေုာံ မမျေအ်မာ နူအရာပ် စၟတ် (၄) မဒှ်အရာပ်လ္တူဍုၚ်ကျာ်ထဝ်တံ မပါလုပ် အပံၚ်ဖအိုတ် (၁၀) တၠ ဟွံက ဒးဒုၚ်ရပ်လဝ်ရ။
ပၞောဝ်ကဵုညးဒးဒုၚ်ရပ်ဒက်တံဂှ် တၠကမၠောန်တံ၊ ညးထံက်ဂလာန်ဗော် NLD တံ၊ ညးဒေသ မဆက်စပ်ဒၟံၚ် ကဵုဂကောံလဵုမှ ဟွံမွဲတံလေဝ် ပါလုပ်ဒၟံၚ်တုဲ ညးဒးဒုၚ်ရပ်ဒက်လ္ၚဵုတံမ္ဂး ဒၟါနူအရာဟွံပေၚ်စိုတ် စပ်ကဵုပရေၚ်ပူဂဵုတံတုဲ ကဵုပရိုၚ်ဗၠေတ်တ်တုဲ မၞိဟ်ဒးဒုၚ်ရပ်တံလေဝ် ပါလုပ်ဒၟံၚ်ရ။
ဒပ်ကံၚ်ဇြဳပၞာန်တံ အာတ်မိက်ဒၟံၚ်သြန် ကုညးဒးဒုၚ်ရပ်ဒက်တံ မွဲဆမွဲတာန်တုဲ လ္ၚဵုတံဂှ်တှ်ေ ခုတ်စုတ်ၝောံပိုဒ်နာနာတုဲ ပံက်လဝ်အမှု နွံဂှ် ညးဒေသတံ သ္ဂးအိုတ်ရ။
ပ္ဍဲပွိုၚ်ဍုၚ်ကျာ်ထဝ်ဂှ် ကြဴနူဒပ်ပၞာန်သီအဝဵုတုဲ တၠကမၠောန်ပရေၚ်ပိုန်ဒြပ်တံ၊ ညးဒစဵုဒစး ချဳဒရာၚ်တၠအဝဵုပၞာန်တံ မပါလုပ် ညးဍုၚ်ကွာန်ကောန်အရာပ် (၁၀၀) တၠ ဟွံက ဒးဒုၚ်ဒက်လဝ်တုဲ ဗွဲမဂၠိုၚ်ဂှ်တှ်ေ ကံၚ်ဇြဳပၞာန် ဖျေံစၟတ်လဝ် ဒုဟ်ဒဏ်ထံၚ် နာနာသာ်ရ။
အလုံမွဲကၟိန်ဍုၚ်ဂှ် ကြဴနူဒပ်ပၞာန်သီအဝဵုတုဲ ညးဍုၚ်ကွာန်ကောန်အရာပ် ဗ္ဒါဲ (၁၆၀၀၀) ဒးဒုၚ်ရပ်ဒက်လဝ်ဂှ် ဂကောံရီုဗၚ်မၚ်မွဲကောန်ထံၚ်ပရေၚ်ဍုၚ်ကွာန် (AAPP) လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)