ညံၚ်လေဝ်ပေန်၊ နဝ်ဝေမ်ဗာ (၁)
ပ္ဍဲခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU ဂှ် တုဲကၠုၚ်ဂိတုအံက်တဝ်ဗာ (၂၈) တေံ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်လက်နက်ဇၞော်တံဂှ်ရ ညးဍုၚ်ကွာန်ကောန်အရာပ်ဒေသ (၁) တၠ ချိုတ်တုဲ (၃) တၠ ကလိဂွံလဝ်ဝပ်ဂှ် ဌာနလလောၚ်ပရိုၚ်ဗဟဵု KNU လလောၚ်ပ္တိတ်လဝ်ရ။
တုဲကၠုၚ် ဂိတုအံက်တဝ်ဗာ စၟတ်တ္ၚဲ (၂၈) အခိၚ်ဗ္တံဂှ် ဟိုတ်နူဒပ်ကံၚ်ဇြဳပၞာန်တံ ပန်ပှော်လွဟ်လက်နက်ဇၞော် လ္တူခလှာတ်ဝါ ကွာန်တေတ်ချသုက်၊ ပွိုၚ်ဍုၚ်မုၚ်၊ ခရိုၚ်ညံၚ်လေဝ်ပေန် KNU ဂှ်ရ ညးဍုၚ်ကွာန်ဒေသ မကၠောန်ဝါဗ္ၚ (၂) တၠ ဒးအာလွဟ်လက်နက်ဇၞော်တုဲ မွဲတၠ ဒးပြဟ်လလုဲအာတုဲ မွဲတၠ ကလိဂွံလဝ်ဝပ် နွံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ပ္ဍဲပွိုၚ်ဍုၚ်ကျံက်ကျဳ ခရိုၚ်ညံၚ်လေဝ်ပေန်ဂှ်လေဝ် ဒပ်ကံၚ်ဇြဳပၞာန်တံ နူကွာန်နာတ်တာန်ကွေန် ပန်ဖျေံလဝ်လွဟ်လက်နက်ဇၞော် နကဵုဒရုၚ် ပ္ဍဲကွာန်ဝါပေန်သုဂှ်ရ ညးဍုၚ်ကွာန်ဒေသ (၂) တၠ ကလိဂွံလဝ်ဝပ်ဇီုကပိုက်ဒးလဝ်ဂှ် KNU သ္ဂးလဝ်ရ။
တုဲကၠုၚ် ဂိတုအံက်တဝ်ဗာ (၂၆) ပယျာံဂယးပြဟ်ဟ်ဂှ်လေဝ် ဒပ်ကံၚ်ဇြဳပၞာန် မၞုံကွာန်နာတ်တာန်ကွေန်ဂှ်ဝွံ ပန်ပှော်လွဟ်လက်နက်ဇၞော် အပ္ဍဲကွာန်တံဂှ်တုဲ ပ္ဍဲအခိၚ်ဗ္တံ (၈) နာဍဳကဵု (၁၀) နာဍဳကဝက်ဂှ်လေဝ် ဒပ်ကံၚ်ဇြဳပၞာန် နူကွာန်သုက်ကျဳ ကေုာံ ကွာန်ကျံက်ခေဝ်ကျဳတံဂှ်ဝွံ ပန်ဖျေံလဝ်လွဟ်ဇၞော် ကုဘာလကျာ်အေန်နက်ဂှ် (၄) လစုတ်၊ ကုကွာန်နယဲပေန်ဂှ် (၅) လစုတ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)