(သိမ်ဇရပ်) ၊ နဝ်ဝေမ်ဗာ (၁)
ပ္ဍဲဗ္ဒါဲဘာဇြေန်ဖျူ၊ ဍုၚ်(သိမ်ဇရပ်) ၊ ပွိုၚ်ဍုၚ်ကျာ်ထဝ်၊ တွဵုရးဍုၚ်မန်ဂှ် တုဲကၠုၚ်ဂိတုအံက်တဝ်ဗာ စၟတ်တ္ၚဲ (၃၀) တေံ ကွဳစက်ဂေတ်ကၚ်ကံၚ်ဇြဳပၞာန် ဒးဒုၚ်ဗ္တိုက်ဂှ်ရ ကောန်ဒပ်ကံၚ်ဇြဳပၞာန် (၅) တၠဟွံက ဇီုကပိုက်ချိုတ်မာန်ဂှ် ညးဒုၚ်တာလျိုၚ် ခရိုၚ်သဓီု PDF ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုတ္ၚဲဂှ် အခိၚ်ဗ္တံ ၜိုတ် (၈) နာဍဳကဝက်ဂှ် ဂကောံဒပ်ပံၚ်ကောံ သၟဝ်တဲ ကမ္မတဳကောပ်ကာဲဖန်ဇန် ကေၚ်ကာမိတ်ခရိုၚ်သဓီု KNU တံ ပန်ပှော်ဗ္တိုက်လဝ် ကွဳစက်မၚ်ကၚ် ဇြဟတ်ဒပ် ကံၚ်ဇြဳပၞာန်ကဵု ဒပ်ဗၠာဲသၟိၚ် မပါလုပ် ဗၞတ် (၂၀) တၠ မဂေတ်ဒၟံၚ်ကၚ် အပ္ဍဲဍုၚ် (သိမ်ဇရပ်) ဂှ် ကြပ်ပ်ရ။
ကွဳစက်ဂေတ်ကၚ်ကံၚ်ဇြဳပၞာန် ဒးဒုၚ်ဗ္တိုက်လဝ်ကြပ်ပ်ဂှ်ရ ကောန်ဒပ်ကံၚ်ဇြဳပၞာန် ကေုာံ ကောန်ဒပ်ဗၠာဲသၟိၚ် (၅) တၠ ဟွံက ဇီုကပိုက်ချိုတ်မာန်တုဲ ကွဳစက်ကံၚ်ဇြဳပၞာန် မွဲဖ္ဍိုက် လီုလာ်ဇီုကပိုက်ဒးအာလဝ်ရဂှ် ညးဒုၚ်တာလျိုၚ် ခရိုၚ်သဓီု PDF ကိုဝ်ဨမေန်ထောန် ဟီုရ။
ကြဴနူဗ္တိုက် ကွဳစက်ဂေတ်ကၚ် ကံၚ်ဇြဳပၞာန်တုဲဂှ် ဂကောံဒပ်ပံၚ်ကောံ သၟဝ်တဲ ကမ္မတဳကောပ်ကာဲဖန်ဇန် ကေၚ်ကာမိတ် ခရိုၚ်သဓီု KNU တံ ဂွံဝပ်ဇီုကပိုက်ဟွံမွဲတုဲ ဆုတ်ကလေၚ်လဝ် ဗွဲမအံၚ်ဇၞးဂှ် သ္ဂးရ။
တုဲကၠုၚ် ဂိတုအံက်တဝ်ဗာ (၂၅) တေံလေဝ် ပ္ဍဲဗ္ဒါဲရုပ်သ္ကိုပ်ဗိုလ်အံၚ်သာန် ဍုၚ်(သိမ်ဇရပ်) ဂှ် ကွဳစက်ကံၚ်ဇြဳပၞာန် ဒးဒုၚ်ဗ္တိုက် ဗ္တိုဟ်လဝ်မာၚ်တုဲ အပ္ဍဲပရေၚ်ဗ္တိုက်ဏံဂှ် ကောန်ဒပ်ကံၚ်ဇြဳပၞာန် ဟွံအောန်နူကဵု (၃) တၠ ဇီုကပိုက်ချိုတ်အာလဝ်ရ။
ပ္ဍဲပွိုၚ်ဍုၚ်ကျာ်ထဝ်၊ တိဍာ်ထိၚ်ဒဝ် ဒပ်မဟာ (၁) ဗော်သွးကောန်ဂကူကရေၚ် KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံဂှ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်တုဲ ပေါဲဗ္တိုက်ဆေၚ်မုက်တံလေဝ် က္တဵုဒှ်ဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)