အပ္ဍဲကဵု ဍုၚ်ဇၞော်မဟာ တွဵုရးမန် မတ်မလီု အမှုဒုဟ်စရိုတ်တံ က္တဵုဒှ်မံၚ်လတူဂၠံၚ်ဇၞောဝ်ဒဵု ယၟုပြာကတ်ဒယှ်မံၚ်ဂှ် ညးစၞးစၠတ်ထဝ် တွဵုရး ပွိုၚ်ဍုၚ်ကျာ်မြဟ် စၟတ် (၁) ဥူအံၚ်ထောတ် သၟာန်လဝ် တၚ်သၟာန် ပ္ဍဲကဵုစၠတ်ထဝ်ရ။
တၚ်သၟာန်ဏံဂှ်တှ်ေ ပ္ဍဲကောံဓရီုလၟေၚ်ဍာံ တတိယဝါ စၠတ်ထဝ်တွဵုရးမန်အလန်တတိယ ကၠောန်လဝ် ပ္ဍဲဂိတုအဝ်ဂတ် ၁၀ တေံဂှ် သၟာန်သၟုက်လဝ်တင်သၟာန်ဏံ မဒှ်ရ။
တၠသၟာန်တၚ်သၟာန် ဟီုဂှ်တှ်ေ ဂၠံၚ်ဇၞောဝ်ဒဵုဏံဂှ် ရဲဝေၚ်ဒြဟတ်တံကီု၊ ရဲကၠုၚ်ပရေလၟောၚ်စိုတ်၊ ကၟုဲကၠုၚ်လ္ၚောဝ်ကျာ် အပ္ဍဲဍုၚ်မ္ၚးဍုၚ် စဳမြဟ်ဂဵုလဟဵုမံၚ်တံဂှ် လတူအကာဲအရာဏံ ကေတ်အခေါၚ်ခိုဟ်တုဲ ရဲမိက်ဂွံကၠောန် အမှုဒုဟ်စရိုတ်တံ အတိုၚ်အကာဲအရာကဵုကၠုၚ်ဂှ် ကၠောန်မံၚ်အမှုဒုဟ်စရိုတ်တံရောၚ် သ္ဂးရ။
ဟိုတ်ဂှ်ရ ပ္ဍဲဂၠံၚ်ဇၞောဝ်ဒဵုဂှ် ဗ္ဒိုပ်ကၚ်ဗၠာဲသၟိၚ် ကေၚ်ပံက်စွံလဝ်ဗီုကၠာတေံတံဂှ် သွက်ဂွံကလေၚ်စွံကဵုနွံ/ဟၟဲ စပ်ကဵုပရေၚ်ဏံတုဲ ညးစၞးစၠတ်ထဝ်တွဵုရး ဥူအံၚ်ထောတ် သၟာန်လဝ်တၚ်သၟာန်ရောၚ်။
စပ်ကဵုသၟာန်လဝ် တၚ်သၟာန်ဏံဂှ် ဝန်ဇၞော်ပရေၚ်ဂီုကၠီုဒေသပယျဵု တွဵုရးမန် သ္ကိုပ်ဗိုလ်ဇၞော် ကျဝ်ဇွာမျေအ် ခၠေဝ်သှ်လဝ်ဂှ်တှ်ေ ဂၠံၚ်ဇၞောဝ်ဒဵုကဵု ရုၚ်ဗ္ဒိုပ်ဗၠာဲသၟိၚ် ၝောံဍုၚ်မတ်မလီုဂှ် ခြာၜိုတ် ၄ ဖာလုၚ်၊ ဗ္ဒိုပ်ဗၠာဲသၟိၚ် ကုန်စက္ကာဲဂှ် ခြာမံၚ်ၜိုတ် ၁ တိုၚ်၊ ရုၚ်သ္ကိုပ် ဒပ်ဗၠာဲသၟိၚ် တွဵုရးမန်ဂှ် ခြာမံၚ်ၜိုတ် ၂ ဖာလုၚ်ရတုဲ ကြပ်မံၚ်ကဵု ဗ္ဒိုပ်ဗၠာဲသၟိၚ်တံဏံကီု၊ သီုကဵုဂေတ်မံၚ်ကၚ်တုဲ ကၚ်အောပ်တံလေဝ်နွံမံၚ်ရောၚ် ဟီုရ။
တုဲပၠန် အတိုၚ်ဗီုဏံဂေတ်မံၚ်ကၚ် ကၚ်အရာပ်တံနွံမံၚ်တုဲ ပ္ဍဲကဵုသၞာံ ၂၀၂၄-၂၀၂၅ လောန်ကၠုၚ်တေံမ္ဂး အမှုဒုဟ်စရိုတ်၊ အမှုပၠံၚ်ၜးတံကဵု အမှုတၞဟ်ဟ်တံ က္တဵုဒှ်လဝ်ဟၟဲတုဲ ပ္ဍဲသၞာံ ၂၀၂၆ ဂိတုဂျူလာၚ် ၁ ဂှ် ဟေၚ် အကာဲအရာဂစိုတ်ပၠံၚ်ၜး ကွဳလိုန်ဓါတ် သၟာတက္ကသဳမွဲတၠ က္တဵုဒှ်ကၠုၚ်လဝ်ရောၚ် သ္ဂးရ။
အကာဲအရာ ဂစိုတ်မၞိဟ် ပၠံၚ်ၜးကွဳလိုန်ဓါတ် သၟာတက္ကသဳဂှ်လေဝ် ဟိုတ်နူမိက်ဂွံဂွံသြန် ဒစးဒုၚ်ဖန်ဇန်လဝ်ကိုပ်ကၠာတုဲ အတိုၚ်လၟေၚ်ဓမ္မတာမ္ဂး ဒပ်ဗၠာဲသၟိၚ်တံဂေတ်မံၚ်ကၚ်လၟေၚ်ဍာံနွံတုဲ အမှုရာဇာဝတ်တံ က္တဵုဒှ်လဝ်ဟၟဲ၊ လၟုဟ်ဂှ် ဟိုတ်နူကိစ္စဒစးဒုၚ်ဖန်ဇန်လဝ်ကိုပ်ကၠာတုဲ က္တဵုဒှ်အာလဝ်ရောၚ် သ္ကိုပ်ဗိုလ်ဇၞော် ကျဝ်ဇွာမျေအ် ဟီုရ။
အမှုရာဇာဝတ်ဗီုတံဏံ ညံၚ်ဟွံဂွံထပ်က္တဵုဒှ် ပ္ဍဲဂၠံၚ်ဇၞောဝ်ဒဵုဂှ်တှ်ေ နူဗ္ဒိုပ်ဗၠာဲသၟိၚ် ၝောံဍုၚ်မတ်မလီုကဵု ကုန်စက္ကာဲတံဂှ် ဂေတ်ကၚ်၊ အောပ်မၚ်ကၚ်တံကၠောန်မံၚ်တုဲ၊ နကဵုအစဳဇန်ဒပ်ဗၠာဲသၟိၚ်တွဵုရးမန်ဂှ် ဒုသ္ကိုပ်ဗၠာဲသၟိၚ်မွဲတၠ သ္ကိုပ်သ္က ဇြဟတ် ၁၀ တၠတုဲ ဆက်ကေတ်မံၚ်တာလျိုၚ် ပရေၚ်ဂီုကၠီုအတိုၚ်ဂၠံၚ်ရောၚ် သ္ဂးရ။
ဟိုတ်ဂှ်ရ အစဳဇန်သွက်ဂွံပံက် ဗ္ဒိုပ်ကၚ်ဗၠာဲသၟိၚ် အတိုၚ်ဇိုၚ်ဂၠံၚ်ဇၞောဝ်ဒဵုဂှ် ဟၟဲကီု၊ သွက်ပရေၚ်ဂီုကၠီု ကေုာံ ညံၚ်သၞောဝ်ဥပဒေဂွံအုပ်ဓလီုအာမာန်ဂှ် ဒပ်ဗၠာဲသၟိၚ် ပွိုၚ်ဍုၚ်မတ်မလီု သၟးဟွံက နကဵုဇြဟတ်ဒပ်ရီုဗၚ် ဗၠာဲသၟိၚ်တွဵုရးတံလေဝ်ဂေတ်မံၚ်ကၚ် အောပ်မၚ်မံၚ်တံရောၚ် ကလေၚ်သှ်ကဵုလဝ်ရ။
အပ္ဍဲဂၠံၚ်ဇၞောဝ်ဒဵု ဍုၚ်မတ်မလီုဂှ်တှ်ေ အခိၚ်ကၠာတေံညံၚ်ညးဍုၚ်ကွာန်တံ ပရေၚ်ဂီုကၠီုဂွံနွံ ညံၚ်အမှုဒုဟ်စရိုတ် ဟွံဂွံက္တဵုဒှ်ဂှ် နကဵုအမိၚ်ဒေသန္တရဂးတုဲ ပ္ဍဲသၞာံ ၂၀၁၅ တေံ ပံက်လဝ်ဗ္ဒိုပ်ကၚ်ဗၠာဲသၟိၚ်မွဲ စွံလဝ် ကရပ်ဗ္ဒာဲ View Point ဂှ်ရ။
ကြဴနူဂှ် ပၞာန်သီအဝဵုတုဲ ပ္ဍဲသၞာံ ၂၀၂၁ ဂှ်တှ်ေ ဗ္ဒိုပ်ကၚ်ဗၠာဲသၟိၚ်ဏံ ထ္ၜးဟိုတ်ကဵုပရေၚ်ဂီုကၠီုတုဲ ရုပ်ထောံလဝ်ရ၊ လၟုဟ်ဏံတှ်ေ အမှုကၠတ်၊ အမှုပၠံၚ်ၜးဂစိုတ်မၞိဟ် အမှုဒုဟ်စရိုတ်တံ မွဲဏှမွဲဏှ က္တဵုဒှ်မံၚ်ရောၚ်။
ပရိုၚ် – သြၚ်လောန်တိုၚ်မ်