ကျာ်မြဟ်၊ အဝ်ဂတ် ၁၂
အပ္ဍဲတွဵုရးမန် ပွိုၚ်ဍုၚ်ကျာ်မြဟ် ကွာန်ၜါသွာၚ် ဟိုတ်နူပေါဲဗတိုက် အကြာၜါလပါ်ဂှ်ရ ကွာန်လီုလာ်အာလဝ်တုဲ သွက်သ္ဂောံ ကလေၚ်ဒက်ပတန်အာမာန်ဂှ် ပရေၚ်ဂီုကၠီု ဟွံခိုဟ်ဏီပုဟ် ဝန်ဇၞော်ပရေၚ်ဂီုကၠီု ဒေသပယျဵု တွဵုရးမန် သ္ကိုပ်ဗိုလ်ဇၞော် ကျဝ်ဇွာမျေအ် ဟီုရ။
အပ္ဍဲကောံဓရီုစၠတ်ထဝ် တွဵုရးမန် အလန်တတိယ ကၠောန်ဗဒှ်လဝ် ပ္ဍဲဂိတုအဝ်ဂတ် ၁၁ တေံဂှ် ညးစၞးစၠတ်ထဝ်တွဵုရးမန် ပွိုၚ်ဍုၚ်ရေဝ် စၟတ်(၂) မေန်အံၚ်မျေအ် သၟာန်သၟုက်လဝ်တၚ်သၟာန် ဒဒှ်ရ သွက်သ္ဂောံကၠောန်ကဵု ပရေၚ်ကလေၚ်ဒက်ပတန် ကွာန်ၜါသွာၚ်ဂှ် အစဳဇန်နွံဟာဂှ် ညးကလေၚ်ခၠေဝ်သှ်ကဵုလဝ် မဒှ်ရ။
သ္ကိုပ်ဗိုလ်ဇၞော် ကျဝ်ဇွာမျေအ် ဟီုဂးလဝ်ဂှ်တှ်ေ ဂအုံကွာန်ၜါသွာၚ်ဂှ် နူကဵုဒပ်ပၞာန် ကလေၚ်ထိၚ်ဒဝ်မာန်ကၠုၚ်ကီုလေဝ်၊ ပ္ဍဲအကာဲအရာ ပရေၚ်ဂီုကၠီုမ္ဂး ၁၀၀ က္ဍိုပ်ကၠံ သွက်သ္ဂောံဖျေံစိုတ်ဂွံဂှ် ဟွံဒှ်ဏီပုဟ် သ္ဂးရ။
ပြဟ်ဟ်ဏံမ္ဂး ကွာန်ၜါသွာၚ်ဂှ် ဒှ်မံၚ်ကွာန်ဂကောံပၠန်ဂတးတံ ချဳဒရာၚ်အာကၠုၚ်မံၚ်သၟးဟွံက ဒှ်မံၚ်ကာလကၠောန်မံၚ် ပရေၚ်လဝေၚ်ပၞာန်တုဲ အတိုၚ်အကာဲအရာလၟုဟ်ဏံမ္ဂး ပရေၚ်ဂီုကၠီုဟွံခိုဟ်ဏီပုဟ် ဟီုလဝ်ရ။
ဟိုတ်ဂှ်ရ သွက်သ္ဂောံကလေၚ်ဒက်ပတန် ကွာန်ၜါသွာၚ်မာန်ဂှ် ကမၠောန်အဓိကဒးကၠောန်ကၠာဂှ်တှ်ေ ကလေၚ်သိုၚ်ခၞံ ဒဒန်ၜါသွာၚ်တုဲဒှ်မှလေဝ် ကမၠောန်သှ်ေမံၚ်တံဂှ် ဆက်တုဲကၠောန်အာမာန်ရောၚ် သ္ကိုပ်ဗိုလ်ဇၞော် ကျဝ်ဇွာမျေအ် ကလေၚ်သှ်လဴကဵုလဝ်ရ။
အပ္ဍဲသၞာံ ၂၀၂၃ တုဲကၠုၚ်တေံ စနူဂိတုနဝ်ဝၚ်ပါ ၁၀ စဵုကဵုစိုပ် ဂိတုဒဳဇြေမ်ပါ ၂၉၊ အကြာၜိုတ်ပွိုၚ် ၅၀ တ္ၚဲပြၚ်ၚ် ပေါဲဗတိုက်ၜါသွာၚ် က္တဵုဒှ်လဝ်ဂှ်ရ သ္ၚိဌာန်ညးဒေသ ၇၀၀ မပြၚ် ဒးဒုၚ်လီုလာ်အာတုဲ မၞိဟ် နကဵုလၟိဟ်လက်တံ ဒးဂြိပ်ပါဲဒဴလဝ် ဘဲပၞာန်အိုတ်ရ။
ကြဴနူပေါဲဗတိုက်ဒှ်တုဲ ကပေါတ်နွံကဵုၚုဟ်မးဗွဲမဂၠိုၚ် နူကဵုသ္ၚိ ညးဂြိပ်ဘဲပၞာန်တံဂှ် ရဲဒပ်ပၞာန်ကေုာံ ဒပ်ဗၠာဲသၟိၚ်တံ ကပှ်ယိုက်ကေတ်တုဲ သွံစလဝ် ကၠောန်လဝ်ပွဗီုတံဏံနွံရောၚ် ညးဒေသတံ ဟီုလဴရ။
လၟုဟ်ပေါဲဗတိုက်တံ ကလေၚ်ညိၚ်ဝပ်အာကီုလေဝ်၊ ပ္ဍဲကွာန်ၜါသွာၚ်ဂှ် မၞိဟ်ၜိုတ်ပိဂအုံ မွဲဂအုံဟေၚ် ကလေၚ်စိုပ်မံၚ်တုဲ၊ ဗွဲမဂၠိုၚ်ဂှ်တှ်ေ ပြံၚ်စိုပ်မံၚ်အာ လပါ်မတ်မလီု၊ ကျာ်မြဟ် ကေုာံ ပွိုၚ်ဍုၚ်မုဟ်ဍုၚ် ဒၞာဲသ္ၚိဌာန်မသကလောကောဒေံ ညးတံရောၚ် ဂွံတီရ။
အတိုၚ်ညးဒေသၜါသွာၚ်တံ ဟီုဂှ်တှ်ေ ဟိုတ်နူပေါဲဗတိုက်တုဲ ကွာန်ညးတံဂှ် ဒှ်မံၚ်ညံၚ်ရဴ ကွာန်ဇၞော်လီုလီုမွဲတုဲ၊ ညးဒေသဗွဲမဂၠိုၚ်ဂှ်လေဝ် ဟိုတ်နူကပေါတ်ပၞာန်သှ်ေဇးမံၚ်ကီု ဘဲမါၚ်တပ်တိတံတုဲ သွက်ဘဲအန္တရာဲလမျီုညးတံဂှ် ဒှ်မံၚ်ဒဝိၚ်အိုတ်ရ။
ပရိုၚ် – သြၚ်လောန်တိုၚ်မ်
Photo – MOI