မတ်မလီု- အဝ်ဂတ် ၁၂
သွက်ကိုန်အစဳဇန် သၞေဟ်ၜၚ်ကျာမတ်မလီုတၟိ နွံကဵုဍာ်ဒကေဝ်အဆံၚ်ဂၠးကဝ်ဂှ် သွက်ဂွံသီကေတ်တိ ၃၂၀၀ ဧကပြၚ်နွံရောၚ် ဌာနဝန်ဇၞော်ပရေၚ်ပလံၚ်ဗ္စိုပ် အလဵုအသဳပၞာန် လလောၚ်တြးလဝ်ရ။
အတိုၚ်လလောၚ်ပၟိင် ရးနိဂီုဍုၚ် ပတိတ်လဝ် နကဵုစၟတ်တ္ၚဲ ဂျူလာၚ် ၁၇ ဂှ်မ္ဂး သွက်ကိုန်အစဳဇန် သၞေဟ်ၜၚ်ကျာဏံဂှ် တိဗ္ၚ ၃၂၈၅ ဧက နူဂအုံကွာန် ၅ ဂအုံ အပ္ဍဲပွိုၚ်ဍုၚ်မုဟ်ဍုၚ်ဂှ် ဌာနဝန်ဇၞော်ပရေၚ်ပလံၚ်ဗ္စိုပ် နွံမံၚ်ပၟိက်ရောၚ် လလောၚ်တြးလဝ်ရ။
အတိုၚ်လၟိဟ်ဧက သွက်ဂွံသီကေတ်တံဂှ်မ္ဂး ဂအုံကွာန်ဝက်ဒါ ပွိုၚ်ဍုၚ်မုဟ်ဍုၚ် တိဧက ၃၂၄၀ ပြၚ်၊ ဂအုံကွာန်ကျာ်ရဲ ၁၆ ဒသမ ၄၈ ဧက၊ ဂအုံကွာန်တဵုဂူ ၇ ဒသမ ၇၇ ဧက၊ ဂအုံကွာန်ဝင်ဒုန် ၁၅ ဒသမ ၉၉ ဧက ကေုာံ ဂအုံကွာန်မယာန် ၀ ဒသမ ၂၉ ဧက၊ သီုဖအိုတ် တိဧက ၃၂၈၅ ဒသမ ၃၁ ဧက ပါလုပ်မံၚ်ရ။
နူကဵုဌာနဝန်ဇၞော်ပရေၚ်ပလံၚ်ဗ္စိုပ် အလဵုအသဳပၞာန်ပြံၚ်လဝ်ဗီုပြၚ်တံ သ္ဂောံသုၚ်စောဲတိတံဏံ သွက်ဖဵုဂုဏ်ညးဍုၚ်ကွာန်တံဂးတုဲ အတိုၚ်သၞောဝ်ဥပဒေပရေၚ်သီတိ သၞာံ ၁၈၉၄၊ ၝောံပိုဒ် ၄၊ ပိုဒ်ပါ် ၁ ဂှ်တုဲ ဒးသီကေတ်အာရောၚ် သ္ဂးလဝ်ရ။
သွက်သ္ဂောံကၠောန်အာအတိုၚ်လၟေၚ်ကမၠောန် ပရေၚ်သီကေတ်တိဂှ် စကာသၞောဝ်ဥပဒေပရေၚ်သီတိ သၞာံ ၁၈၉၄၊ ၝောံပိုဒ် ၃၊ ပိုဒ်ပါ် (ဂ) ဂှ်တုဲ ခါန်ကၞက်လဝ် သ္ကိုပ်အုပ်ဓုပ်ခရိုၚ်မတ်မလီု နဒဒှ်ညးတာလျိုၚ် ကဝ်လိက်တာ ရ။
တိတံဏံဂှ်တှ်ေ ပ္ဍဲကိုန်အစဳဇန်သၞေဟ်ၜၚ်ကျာမတ်မလီုတၟိ မနွံကဵုဍာ်ဒကေဝ်အဆံၚ်ဂၠးကဝ်ဂှ် သွက်ဂွံသုၚ်စောဲအာ ဒၞာဲရုၚ်ဇၞော်ကဵု ဒၞာဲဂၠံၚ်လုပ်သၞေဟ်ၜၚ်ကျာရောၚ် ဟီုလဝ်ရ။
သွက်ဒၞာဲတိ ဒးဒုၚ်သီကေတ်တံဏံဂှ် နူကဵုအလဵုအသဳပၞာန် သွက်သ္ဂောံကဵုအာ သြန်လေဲနွံဟာ/ဟွံမွဲဟာဂှ် မုမွဲသာ်မှ ဟီုဂး လလောၚ်တြးလဝ်ဂှ် ဟွံဂွံဆဵုဏီပုဟ်။
သွက်အရၚ်တိဒၞာဲ ဒးဒုၚ်သီတံဏံ အတိုၚ်ၚုဟ်မးကာလလၟုဟ် ညံၚ်သ္ဂောံကဵုအာသြန်လေဲတံဂှ် ညးဒေသတံတှ်ေ နွံမံၚ်ပၟိက်ကွေံကွေံရ။
သၞောဝ်ဥပဒေပရေၚ်သီတိ သၞာံ ၁၈၉၄ ဂှ် ဒှ်သၞောဝ်ဥပဒေ နူခေတ်အလဵုအသဳ ကိုလိုနဳအၚ်္ဂလိက်တံ အုပ်ဓုပ်မံၚ်ဍုၚ်ဗၟာတေံ ပတိတ်စွံလဝ်သၞောဝ်ဥပဒေမွဲ မဒှ်ရ။
ကြဴနူပရေၚ်သီအဝဵု ၂၀၂၁ တုဲ ဂကောံပၞာန်တံသွက်သ္ဂောံသိုၚ်ခၞံအာ သၞေဟ်ၜၚ်ကျာနွံကဵုအဆံၚ်ဂၠးကဝ် ကရပ်ဍုၚ်မုဟ်ဍုၚ်ဂှ် ၜိုန်ရပံက်လဝ်ကမ္မတဳနာနာတုဲ ကမၠောန်ဟွံဒှ်ကၠုၚ်ကီုလေဝ် ပ္ဍဲလက်ထက် ပြံၚ်လဝ်ဗီုပြၚ်ညးဍုၚ်ကွာန်ဏံမ္ဂး သွက်သ္ဂောံထမံက်အာရုပ်ရဴဂှ် ထပ်ဖန်ဇန်မံၚ် မွဲဝါပၠန် မဒှ်ရ။
ပရိုၚ် – သြၚ်လောန်တိုၚ်မ်
Photo – Social Media