မတ်မလီု၊ အဝ်ဂတ် ၁၄
အပ္ဍဲတွဵုရးမန် နူကဵုအလဵုအသဳပၞာန်တွဵုရးမန် စုတ်လဝ်စရၚ်လလောၚ်တြးဏာ Black List ၜါကာန်ပဏဳရဂှ် နူကဵုဌာနစၞောန်ပ္ညုၚ် ပရေၚ်ဓလိုက်တမ်ရိုဟ် ကေုာံကာန်ပဏဳဂမၠိုၚ် လလောၚ်တြးလဝ်ရ။
ကာန်ပဏဳ ဖျေံသ္ဇိုၚ်ပ္ဍဲလ္ဂုၚ် MYAT THAW MON Company Limited ကေုာံ S ONE Company Limited တံ ဒးဒုၚ်စုတ်လဝ် ပ္ဍဲစရၚ်ယၟုလီု Black List တံဏံရောၚ် ပ္ဍဲလိက်လလောၚ်တြးဂှ် ပါလုပ်မံၚ်ရ။
နူကဵုကောံဓရီုအလဵုအသဳပၞာန် တွဵုရးမန် ကၠောန်ဗဒှ်လဝ် ဂိတုဂျောန် ၁၉ လောန်ကၠုၚ်တေံ အတိုၚ်တၚ်သ္ဂုတ်သွာတ် ၂၀/၂၀၂၆ လၟေၚ် ၁၁ ဖျေံလဝ်ဂှ် ကာန်ပဏဳၜါဏံဂှ် ဒးစုတ်ပၠုပ်စရၚ် Black List ရောၚ် သ္ဂးလဝ်ရ။
စပ်ကဵု စုတ်ပၠုပ်လဝ်ကာန်ပဏဳၜါဏံ ပ္ဍဲစရၚ်ယၟုလီု Black List ဂှ် ဒၟာဟိုတ်နူပရူပရာဗီုလဵုတုဲ ဒးစုတ်လဝ်ရောဂှ်တှ်ေ ဟွံဂွံလလောၚ်တြးလဝ်ပုဟ်။
ကာန်ပဏဳ MYAT THAW MON Company Limited ကေုာံ S ONE Company Limited ဒးဒုၚ်စုတ်လဝ်စရၚ် Black List တံဝွံ ကမၠောန်ဆေၚ်စပ်ကဵု ပွမပကောံဍာ်အုဲအုဲ၊ ပွမတောမ်သ္အး ကေုာံ ပွမထောံကၠဟ်တံဂှ် ကၠောန်မံၚ်ရောၚ် အတိုၚ်တၚ်နၚ် နူဌာနစၞောန်ပ္ညုၚ် ပရေၚ်ဓလိုက်တမ်ရိုဟ်ကာန်ပဏဳဂမၠိုၚ်တံတုဲ ဂွံတီကေတ်ရ။
တုဲပၠန် ကာန်ပဏဳၜါဏံဂှ် ဒှ်ကာန်ပဏဳကၠောန်မံၚ်ပရေၚ်သိုၚ်ခၞံ စမြိုၚ်ဒၞာဲတံကီု၊ ကမၠောန်အေန်ဂျေန်နဳယာလ္တူဍုၚ် သီုကဵုကမၠောန် ရေၚ်တၠုၚ်ကဵုမံၚ် ပရေၚ်သိုၚ်ခၞံ၊ ပွမကၠောန်ပယျေဝ် ကျိုၚ်ကျဝ်ဗလး ဒၞာဲတိ၊ ပွမတဵုလွဳစ တၞံဆုပ္ကဴသဴမြမောဝ်တံရောၚ် ဂွံတီရ။
နူကဵုဌာနစၞောန်ပ္ညုၚ် ပရေၚ်ဓလိုက်တမ်ရိုဟ် ကာန်ပဏဳဂမၠိုၚ်တံဂှ်တှ်ေ ကာန်ပဏဳဒက်ပ္တန်စွံလဝ် ပရေၚ်သ္ပစၟတ်သမ္တီ သၞောတ်အန်လာၚ် (Online) တံဂှ် ဒးရှ်ေသှ်ေဗက်ကၠောန်အာ အတိုၚ်သၞောဝ်ချူခၞံလဝ် ပ္ဍဲဥပဒေကာန်ပဏဳဂမၠိုၚ် ဍုၚ်ဗၟာရောၚ် သ္ဂးလဝ်ရ။
တုဲပၠန် ဆေၚ်စပ်ကဵုကမၠောန်ဇကုတံကၠောန်မံၚ်ဂှ် အတိုၚ်ဂကောံအလဵုအသဳ၊ ဌာနအလဵုအသဳတံဖျေံလဝ်သၞောဝ် ဥပဒေတန်ကြန် ကေုာံ နဲကဲဥပဒေနာနာတံတုဲ ယဝ်ရဆဵုအာ ပရေၚ်ဟွံဒဂေတ်ဗက်တံမ္ဂးတှ်ေ၊ နူကဵု ဝဘ်သိုက် (Website) ဌာနစၞောန်ပ္ညုၚ်ပရေၚ်ဓလိုက်တမ်ရိုဟ်ကာန်ပဏဳဂမၠိုၚ်တံဂှ် ညံၚ်မှာဇန်ညးဍုၚ်ကွာန်တံဂွံတီ လလောၚ်တြးကဵုအာသမ္တီရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – MOI