အပ္ဍဲကဵုဂကောံကဵုကသပ် အထံက်အပၚ် ကမ္မတဳပရေၚ်ကေၚ်ကာစၠတ်ထဝ်နာနာ စၠတ်ထဝ်တွဵုရးမန်ဂှ် နဒဒှ်ကောန်ဂကောံမွဲတၠ ခါန်ကၞက်စုတ်လဝ် ခရိုနဳ ဥူမဵုကျဝ် တၠကမၠောန်ပရေၚ်ပိုန်ဒြပ် ၚိုဲမိုဝ် မတ်မလီုရ။
ပရေၚ်ခါန်ကၞက်စုတ်လဝ် ဥူမဵုကျဝ် ညးမပါလုပ်ပ္ဍဲဂကောံကဵုကသပ်ဏံဂှ်တှ်ေ အပ္ဍဲစၠတ်ထဝ်ညးဍုၚ်ကွာန်တံ ရုဲစှ်လဝ်ဂှ် ဒှ်ပရေၚ် တံၚ်ဟပၠုပ်စုတ်နၚ်တၠသြန် ခရိုနဳမွဲတၠ သွက်ဂွံလုပ်စိုပ်ကၠုၚ်ရောၚ် ဒးဟီုရ။
ပွမကော်ပၠုပ် ခရိုနဳမွဲတၠ လုပ်ကၠုၚ်ပ္ဍဲစၠတ်ထဝ်ဏံဂှ်တှ်ေ အဓိကတာလျိုၚ်နွံမံၚ် လတူ ဥက္ကဌစၠတ်ထဝ်တွဵုရးမန် ဥူတိတ်ထိုဲ နူကဵုဗော်ပျဳခိုၚ်ဖျိုဝ် ညးဇၞးလဝ်မာဲဂှ်ရ။
ပ္ဍဲစၠတ်ထဝ်တွဵုရးမန် အလန်ပထမလက်ထက်အလဵုအသဳ ဥူတိၚ်သိၚ်တေံလေဝ် ဆေၚ်စပ်ကဵုကိုန်အစဳဇန် ဇၞော်သၠဲဂၠံၚ်ဇိုၚ်ပြၚ်ၜဳ မတ်မလီုတုဲ သြန်ဒကေဝ် နကဵုကိုတ်လၟိဟ်လက်တံဂှ် ဟွံပၠုပ်လဝ်ကဵုအလဵုအသဳတုဲ နူကဵုစၠတ်ထဝ် ဒးကော်လဝ် ဥူမဵုကျဝ်ဏံ ဂၠိုၚ်ကဵုအလန်ကီုရောၚ်။
ပ္ဍဲကောံဓရီုလၟေၚ်ဍာံ တတိယဝါ ကၠောန်ဗဒှ် ဂိတုအဝ်ဂတ် ၁၂ တေံဂှ် ဂကောံကဵုကသပ်အထံက်အပၚ် ကမ္မတဳပရေၚ် ကေၚ်ကာစၠတ်ထဝ်နာနာ စၠတ်ထဝ်တွဵုရးမန်ဏံ ဥက္ကဌစၠတ်ထဝ် ဥူတိတ်ထိုဲ ဒက်ပ္တန်တုဲ ပအပ်ကဵုလဝ် တာလျိုၚ်ရောၚ်။
ဒက်ပ္တန်လဝ် ဂကောံကဵုကသပ်ဏံ နကဵုမၞိဟ် ၁၁ တၠတုဲ၊ နဒဒှ် ဥက္ကဌကမ္မတဳဂှ် သ္ကိုပ်ဝန်ဇၞော်တြေံ ဥူအံၚ်ကျဳတိၚ်၊ ညးအုပ်ကာဂှ် ခါန်ကၞက်စုတ်လဝ် ညးစၞးစၠတ်ထဝ်ပွိုၚ်ဍုၚ်ကျာ်မြဟ် စၟတ် ၁ ဥူအံၚ်ထောတ် တံရောၚ်။
ညးမပါလုပ် ဂကောံ ၉ တၠ သှ်ေမံၚ်တံဂှ်တှ်ေ ခရိုနဳ ဥူမဵုကျဝ် တၠကမၠောန်ပရေၚ်ပိုန်ဒြပ် ၚိုဲမိုဝ် ၊ ညးယၟုတုပ်ကဵု ဥူမဵုကျဝ် ဒှ်တၠကမၠောန်သိုၚ်ခၞံ မွဲတၠ၊ ဒုဥက္ကဌ ဂကောံဂဳတတွဵုရးမန် (ပၞာန်ဒေါအ်ဇူ) ဥူမံၚ်မံၚ်ဇြဝ်ထောန်၊ သၟာဥပဒေရုၚ်သၞောဝ်ဓရ် ကဆံၚ်သၠုၚ် ၂ တၠ ဥူမံၚ်ယှိုဲ ကေုာံ ဥူသာန်ကျဳတံ ပါလုပ်မံၚ်ရ။
တုဲပၠန် ညးဂွံဇၞူကမၠောန်အလဵုအသဳ ကဆံၚ်သ္ကိုပ်ဌာနတွဵုရးမန် ဥူခေန်အံၚ်တွေန်၊ ဥူဝေန်ဗိုဝ်၊ ဥူကျဳဝေ ကေုာံ ဥူတာန်ဌေတံ ပါလုပ်မံၚ်ကီုရ။
ဂကောံဏံဂှ်တှ်ေ ဆေၚ်စပ်ကဵုဥပဒေမူအပြောံ၊ တၚ်သၟာန်၊ တၚ်ပတိုန်ဂလာန်၊ လိက်ဒုၚ်စဳရေၚ်တံဂှ် ယဝ်ရ ဥက္ကဌစၠတ်ထဝ် ပအပ်ကဵုတာလျိုၚ်မ္ဂး သွက်ဂွံသ္ၚဳဂၠိပ်ပါ်ပါဲအာတုဲ တၚ်ထေက်ကဵုဒးပလေဝ်တံဂှ် စဵုကဵုကဆံၚ်ကဵုကသပ်မာန် ကဵုလဝ်အခေါၚ်အဝဵုနွံရ။
တုဲပၠန် ညးပါလုပ်ဂကောံတံဝွံ ပ္ဍဲကောံဓရီုကမ္မတဳပရေၚ်ကေၚ်ကာဆေၚ်စပ်တံဂှ် တိုန်စိုပ်ကဵုကသပ်မာန်၊ ပံၚ်တောဲကၠောန်မာန်၊ ကိစ္စသွာၚ်သၞောဝ်ဥပဒေ ကေုာံ ကိစ္စဆေၚ်စပ်ကဵု မှာဇန်ညးဍုၚ်ကွာန်တံဂှ်လေဝ် လုပ်ကဵုကသပ်မာန်ရောၚ်။
ပရေၚ်ဒက်ပ္တန်တိုန်ဂကောံဏံဂှ် ဒှ်ပွမဗလးဏာ ဂကောံခရိုနဳတံ ညံၚ်ဂွံလုပ်စိုပ်အာအပ္ဍဲၝောံသ္ၚိစၠတ်ထဝ်တုဲ အရာပရေၚ်ကိစ္စ ဟွံထေက်ကဵုဒးဒှ်မွဲရောၚ် သၟာပရေၚ်ဍုၚ်ကွာန်ဝှ်ကြံၚ်မွဲတၠ ပါ်ပါဲလဝ်ရ။
“ယဝ်ရ ဒးဟီုသောင်သောင်တှ်ေ ဒှ်ပရေၚ်တံၚ်ဟပၠုပ်နၚ်ခရိုနဳတံ ဂွံလုပ်ကၠုၚ် ပ္ဍဲစၠတ်ထဝ်ရ။ ဂကောံဏံဂှ်တှ်ေ ညံၚ်ရဴကဵုဒၞာဲမံၚ် ပ္ဍဲၝောံသ္ၚိ စၠတ်ထဝ်ကီုရ” သာ်ဝွံ ညးသ္ဂးရ။
ပြဟ်ဟ်ဏံ ပ္ဍဲစၠတ်ထဝ်တွဵုရးမန် အလဵုအသဳပၞာန်ပြံၚ်လဝ်ဗီုပြၚ်ဂှ်တှ်ေ ကမ္မတဳခၞံပတိတ်ဥပဒေ၊ ကမ္မတဳစၟဳစၟတ်တၚ်ဒုၚ်ဝန် ကေုာံ တၚ်ဂတိကဝတ် အလဵုအသဳ၊ ကမ္မတဳလိက်တေၚ်စပ်တံ ပါလုပ်တုဲ သီုဖအိုတ်ဒက်ပ္တန်လဝ် နကဵုကမ္မတဳ ၆ ဂကောံ မဒှ်ရ။
ဂကောံကဵုကသပ် အထံက်အပၚ် ကမ္မတဳပရေၚ်ကေၚ်ကာစၠတ်ထဝ်နာနာ ဒက်ပ္တန်လဝ်တၟိဏံဂှ်တှ်ေ ကဵုအာကသပ် ကုကမ္မတဳပရေၚ်ကေၚ်ကာစၠတ်ထဝ်နာနာ ဒက်ပ္တန်လဝ် သီုဖအိုတ်တံမာန်ရောၚ် သ္ဂးရ။
ကမ္မတဳပရေၚ်ကေၚ်ကာ စၠတ်ထဝ်တံဏံဂှ် အတိုၚ်ဍာ်ဒကေဝ်ဂၠးကဝ်မ္ဂး ဒှ်မံၚ်စၠတ်ထဝ်အဇာဍောတ်တ်တံတုဲ၊ ပ္ဍဲအရာ ပရေၚ်မၚ်မွဲထိၚ်ဒဝ် သွက်အခေါၚ်အဝဵုအလဵုအသဳတံမ္ဂး ကိစ္စဇၞော်ဗွဲမလောန်ရ။
လတူပရေၚ် ခရိုနဳတံပါလုပ်မံၚ် ပ္ဍဲဂကောံကဵုကသပ် ကမ္မတဳပရေၚ်ကေၚ်ကာစၠတ်ထဝ်ဏံတုဲ ပ္ဍဲအကြာညးစၞးစၠတ်ထဝ်တံ ပရေၚ်ပါ်ပါဲ နွံမံၚ်ရောၚ် နူဌာန်ပရိုၚ်သြၚ်လောန်တိုၚ်မ် ဂၠိုက်ဂၠာဲတုဲ ဂွံတီရ။
အတိုၚ်တၚ်နၚ် နူအလဵုအသဳပၞာန်ပြံၚ်လဝ်ဗီုပြၚ် တွဵုရးမန်တှ်ေ အပ္ဍဲကမၠောန်တေန်ဒါ နွံမံၚ် ၁၀၀ ဒၞာဲဂှ် တၠကမၠောန်ပရေၚ်ပိုန်ဒြပ် ၚိုဲမိုဝ် ကလိဂွံလဝ်အခေါၚ်ကၠောန် အောန်အိုတ် ၂၀ က္ဍိုပ်ကၠံနွံရ။
ပွမခါန်ကၞက်စုတ် ခရိုနဳ ဥူမဵုကျဝ် ပါလုပ်အပ္ဍဲဂကောံကဵုကသပ် စၠတ်ထဝ်ဏံဂှ်တှ်ေ လတူကမၠောန်တေန်ဒါ ကေုာံ ကိုန်အစဳဇန်ညးတံ ဂှ် စၠတ်ထဝ်ဂွံမၚ်မွဲထိၚ်ဒဝ်မာန်ဂှ် ဇြဟတ်ဍိုန်လျအောန်စှ်ေအာရောၚ် ကမ္မတဳသ္ၚဳဂၠိပ်ပါ်ပါဲ ပရေၚ်ကိုန်အစဳဇန်၊ ပရေၚ်ဘဏ္ဍာကေုာံ ပရေၚ်ပိုန်ဒြပ်ဥက္ကဌတြေံ ဥူအံၚ်ကျဝ်တူ ထံက်ထ္ၜးလဝ်ရ။
ခရိုနဳ ဥူမဵုကျဝ်ဝွံ ပ္ဍဲကိုန်အစဳဇန်ဍုၚ်တၟိ လှိုၚ်ရတနာမတ်မလီု ကၠောန်လဝ်မွဲစွံကဵု သ္ကိုပ်ဝန်ဇၞော်တြေံ ဥူအံၚ်ကျဳတိၚ်တေံဂှ်လေဝ် သြန်အကံက်ခေါန် ကိုတ်လၟိဟ်ကဵုလက်တံဂှ် ဟွံပၠုပ်လဝ်ကဵုအလဵုအသဳ ပံၚ်တောဲလဝ်ကဵု ရဲနွံအဝဵုတံတုဲ ကၠောန်စလဝ်နွံရ။
လတူခရိုနဳ ဥူမဵုကျဝ်ဂှ် သ္ကိုပ်ဝန်ဇၞော်တွဵုရးမန်လၟုဟ် ဥူအံၚ်ဝေန်တာန် ကေုာံ ဝန်ဇၞော်ပရေၚ်ဂီုကၠီုတံဂှ် စွံလဝ်ကဵုဒၞာဲခုၚ် ပ္ဍဲအခန်ကၞာကဆံၚ်တွဵုရးတံ တုပ်တဴညံၚ်ရဴဝန်ဇၞော်မွဲတၠကီုရောၚ် ဂွံဆဵုကေတ်ရ။
ညးဂွံလဝ်အခေါၚ်ကၠောန်စ အပ္ဍဲလက်ထက်အလဵုအသဳတၠအဝဵုအဆက်က် ဥူမဵုကျဝ်ဂှ်တှ်ေ ပရူညးလဵုမွဲ ဗီုလဵုပတုဲလဝ်ဖဵု သွက်တွဵုရး ကီု ပရေၚ်ပါ်ပါဲမၞိဟ်တံကီု ညးဟွံစွံဂရုပုဟ်ဂှ် ပ္ဍဲအေန်တာဗျူ သၟာန်သှ်လဝ်ဂှ်တှ်ေ ညးဟီုလဴမံၚ်လၟိုန်ရ။
ပရိုၚ် – သြၚ်လောန်တိုၚ်မ်
Photo – Social Media