နေပျဳဒဝ်၊ အဝ်ဂတ် ၁၄
နူကဵုဒပ်ပၞာန်သီအဝဵု ပြံၚ်လှာဲဒက်ပ္တန်လဝ် အလဵုအသဳပြံၚ်လဝ်ဗီုပြၚ် အပ္ဍဲကဵုကာလကၠာဟွံကၠောန် ပေါဲရုဲမာဲတေံကဵု ကာလလၟုဟ်ဏံမ္ဂး ပရေၚ်ပန်ဗတိုက်ပတဝ်လဝ်ကဵုညးဍုၚ်ကွာန်တံဂှ် ဆက်သၠုၚ်တိုန်မံၚ်ဖိုဟ်ရောၚ် ပ္ဍဲကဵုလိက်ဒုၚ်စဳရေၚ် နူပွဳဗွိုၚ်ဂၠးကဝ်ကဵုနူသ္ဇိုၚ်ဒေသတံ ထမံက်ထ္ၜးချူလဝ်အိုတ်ရ။
အခိၚ်ဒပ်ပၞာန်ဗမာကၠာဟွံဂွံသ္ကိုပ်သ္က ကၠောန်လဝ်ပေါဲရုဲမာဲဏီ ပရေၚ်ပန်ဗတိုက်နူကဵုဗလးကျာတံ သၠုၚ်တိုန်မံၚ်ထေၚ်ၚ်လဵုလဵုနွံတုဲ စဵုကဵုတ္ၚဲဏံလေဝ်ယအ်စှ်ေအာဟၟဲဏီရဂှ် နူကဵုယန္တရာကုလသမဂ္ဂ ပွမဂၠိုက်ဂၠာဲစၟဳစၟတ်သၠးပွး ဆေၚ်စပ်ကဵုပရေၚ်ဍုၚ်ဗမာ IIMM ချူပတိတ်လလောၚ်တြးလဝ် လိက်ဒုၚ်စဳရေၚ် ပ္ဍဲဂိတုအဝ်ဂတ် ၁၁ တေံရ။
သွက်သၞာံ ၂၀၂၆ ဏံ လိက်ဒုၚ်စဳရေၚ် လၟေၚ်သၞာံ IIMM ပတိုန်ထ္ၜးကဵု ကံၚ်သဳအခေါၚ်အရာမၞိဟ်ကုလသမဂ္ဂတုဲ ဒုၚ်လဝ်သ္ဇိုၚ်လတူတၚ်နၚ် ဂၠိုက်ဂၠာဲစၟဳစၟတ်ဂွံလဝ် စနူဂျူလာၚ် ၂၀၂၅ စဵုကဵု ဂျောန် ၂၀၂၆ မဒှ်ရ။
အပ္ဍဲပွိုၚ်ကာလလိက်ဒုၚ်စဳရေၚ်ဏံမ္ဂး ပရေၚ်ရီုဗၚ်ဓရ်ဗ္စာရဏာမၞိဟ်တံ ပဵုတုဲပရေံကၠုၚ်ဂှ်ကီု၊ အမှုရာဇာဝတ်ကြီုကြီုဓဇန်ဓဇန်တံဂှ် ညးဍုၚ်ကွာန်ဍုၚ်ဗၟာတံဆက်တုဲ ဒးဒုၚ်ဖံက်ပကဝ်မံၚ်ဖိုဟ်ရောၚ် IIMM ထံက်ထ္ၜးလဝ်ရ။
နူကဵုဗလးကျာဒပ်ပၞာန်ဗမာ ရန်တၟအ်နွံနွံပန်ဗတိုက်မံၚ် ညးဍုၚ်ကွာန်တံဂှ်ကီု၊ အကြာပရေၚ်လဝေၚ်ပၞာန်တံမ္ဂး ရပ်လဝ် ညးဍုၚ်ကွာန်တံတုဲ ပျဲပျာံဂစိုတ်ထောံလဝ်ကီု ပရေၚ်ပကီုပရာတ်လိၚ်တံလေဝ် ကၠောန်သ္ပလဝ်ကီုရောၚ် ပ္ဍဲလိက်ဒုၚ်စဳရေၚ်ဏံ ထမံက်ထ္ၜးလဝ်ရ။
အတိုၚ်သက်သဳတၚ်နၚ် IIMM ပကောံဂွံလဝ်မ္ဂး ဒပ်ပၞာန်ဗမာတံ သုၚ်စောဲလဝ်ၜၚ်ကျာဗတိုက်မံၚ် ဗီုဓမ္မတာသၟးဟွံက သီုကဵုစကာလဝ် ပါရာမဝ်တာ၊ ဂျိုၚ်ရဝ်ကဝ်ပတာ ကဵု ဒရုၚ်တံဂှ် စွံလဝ်အဓိကတုဲ စကာလဝ်အပ္ဍဲကဵုပရေၚ်ဝေၚ်ပၞာန်ဗလးကျာတံရ။
ၜၚ်ကျာဒးစကာသြန်အောန်န် အတိုၚ်ဓမ္မတာဟွံသေၚ်တံဂှ် ဒပ်ပၞာန်ဗမာသုၚ်စောဲတုဲ ပရေၚ်ဝေၚ်ပၞာန်ဗလးကျာ ဗီုပြၚ် ပဝ်သဝ်သဝ် စုတ်လဝ်မကမ်မဝ်တာ ဗုမ်ဟွံထိၚ်လဝ်ဒၞာဲပွန်တံတုဲ ပန်ဖျေံ နူလတူၜၚ်ကျာတံ ကၠောန်သ္ပကၠုၚ်လဝ် မဒှ်ရ။
နူကဵုဒပ်ပၞာန် သွက်သ္ဂောံကလေၚ်ထိၚ်အာ တိဍာ်ဒၞာဲဒးဒုၚ်ဆောံလေၚ်လဝ်တံကဵု သွက်သ္ဂောံသၠဲပတိုန်တိဍာ် သွက်ဂွံထပ်ကၠောန်အာပေါဲရုဲမာဲနွံတုဲ ပ္ဍဲဒၞာဲညးဍုၚ်ကွာန်တံနွံမံၚ်ဂှ် ဇၞော်ပတိုန်လဝ် အသိၚ်ဝေၚ်ပၞာန်ဗလးကျာတံရောၚ် ညးချဳဒရာၚ်အခေါၚ်အရာမၞိဟ်တံ ထံက်ထ္ၜးလဝ်ရ။
ဆေၚ်စပ်ကဵု ပရေၚ်ပန်ဗတိုက်လဝ်ဗလးကျာဗွဲမဂၠိုၚ် ပတဝ်စွံပွန်ကဵုဒၞာဲစမြိုၚ် ကမၠောန်ကတိုင်မါၚ်တံကီု၊ ဆေၚ်သွံဖျာတံကဵု ဒၞာဲပရေၚ်ပိုန်ဒြပ်တံဂှ်တှ်ေ ပွန်ဒၞာဲဆေၚ်စပ်ပရေၚ်ပၞာန်မွဲမွဲ နွံမံၚ်အကြာပွဳဗွိုၚ်တံဏံဂှ် ဟွံဂွံဆဵုညာတ်လဝ်ပုဟ် လိက်ဒုၚ်စဳရေၚ် IIMM ချူလဝ်ရ။
ဟိုတ်နူပရေၚ်ပန်ဗတိုက်လဝ် ဗီုတံဏံဂှ် စမြိုၚ်ဒၞာဲဒၟံၚ်ညးဍုၚ်ကွာန်တံဗွဲမဂၠိုၚ် ဒးလီုလာ်အာနွံတုဲ အပ္ဍဲကဵုလၟိဟ်မၞိဟ် ဒးချိုတ်အာလဝ် ဒးလဝ်ဝပ်တံမ္ဂး ညးဗြဴကဵုကောန်ၚာ်တံ ပါလုပ်ဂၠိုၚ်တိုန်မံၚ်ဂှ် ဂွံဆဵုကေတ် ပ္ဍဲလိက်ဒုၚ်စဳရေၚ်ဏံရ။
ပရေၚ်ပန်ဗတိုက်ဗလးကျာတံ ညံၚ်ဂွံဒေါအ်အာဂှ် ကၠောန်ဟွံမာန်တုဲ ညံၚ်ဂွံစောဲစုတ်ဒုဟ် လတူဂကောံကောန်ဍုၚ်အရၚ်တံ ညံၚ်ဂွံဒှ်အာဗီုပြၚ်ဏံဂှ် နူကဵုဒပ်ပၞာန်ဗမာ ရုဲစှ်ပွန်ဒၞာဲညးဍုၚ်ကွာန် တံတုဲ ပန်ဂစိုတ်မံၚ်ရောၚ် သ္ကိုပ်ဗိုလ် CDM ဇြေန်ယဝ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ပရေၚ်ပန်ဗတိုက်နူဗလးကျာတံ ညံၚ်ဂွံဒေါအ်အာချိုတ်တ်ပၠိုတ်တ် ပိုဲတံပဒေါအ်ဟွံမာန်ပုဟ်။ ဣဏံဂှ် ဒပ်ပၞာန်ကေတ် တင်ဇြဟတ်ဍေံတံခိုဟ်တုဲမှ ဂစိုတ်ညးဍုၚ်ကွာန်တုဲ ထပၠုပ်မံၚ်ဓဝ်ဖေက်တံရ။ တုဲမ္ဂး ညံၚ်သ္ဂောံဒှ်အာဗီုပြၚ် ဟိုတ်နူပၠန်ဂတးဏံတုဲ ပိုဲတံ (ညးဍုၚ်ကွာန်) ဒးဒုၚ်ဂစိုတ်လဝ်ရောၚ် ဂးတုဲ ညံၚ်သ္ဂောံစောဲစုတ်ဒုဟ် လတူဂကောံ ရပ်လွဟ်ကောန်ဍုၚ်အရၚ်တံတုဲ ရုဲစှ်ဂစိုတ်မံၚ်ညးဍုၚ်ကွာန်ဟေၚ် ပိုဲတံထေၚ်ကေတ်ရအဴ” သာ်ဝွံ သ္ဂးရ။
အတိုၚ် တၚ်ဂၠိုက်ဂၠာဲစၟဳစၟတ် IIMM မ္ဂး ဒပ်ပၞာန်ဗမာတံသုၚ်စောဲကၠုၚ် နဲကဲပန်ဗတိုက်ၜါဂဇံက်တုဲ ညးဍုၚ်ကွာန်တံချိုတ်၊ ဒးဝပ် ပဵုပရေံဂၠိုၚ်တိုန်ကၠုၚ်ရ။ နဲကဲဏံဂှ်တှ်ေ ကြဴနူပန်ဗတိုက်ကၠာတဲမွဲဝါတုဲ အပ္ဍဲအခိၚ်ဂၠေံဂၠေံဂှ်ဟေၚ် နူဗလးကျာထပ်ဂဇံက် ပန်ဗတိုက်မွဲဝါပၠန် မဒှ်ရ။
တုဲပၠန် အပ္ဍဲကာလလိက်ဒုၚ်စဳရေၚ်ဏံမ္ဂး ဒပ်ပၞာန်ဗမာတံ ပတဝ်စွံလဝ်ပွန်ကဵုဗဒိုပ်ထံၚ်အချုက် ဂကောံရပ်လွဟ်တၞဟ်တံတုဲ နူကဵုဗလးကျာပန်ဗတိုက်လဝ် ဒၞာဲဗွဲမဂၠိုၚ်နွံကီု ဗွဲတၟေၚ် ပ္ဍဲတွဵုရးရခေၚ်၊ ကရေၚ်ဍာဲကေုာံ ချေၚ် ပါဲနူဂှ် ပ္ဍဲရးမာန္တလေဝ်တံလေဝ် ပန်ဗတိုက်လဝ် နွံဂၠိုၚ်မံၚ်ရောၚ်။
မွဲလပါ်ပၠန် ပ္ဍဲကဵုဗဒိုပ်ပရေၚ်စၟဳစၟတ်တံကီု၊ ဗ္ဒိုပ်ဗၠာဲသၟိၚ်ကေုာံ ဌာန်ဂအုပ်ပၞာန်တံမ္ဂး လတူညးဒးဒုၚ်ရပ်လဝ်တံဂှ် ဒပ်ပၞာန်ဗမာ ဂကောံထံၚ်ပရိုၚ်၊ ဂကောံဒပ်ဗၠာဲသၟိၚ်တံ ဍဵုဍိုက်ပျဲပျာံလဝ် ခန္ဓကာယတံတုဲ ကၠောန်လဝ် ပရေၚ်ပကီုပရာတ်ပျဲပျာံလိၚ်တံ နွံမံၚ်ရောၚ် လိက်ဒုၚ်စဳရေၚ် IIMM ထမံက်ထ္ၜးလဝ်ရ။
စပ်ကဵုပရေၚ်ဒပ်ပၞာန် ဖံက်ပကဝ်ကၠောန်လဝ်ပွဗီုဗီုဏံဂှ်တုဲ ဂွံလဝ်တင်နၚ်သက်သဳ နူညးဒးဒုၚ်ဘဲဂိလဝ် ၇၅၀ ပြၚ်နွံရောၚ် IIMM ဟီုလဴလဝ်ကီုလေဝ် ပရေၚ်လီုလာ်တံ မဂၞန်စရၚ် မၞိဟ်ချိုတ်လဝ်တံဂှ်တှ်ေ ဟွံဂွံစုတ်လဝ် ပ္ဍဲလိက်ဒုၚ်စဳရေၚ်ဏံပုဟ်။
မွဲလပါ်ပၠန် နူကာလပေါဲရုဲမာဲလောန် နူဒပ်ပၞာန်သီအဝဵု ဒက်ပ္တန်လဝ်အလဵုအသဳပြံၚ်လဝ်ဗီုပြၚ်တုဲလေဝ် ဗွဲကြဴဏံ လတူညးဍုၚ်ကွာန်ဂမၠိုၚ်တံဂှ် စွံပွန်တုဲ ဆက်ပန်ဗတိုက်ဖံက်ပကဝ်မံၚ်ပရေၚ်မၞိဟ် နာနာသာ်တံ နွံမံၚ်ဖိုဟ်ရ။
ပြဟ်ဟ်ဏံ နကဵုဒပ်ပၞာန် ၜိုန်ရပြံၚ်လှာဲလဝ် ဗီုပြၚ်ပရေၚ်အုပ်ဓုပ် ညံၚ်ကဵုအလဵုအသဳမွဲကီုလေဝ် လတူအမှုရာဇာဝတ် လောန်ၜက်လဝ် တံဂှ် ပရေၚ်ဒးဒုၚ်တာလျိုၚ်တံ ကၠေအ်အာဟွံသေၚ်ပုဟ် ဒါရိုက်တာပရိုဂရမ် ဖံၚ်ဒေယှေန်အခေါၚ်အရာမၞိဟ် ညးဍုၚ်မန် နာဲအဲမန် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဒၞာဲမၞိဟ်မံၚ်ဂၠိုၚ်တီုတီုကၠီုကၠီုတံဂှ် သုၚ်စောဲမံၚ်လွဟ်ခတိုဟ်ဇၞော်ဇၞော် အလန်ထပ်ကဵုထပ်တုဲ အကြာညးဍုၚ်ကွာန် ကဵု ပွန်ဒၞာဲပရေၚ်ပၞာန်ဂှ် ဍေံတံပါ်စွံလဝ်ဟွံမွဲပုဟ်။ သွက်သ္ဂောံယှအ်ဖျေံ ညးဍုၚ်ကွာန်တံဒးဘဲဂှ် ပရေၚ်ဒစးဒုၚ်စဵုဒၞာကၠာတဲ ဍေံတံ ဟွံကၠောန်ပုဟ်။ ပရေၚ်တံဏံဂှ်တှ်ေ ဒှ်အမှုရာဇာဝတ်ပၞာန် ဟွံသေၚ်မ္ဂး အမှုရာဇာဝတ်လောန်ၜက်လဝ် လတူဂကူမၞိဟ်တံ ဒးစၟတ်အာဏောၚ်။ လၟုဟ်လေဝ် ဒးစၟတ်လဝ်ရ၊ အနာဂတ်တေံလေဝ် ဒးစၟတ်အာရဏောၚ်။ လတူပရေၚ်တံဏံဂှ် ဂကောံပၞာန်ဏံ ဒးကေတ်တာလျိုၚ်ဖအိုတ်ဏောၚ်” သာ်ဝွံ သ္ဂးရ။
အတိုၚ်တၚ်နၚ် ဖံၚ်ဒေယှေန်အခေါၚ်အရာမၞိဟ် ညးဍုၚ်မန်မ္ဂး အပ္ဍဲသၞာံဏံ စနူဂျာန်နဝါရဳ စဵုကဵုဂျောန်ဂှ် ပ္ဍဲဒေသမန်၊ ကရေၚ် ကေုာံ တၞၚ်သဳတံ ဟိုတ်နူပရေၚ်ပန်ဗတိုက်လွဟ်ဇၞော်ကေုာံနူဗလးကျာတံတုဲ ညးဗြဴ ၂၄ တၠ ကဵု ကောန်ၚာ် ၈ တၠ ဒးချိုတ်အာ လဝ်ရ။
ပ္ဍဲဒေသလပါ်သၠုၚ်ကျာတံဂှ် အပ္ဍဲပွိုၚ် ၆ ဂိတုပထမကၠာဏံ ပ္ဍဲကွာန်မၞိဟ်မံၚ်ဒၟံၚ်တံဂှ် ဒပ်ပၞာန်ပန်လဝ်လွဟ်ဇၞော် ၄၃ ဝါ၊ ပန်လဝ်နူဗလးကျာ ၁၉ ဝါနွံတုဲ ညးဒးဝပ် ၈၄ တၠ နွံလဝ်ရောၚ်။
စနူသီအဝဵု ၂၀၂၁ တေံ စဵုကဵုစိုပ် ၂၀၂၆ ဏံမ္ဂး ဟိုတ်နူပရေၚ်ဒပ်ပၞာန်ဗမာ ပန်ဗတိုက်လဝ်တုဲ ပ္ဍဲဒေသလပါ်သၠုၚ်ကျာဂှ် ညးဗြဴ ၂၇၀ ပြၚ်၊ ကောန်ၚာ် ၉၉ တၠတံ ချိုတ်အာတုဲ၊ ညးဒးဝပ် နွံမံၚ် ၈၅၀ ပြၚ်ရဂှ် ဂွံတီကေတ် နူဖံၚ်ဒေယှေန်အခေါၚ်အရာမၞိဟ် ညးဍုၚ်မန်ရ။
ဟိုတ်ဒှ်သာ်ဂှ်ရ ကမၠောန်ဒပ်ပၞာန်ကၠောန်လဝ်တံမ္ဂး လတူပရေၚ် ညးဍုၚ်ကွာန်တံဒးဘဲဂှ် ဒှ်ပရေၚ်ဟွံထေၚ်ခယျရောၚ် ဗၜေက်လဝ်မတ်ဟွံဂွံတုဲ ဒှ်မံၚ်ပရေၚ်ပွန် ပန်ဗတိုက်လဝ်တဝ်ဝ် ညံၚ်ညးဍုၚ်ကွာန်တံ ဂွံချိုတ်အာရောၚ် နာဲအဲမန် စွံလဝ် တၚ်စၟတ်သမ္တီနွံရ။
ပရိုၚ် – သြၚ်လောန်တိုၚ်မ်
Photo – Social Media