ဘာအၚ်-အဝ်ဂတ်(၁၅)
အပ္ဍဲတွဵုရးကရေၚ် အရာပ်လတူဍုၚ်ဘာအၚ်တံဂှ် ဟိုတ်နူ ဍာ်ၜဳသြၚ်လောန် ဆက်သၠုၚ်တိုန် ဍာ်ဇၞော်မံၚ်တုဲ မၞိဟ်ၜိုတ် ၂၀၀၀ ပြၚ် ဒးမံၚ်စံၚ်မံၚ် ပ္ဍဲဗဒိုပ်ဟံၚ်ပြာ်တံဂှ် ဂွံတီကေတ် နူကောန်ဂကောံရီုဗၚ် မှာဇန်လတူဍုၚ်တံရ။
ပ္ဍဲဂိတုအဝ်ဂတ် ၁၀ အခိၚ်ဂယးတေံ ပ္ဍဲဍုၚ်ဘာအၚ် ဍာ်ၜဳသြၚ်လောန် တိုန်ၜက်အာနူဗ္ၜတ်ဍာ်ဂွိၚ် ၇၅၀ သေန်တဳမဳတာနွံတုဲ ကြဴနူဂှ် ပ္ဍဲဂိတုအဝ်ဂတ် ၁၄ ဂှ်လေဝ် စိုပ်အာ ၈၄၁ သေန်တဳမဳတာကီု ဒၞာဲအရာပ်တိသဝ်သဝ်တံ ဍာ်လုပ်ကၠုၚ်ပဵုဂၠိုၚ်တိုန်တုဲ ညးဍုၚ်ကွာန် ရဲမံၚ်စံၚ်သ္ၚိဌာန်ဟွံဂွံတံဂှ် ဒးပြံၚ်ဆုဲအာ လပါ်ဗဒိုပ်ဟံၚ်ပြာ်တံရောၚ် သ္ဂးရ။
ဟိုတ်နူဍာ်ဆက်သၠုၚ်တိုန်မံၚ်တုဲ ညးပြံၚ်ဆုဲဂၠိုၚ်တိုန်ကၠုၚ်ကီု၊ ပြဟ်ဟ်ဏံ ပ္ဍဲဗဒိုပ်ဟံၚ်ပြာ် ၄ မဂှ် မၞိဟ်နွံမံၚ်ၜိုတ် ၂၀၀၀ ယျ ညးဂကောံရီုဗၚ်မှာဇန်လတူဍုၚ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ဟိုတ်နူဘဲဍာ်ဇၞော်တုဲ သွက်ညးပြံၚ်ဆုဲကၠုၚ်လဝ်တံဂှ် ခံက်သဲဒကှ်၊ ခၟာဲစာၚ်၊ စၞစသုၚ်နာနာကဵု ဍာ်သုၚ်တံဂှ် နူကဵုဂကောံအလဵုအသဳပၞာန် တွဵုရးကရေၚ်တံ ဖန်ဇန်ကဵုလဝ်ကီုလေဝ် ဟွံရုံဂပ်ပုဟ် သ္ဂးရ။
ဟိုတ်ဒှ်သာ်ဂှ်ရ ပုၚ်ဂွဳကဵုဍာ်ပလးတံဂှ် ရဲလတူဍုၚ်တံကီု ဂကောံရီုဗၚ် မှာဇန်တံကီု ၜိုတ်သ္ပမာန် ဗိုၚ်ကဵုဒါန် ရီုဗၚ်မံၚ်အိုတ်ရောၚ် ဂွံတီရ။
ဟိုတ်နူဍာ်ၜဳသၠုၚ်တိုန်တုဲ ပ္ဍဲအရာပ်စၟတ် ၁၊ စၟတ် ၂၊ စၟတ် ၃ ဒၞာဲတိသဝ်သဝ်တံဍာ်လုပ်မံၚ်တုဲ သ္ၚိလ္ၚဵုတံဂှ်ဍာ်လုပ်စိုပ်အာ ထပ်သၟဝ်သ္ၚိတံယျရောၚ် သ္ဂးရ။
ယဝ်ရဍာ်ၜဳ ဆက်သၠုၚ်တိုန်တုဲ ညးဍုၚ်ကွာန်တံဒးပြံၚ်ဆုဲအာမ္ဂး ညံၚ်သ္ဂောံဂွံဒၞာဲညးတံမံၚ်စံၚ်ဂှ် အတိုၚ်အလဵုအသဳပၞာန် တွဵုရးကဵုလဝ်စၞောန်ပ္ညုၚ်တုဲ ပ္ဍဲအရာပ်လတူဍုၚ်တံဂှ် ဗဒိုပ်ဟံၚ်ပြာ် ၁၆ မ၊ ပ္ဍဲဂအုံကွာန်တံ ဗဒိုပ်ဟံၚ်ပြာ် ၁၁ မ သီုဖအိုတ် ဗဒိုပ်ဟံၚ်ပြာ် ညးဒဒိုက်ဘဲဍာ်ဇၞော် ယာယဳ ၂၇ မ သွက်ဂွံပံက်မာန် စဳဇန်ပလေဝ်လဝ် နွံရောၚ် ဂွံတီရ။
အပ္ဍဲဂိတုအဝ်ဂတ် ၁၄ တေံ အတိုၚ်လလောၚ်တြး ဌာနပရေၚ်ဗြဲကျာ အလဵုအသဳပၞာန်တံမ္ဂး ဍာ်ၜဳသြၚ်လောန်ဝွံ ဆက်နွံအာမံၚ် လတူဗ္ၜတ်ဍာ်ဒွိၚ်ဍုၚ်ဏီတုဲ၊ အပ္ဍဲပွိုၚ် ၂၄ နာဍဳဂတဏံ ဍာ်ယအ်စှ်ေအာ ညိညမာန်ကီုလေဝ် ဆက်နွံမံၚ် လတူဗ္ၜတ်ဍာ်ဒွိၚ် ဍုၚ်ဏီရောၚ် ဂွံတီရ။
ပရိုၚ် – သြၚ်လောန်တိုၚ်မ်
Photo – CJ