ဘာအၚ်၊ အဝ်ဂတ် ၁၇
အပ္ဍဲတွဵုရးကရေၚ် ဇၟာပ်ဍုၚ် သွက်ဂွံဗဂပ်စုတ် ကေန်မရာ CCTV တံဂှ် နူကဵုဂကောံအလဵုအသဳတွဵုရး ညံၚ်သ္ဂောံထမံက်ရုပ်ရဴကၠောန်ကဵုညိ စပ်ကဵုတၚ်ပတိုန်ဂလာန်ဏံတုဲ ပ္ဍဲစၠတ်ထဝ်တွဵုရးကရေၚ် ညးဒစဵုဒစးဟၟဲ သ္ပလဝ်ဒတန်ရ။
တၚ်ပတိုန်လဝ်ဂလာန်ဏံဝွံ ပ္ဍဲကောံဓရီုစၠတ်ထဝ် တွဵုရးကရေၚ် အလန်တတိယ ကၠောန်လဝ် ပ္ဍဲအဝ်ဂတ် ၁၁ တေံဂှ် ညးစၞးစၠတ်ထဝ် တွဵုရး ပွိုၚ်ဍုၚ်လှာဒကှ် စၟတ် (၁) ဥူညဳညဳလှိုၚ် ပတိုန်ထ္ၜးလဝ် မဒှ်ရ။
အပ္ဍဲကဵုတွဵုရးကရေၚ်ဂှ် ညံၚ်ပရေၚ်သၞောဝ်ဓဝ်ဥပဒေ ဂွံအုပ်ဓလီုအာမာန်ကေုာံ ပရေၚ်ဂီုကၠီုမှာဇန်ညးဍုၚ်ကွာန်တံ ပဵုတုဲဂွံခိုဟ်တိုန်အာ အပ္ဍဲကဵုဇၟာပ်ပ်ဍုၚ်တံမ္ဂး ဒၞာဲဂၠံၚ်ဍာန်အဓိကတံကီု၊ ဒၞာဲမၞိဟ်အာကၠုၚ်ဂၠိုၚ်ၚ်၊ ဖျာဇၞော်၊ ဒၞာဲမှာဇန်ညးဍုၚ်ကွာန် စကာသုၚ်စောဲဂၠိုၚ်တံကဵု ဒၞာဲကိစ္စဇၞော်ဇၞော်နွံမံၚ်တံဂှ် သွက်သ္ဂောံဗဂပ်စုတ် ကေန်မရာ CCTV တံရောၚ် ညးစၞးစၠတ်ထဝ်ဂှ် ပတိုန်လဝ်ဂလာန် မဒှ်ရ။
တုဲပၠန် သွက်သ္ဂောံဗဂပ်စုတ်သုၚ်စောဲ ကေန်မရာ CCTV တံဂှ် ပံၚ်တောဲကၠောန်အာကဵု တၠကမၠောန်ဆေၚ်စပ်၊ သၟာပရေၚ်ပိုန်ဒြပ် ညးစေတနာသဒ္ဓါနွံတံတုဲ ညံၚ်သ္ဂောံထမံက်အာရုပ်ရဴကမၠောန်ညိဂှ် ဥူညဳညဳလှိုၚ် ဗ္တိုက်ဖ္အောဝ်လဝ်ရ။
တၚ်ပတိုန်ဂလာန်ဏံဂှ် ပ္ဍဲကောံဓရီုစၠတ်ထဝ်တွဵုရးကရေၚ် ကၠောန်ဗဒှ်လဝ် ဂိတုအဝ်ဂတ် ၁၄ တေံဂှ် သီုကဵုညးစၞးဒပ်ပၞာန်ကီု ညးစၞး ၂ တၠ ထံက်ဂလာန်သဳကၠဳတုဲ ပ္ဍဲစၠတ်ထဝ်ညးဒစဵုဒစးဟၟဲ သ္ပလဝ်ဒတန်ရောၚ်။
ဥူညဳညဳလှိုၚ် ညးစၞးစၠတ်ထဝ်ပတိုန်လဝ်ဂလာန် သွက်သ္ဂောံ ဗဂပ်စုတ်ကေန်မရာ CCTV မာန်ဟီုဂှ် ဒှ်ညးစၞး ကၠုၚ်နူဗော်ပျဳခိုၚ်ဖျိုဝ် ဗိုလ်ဇၞော်ဒပ်ပၞာန်တြေံကီု က္ဍိုပ်သ္ကိုပ်ဒပ်မၚ်ကွာန်တြေံမွဲတၠလေဝ် ဒှ်မံၚ်ကီုရ။
ညးဒေသ တွဵုရးကရေၚ်မွဲတၠဂှ်တှ်ေ “ဟိုတ်နူဂွိၚ်ဘဲ အမှုဒုဟ်စရိုတ်တံတုဲ ထေက်ကဵုဒးဗဂပ်စုတ်ရ။ ဆဂး ရဲမံၚ်လတူဍုၚ်တံဂှ်တှ်ေ အခေါၚ်ဗၠးၜးဟွံမွဲ ဒှ်အာရ။ ဥပမာ ဒၞာဲလဵုအာအာ ကၠောန်ကမၠောန်မွဲမွဲတှ်ေ မတ်မွဲစောမ်ဂှ် မၚ်ရံၚ်မံၚ်ဒၟံၚ်လၟိုန်ဂှ်တှ်ေ ညိလေဝ်ဟွံဗၠးၜးပုဟ်။ ပ္ဍဲဍုၚ်သေံလေဝ် အပ္ဍဲဇၟာပ်ကွာန်ညးတံ ဇၟာပ်ဒၞာဲ CCTV နွံဖအိုတ်ရ။ ဣဏံဂှ် ဆကွာန်ဏီ” သာ်ဝွံ သ္ဂးရ။
တုဲပၠန် အပ္ဍဲတွဵုရးကရေၚ် သွက်သ္ဂောံမၚ်ရံၚ်အာ ဂကောံဇြဟတ်ပၠန်ဂတးတံကီု ဂကောံရပ်လွဟ် ချဳဒရာၚ်အာကၠုၚ် မံၚ်ဂှ်တုဲ ပရေၚ်ဗဂပ်စုတ်ကေန်မရာ CCTV ဏံ သၠုၚ်အသိၚ်တုဲ ကၠောန်အာမာန်မ္ဂး ပ္ဍဲအရာပရေၚ်အာကၠုၚ်တံဂှ် ထေက်ကဵုဒးစွံသတိ ဇၞော်ဇၞော်ရောၚ် ညးဒေသမွဲတၠ ကဵုလဝ်တင်စၟတ်သမ္တီကီုရ။
အပ္ဍဲတွဵုရးကရေၚ် ဍုၚ်ဇၞော်မဟာ ဍုၚ်ဘာအၚ် ကေုာံ ဍုၚ်ပယျဵုဗြဝတဳတံဂှ် ပ္ဍဲဒၞာဲဂတမုက်ဂၠံၚ်ပန်သွာၚ်တံကဵု ဒၞာဲကိစ္စဇၞော်ဇၞော်တံမ္ဂး သွက်ပရေၚ်ဂီုကၠီုဂးတုဲ နူကဵုဒပ်ပၞာန်တံ ဗဂပ်စုတ်လဝ် ကေန်မရာ CCTV တံနွံတုဲ မၚ်ဗက်ရံၚ်လ္ၚတ်မံၚ် ကီုရောၚ်။
ပရိုၚ် – သြၚ်လောန်တိုၚ်မ်
Photo – Social Media