တယိတ်ချံၚ်၊ အဝ်ဂတ် ၁၇
အပ္ဍဲကဵုရးတၞၚ်သဳ ကွာန်တယိတ်ချံၚ် ဒပ်ပၞာန်သီအဝဵုထပက်ကၠုၚ်ကရောၚ်ပၞာန် နကဵုဇြဟတ်ဗွဲမဂၠိုၚ်တုဲ ညးဒေသ ၃၀၀၀ ပြၚ် ဒးဂြိပ်ပါဲမံၚ်ဘဲပၞာန်ရဂှ် ရိုဟ်ကၞက်ပရိုၚ်ဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကရောၚ်ပၞာန်ဇြဟတ် ၇၀၀ ပြၚ်တံဂှ် စနူဂိတုအဝ်ဂတ် ၁၂ တေံတုဲ နူကွာန်ကေန်ယှေအ် ပွိုၚ်ဍုၚ်တယိတ်ချံၚ်ဂှ် တတ်ကၠောံအာကွာန်ကျာအေၚ်၊ ကွာန်ကျက်သာပျေၚ်၊ ကွာန်မိုဝ်ယှိုဲကုၚ်၊ ကွာန်သဝ်ဖျာ၊ ကွာန်သေဖျာတ်ကုၚ်၊ ကွာန်ကျံက်လှေကာ ကေုာံ ကွာန်ယံၚ်မဝ်တံ မွဲကွာန်တုဲမွဲကွာန် ထပက်မံၚ်ကရောၚ်ပၞာန်ရောၚ်။
ဟိုတ်နူပရေၚ်ဒပ်ပၞာန်သီအဝဵု ထပက်ကရောၚ်ပၞာန်ဂှ်တုဲ ညးဒေသ ၃၀၀၀ ပြၚ် နူကဵု ၁၀ ကွာန်ပြၚ်တံ ဒးဂြိပ်ပါဲဆုဲပြံၚ်အာဒၞာဲဗၠးဘဲ အကြာဗြဲအကြာကျာ ဝါတ်ဂါတ်ခက်ခုဲမံၚ်ကွေံကွေံရောၚ် သ္ဂးရ။
မွဲဒမြိပ်လ္တူဂၠံၚ် ကရောၚ်ပၞာန် ဆဵုညာတ်အာ မၞိဟ်တြုံ ၁၀ တၠပြၚ် တံလေဝ် ရပ်ဏာသ္ပလဝ်ဂဒံၚ်မၞိဟ်တုဲ စဵုကဵုလၟုဟ်ဏံ ဟွံဂွံဗလးကဵုဏီပုဟ် ဂွံတီကေတ်ရ။
စဵုကဵုအဝ်ဂတ် ၁၅ တေံဂှ် ကရောၚ်ပၞာန်တံဏံ ကလေၚ်ဆုတ်စဴအာဟၟဲဏီတုဲ ဆက်ဖျေံလဝ်ဒပ် အပ္ဍဲကွာန်တံဏံတုဲ အကာဲအရာပၞာန်ၜါလပါ် ကြံၚ်မံၚ်ရောၚ်ဂှ် ရဲဂကောံဇြဟတ်ပၠန်ဂတးတံ ဟီုလဴတုဲ ဂွံတီရ။
အတိုၚ်လိက်ဒုၚ်စဳရေၚ် ဂကောံသုတေသနအပ္ဍဲဒေသ FE 5 Thanintahryi မ္ဂး ပ္ဍဲရးတၞၚ်သဳဂှ် ကရောၚ်ပၞာန်ဒပ်ပၞာန်သီအဝဵုတံ ရပ်စကာလဝ်ညးဒေသတံတုဲ သ္ပလဝ်ဂဒံၚ်မၞိဟ်တံဂှ် ကၠောန်ကၠုၚ် ပဵုဂၠိုၚ်တိုန်ရ။
အပ္ဍဲရးတၞၚ်သဳ ဟိုတ်နူပရေၚ်ထပက်ကရောၚ်ပၞာန်ကီု ပရေၚ်ပန်ဗတိုက်မံၚ် နူဗလးကျာတံဂှ်တုဲ ညးဒးထောံလဝ်ဌာန်ဒၞာဲ ဒးဂြိပ်ပါဲမံၚ် သီုဖအိုတ် ၈၅၀၀၀ ပြၚ် နွံမံၚ်တုဲ လၟုဟ်ကရောၚ်ပၞာန် ထပ်ထပက်ပၠန်မ္ဂး လၟိဟ်ထပ်ဂၠိုၚ်တိုန်အာမာန်ရောၚ်။
ပရိုၚ် – သြၚ်လောန်တိုၚ်မ်
Photo – CJ