နေပျဳဒဝ် ၊ အဝ်ဂတ် ၁၆
ပၠန်ဂတးညးဍုၚ်ကွာန်လၟုဟ်ဂှ် စိုပ်ကၠုၚ်ကာလ ဒးကဵုသ္ဂုတ်သွာတ်ကိစ္စဇၞော်အိုတ်တုဲ နကဵုဇြဟတ်ပံၚ်ကောံ ညးဍုၚ်ကွာန်အလုံဖအိုတ်တံဟေၚ် ပေါဲအံၚ်ဇၞးဂှ် ပါဲဟွံဗၠးကလိဂွံမာန်ရောၚ် နူကဵုဌာနဝန်ဇၞော်ပရေၚ်စဵုဒၞာ အလဵုအသဳညဳသၟဟ်ဂကူ NUG ပ္ဍဲဂိတုအဝ်ဂတ် ၁၄ တေံ လလောၚ်တြးကဵုလဝ်သမ္တီရ။
ဟိုတ်ဒှ်သာ်ဂှ်ရ ပ္ဍဲကဵုအစဳဇန် ဒပ်ထံက်ပလံၚ်ပၠန်ဂတးညးဍုၚ်ကွာန် PRF လၟေၚ်ကမၠောန်ပရေၚ်ဂၠာဲသြန်ဘဏ္ဍာ NUG တံဂှ် အတိုၚ်ဇကုၜိုတ်သ္ပမာန် ညးဍုၚ်ကွာန်တံ ညံၚ်သ္ဂောံပံၚ်တောဲပါလုပ် ကဵုအာဇြဟတ်ပေၚ်ၚ်ညိဂှ် ဗ္တိုက်ဖ္အောဝ်လဝ်ရ။
အတိုၚ်အလဵုအသဳညဳသၟဟ်ဂကူ NUG သ္ကိုပ်သ္ကပၠတရဴလဝ် ဒပ်စဵုဒၞာ ညးဍုၚ်ကွာန် PDF ဂှ် ပြဟ်ဟ်ဏံ ဒက်ပ္တန်လဝ် ကံၚ်သဳပၠတရဴ ဖိတ်ဒရေဝ် SCEF တုဲ သ္ကိုပ်သ္ကပါလုပ်မံၚ် ကရောံမဟာမိတ်ဂကောံရပ်လွဟ်ပၠန်ဂတး ကောန်ဍုၚ်အရၚ်တံ မွဲစွံမဒှ်ရ။
အပ္ဍဲဂိတုအဝ်ဂတ် ၇ တေံ ဂကောံပၠတရဴ မူဝါဒမဟာဗျူဟာပၞာန် SCEF ကဵု ကမ္မတဳပ္ညဳပ္ညပ်ကောပ်ကာဲ မဟာဗျူဟာပၞာန်တံ ကၠောန်ကောံဓရီုပံၚ်တောဲ နူအန်လာၚ်တုဲ ရုဲစှ်လဝ် ဒုဥက္ကဌပံၚ်တောဲ ၂ တၠ၊ ညးအုပ်ကာ ၁ တၠ ကေုာံ ဖက်ဆောညးအုပ်ကာ ၁ တၠတံရဂှ် ကဵုလဝ်သမ္တီရ။
သ္ကိုပ်က္ဍိုက်ပ်ပၞာန် ဒပ်ပၞာန်ဗၠးၜးကချေၚ် KIA ကေုာံ သ္ကိုပ်က္ဍိုက်ပ်ပၞာန် ဗော်သွးကောန်ဂကူကရေၚ် KNU တံဂှ် ဒှ်ဥက္ကဌ ပံၚ်တောဲကမ္မတဳပ္ညဳပ္ညပ်ကောပ်ကာဲပၞာန် မဟာဗျူဟာတုဲ၊ ညးအုပ်ကာဂှ်တှ်ေ ဝန်ဇၞော်ပရေၚ်စဵုဒၞာ NUG ဥူယဳမန် ကေတ်လဝ်တာလျိုၚ်ရောၚ်။
အတိုၚ်အကာဲအရာလၟုဟ်မ္ဂး သွက်ဂွံဒှ်ပေါဲဗတိုက်အပြံၚ်လှာဲ ဒးကဵုသ္ဂုတ်သွာတ်ပၠန်ဂတးဂှ်တှ်ေ အကာဲအရာအောန်မံၚ်ဏီရောၚ် သ္ကိုပ်ဗိုလ် CDM ဇြေန်ယဝ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ယဝ်ရရံၚ်အာ အကာဲအရာပၞာန်တှ်ေ နူပၞာန်ဒုၚ်ဂှ် သွက်ဂွံပြံၚ်အာ ပၞာန်ထပက်မဟာဗျူဟာ ကြီုလဝ်နွံရ။ ဆဂး အကာဲအရာနတဲဗလးတိလၟုဟ်ဂှ်တှ်ေ ပေါဲဗတိုက် ဒပ်ပၠန်ဂတးတံဂှ် ဗီုပြၚ်ထပက် နဲကဲဗျူဟာစှ်ေစှ်ေ ကၠောန်ဟွံမာန်ဏီပုဟ်။ အိုတ်ကၞောတ် ယဝ်ရ ဒးဟီုတှ်ေ ပရေၚ်ထပက်ပၞာန်ဇြဟတ်လောန်ကာဲ ဒပ်ပၞာန်ဗၟာတံ လပါ်ဒေသရခေၚ်လပါ်သၠုၚ်ကျာ၊ ချေၚ်လပါ်သၠုၚ်ကျာ ကေုာံ ဒေသတွဵုရးကရေၚ်တံဂှ်တှ်ေ ဒးဆက်ဒုၚ်ဒဝ်အာမံၚ်ဖိုဟ်ဏီရ။ ဟိုတ်ဂှ်ရ ကိုပ်ကၠာနူဟွံပြံၚ်သၠာဲ ပၞာန်ထပက် မဟာဗျူဟာဏီဂှ်တှ်ေ ဆၜိုတ်ပလေဝ်စလဝ် သွက်ဂွံပြံၚ်ဗီုပြၚ်ပၞာန်ဒုၚ် နွံကဵုဗီုပြၚ်ထပက်ဂှ်ရောၚ် ဒးဟီုရအဴ” သာ်ဝွံ သ္ဂးရ။
ပ္ဍဲကောံဓရီုသ္ကိုပ်ဒပ်ဇၞော် ဒပ်စဵုဒၞာညးဍုၚ်ကွာန် ကၠောန်ဗဒှ်လဝ် နူဂိတုအဝ်ဂတ် ၃ စဵုကဵု ၆ တေံဂှ် သွက်သ္ဂောံပါလုပ်ကၠောန်အာ ပ္ဍဲကမ္မတဳပ္ညဳပ္ညပ်ကောပ်ကာဲပၞာန် မဟာဗျူဟာ SCEF အတိုၚ်မဟာဗျူဟာမာန် နကဵုပရေၚ်ကမၠောန်ဌာန်ဂတ ဖျေံလဝ်သ္ဂုတ်သွာတ်ရောၚ်။
တုဲပၠန် ပ္ဍဲဇၟာပ်ဒေသပၞာန်တံဂှ်တှ်ေ ပံၚ်တောဲအာကဵု ဂကောံဇြဟတ်ပၠန်ဂတးကောန်ဍုၚ်အရၚ် မဟာမိတ်မဆေၚ်စပ်တံ မွဲစွံတုဲ နူ “ပၞာန်ညးဍုၚ်ကွာန်ဒုၚ်ဒဝ်ပၠန်ဂတး” ဂှ် ညံၚ်သ္ဂောံပြံၚ်တိုန်အာ “ပၞာန်ထပက်မဟာဗျူဟာ” မာန်ဂှ် ပလေဝ်စတုဲ ကၠောန်အာရောၚ် ဖျေံလဝ်လၟေၚ်ကမၠောန်တံနွံ မဒှ်ရ။
ပ္ဍဲအကာဲအရာဏံမ္ဂး သွက်ပၠန်ဂတးတံ အဓိကနွံမံၚ်ပၟိက် ပရေၚ်ကမၠောန်ဂၠာဲသြန်ဘဏ္ဍာတံဂှ် နကဵုဇြဟတ်ပံၚ်ကောံအလုံညးဍုၚ်ကွာန်မွဲ ၜိုတ်သ္ပမာန် ညံၚ်သ္ဂောံပါလုပ်အိုတ်ညိဂှ် နူအလဵုအသဳညဳသၟဟ်ကောန်ဂကူ NUG ဗ္တိုက်ဖ္အောဝ်လဝ်ရ။
နူကဵု ဌာနဝန်ဇၞော်ပရေၚ်စဵုဒၞာ NUG စနူအခိၚ်ဒက်ပ္တန် ဒပ်ထံက်ပလံၚ်ပၠန်ဂတးညးဍုၚ်ကွာန် PRF တေံတုဲ စဵုကဵုစိုပ်တ္ၚဲဏံမ္ဂး ညးယိုက်ဂၠေၚ်လဝ်တာလျိုၚ် နကဵုသန္နိဋ္ဌာန်ခိုၚ်ဗိုန် မနွံကဵုဂလာန်ပတေဟ် ဇၟာပ်မၞိဟ်မွဲတၠတုဲ မွဲတၠတံဂှ်တှ်ေ သ္ပစၟတ်သမ္တီတုဲ ပတိုန်ဏာဂုဏ်စရာဲတၟေၚ် သ္ဂးရ။
စနူဒက်ပ္တန်ဂွံလဝ် ဒပ်စဵုဒၞာညးဍုၚ်ကွာန် PDF တံဂှ် ကဵုလဝ်အထံက်ပၚ် ၃၈ ဝါနွံတုဲ မွဲဝါမ္ဂး သြန်ဒဝ်လာ အမေရိကာန် ၜိုတ် ၀ ဒသမ ၉၆ ဗဳလဳယာန် ပြကောဋိကိုတ်ဂှ် သုၚ်စောဲလဝ်ရောၚ် ပ္ဍဲလိက်လလောၚ်တြး ထမံက်ထ္ၜးလဝ်ရ။
နူဌာနဝန်ဇၞော်ပရေၚ်စဵုဒၞာ ပါ်ပရအ်ထံက်ပၚ်ကဵုလဝ် ကောန်ဒပ်၊ တမ်ဒပ်၊ ကရောၚ်ပၞာန် PDF ၃၆၀ ပြၚ် နွံမံၚ်အလုံမွဲဍုၚ်ဂှ်ကီု စနူသၞာံဏံတုဲ မွဲဝါမ္ဂး သြန်ဒဝ်လာအမေရိကာန် ၜိုတ် ၁ ဒသမ ၃ ဗဳလဳယာန်ပြကောဋိကိုတ် ထပ်သၠုၚ်ပတိုန်တုဲ ထံက်ပၚ်ကဵုမံၚ်ရောၚ် သ္ဂးရ။
တုဲပၠန် ဂကောံစဵုဒၞာညးဍုၚ်ကွာန် (ပကဖ) တံဂှ်လေဝ် စနူအလန် ၃၆ တေံတုဲ ထပ်ထံက်ပၚ်ထပဵုကဵုမံၚ်ရောၚ်ဂှ် ပ္ဍဲလိက်လလောၚ်တြး ဌာနဝန်ဇၞော်ပရေၚ်စဵုဒၞာ ကဵုလဝ်သမ္တီနွံရ။
သြန်သုၚ်စောဲလဝ် သွက်အထံက်ပၚ်တမ်ဒပ် စဵုကဵုတ္ၚဲဏံ ၈၅ က္ဍိုပ်ကၠံ ပြၚ် မနွံသြန်ဒဝ်လာ အမေရိကာန် ၜိုတ် ၃၀ ဗဳလဳယာန် ပြကောဋိကိုတ်ဂှ်တှ်ေ နူကဵုအစဳဇန် ဒပ်ထံက်ပလံၚ်ပၠန်ဂတး ညးဍုၚ်ကွာန် PRF ကံက်ဂွံလဝ် စနူဂိတု ဒဳဇြမ်ပါ၂၀၂၁ စဵုကဵု သိပ်တေမ်ပါ သၞာံ၂၀၂၅၊ ပွိုၚ် ၄၆ ဂိတုတံဂှ် နုတ်ကေတ်လဝ် နူသြန်ပရေၚ်ဘဏ္ဍာ တံတုဲ စကာသုၚ်စောဲလဝ်ရောၚ်ဂှ် လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – NUG